Pagtubag sa mga Pangutana mahitungod sa Atong Relihiyon
Pipila lamang ka adlaw nga ako namiyembro sa Ang Simbahan ni Jesukristo sa mga Santos sa Ulahing mga Adlaw sa dihang usa ka yanong panag-inistoryahay sa pundok sa mga higala mihisgot sa akong bag-ohay nga pagkakabig.
Ang uban nahibulong, gani nalipay. Ang pipila nagpakabaliwala. Usa ka batan-ong babaye nga akong ka-edad yano ug hugot nga midumili sa pagtuo nga ako usa ka Kristiyano.
Kini ang akong unang kasinatian sa pagpaninguha sa pagpasabut sa akong mga pagtuo niadtong wala motuo niini. Nahinumduman nako nga mibati og hilabihan nga kahigawad samtang naninguha ako pagpasabut og maayo sa hilabihan ka sirado nga hunahuna nga walay bisan unsang eksplinasyon makapugos niini sa pagpasabut.
Samtang nagtubo ang Simbahan kini mosagubang og nagkadugang nga pagtuki, sama sa bisan unsa nga dagkong tinuohan, ug kana modala ngadto sa daghan pa nga pag-inatubangay o online nga mga panag-inistoryahay tali sa atong mga miyembro ug sa ilang mga pamilya, mga higala, ug mga kauban kinsa dili sama sa atong tinuohan.
Ang paghatag og pagtagad sa pipila ka mga baruganan makatabang sa mga miyembro pagtubag sa mga pangutana o mga komentaryo nga may labaw nga pagsalig.
Pagsunod sa Inyong Relihiyon
Usa sa dakong mga kaayohan nga maangkon sa matinud-anong mga miyembro sa Simbahan mao nga ang atong tinuohan nag-awhag kanato sa “pagsunod sa atong relihiyon.” Adunay katarungan sa pagkatinuod nga moabut samtang ang mga higala ug mga kauban makakita sa relasyon tali sa unsay gisulti ug gibuhat sa usa ka tawo.
Kon ang kinabuhi sa usa ka Santos sa Ulahing mga Adlaw mao ang iyang labing maayo nga wali, nan ang atong panag-inistoryahay kinahanglan usab nga dayag, tinuod, ug nagdala og kinaiya sa kalooy, bisan og ang mga tawo mangutana og dili angay nga mga pangutana o magpakita og tuno sa pagbiay-biay. Ang atong mga pag-angkon nga mga sumusunod ni Jesukristo labing makakumbinsir kon ang atong mga lihok nahiuyon sa atong mga gituohan. Kon kita nagtubag og mga pangutana o bisan mga pagsaway, adunay mga panahon nga kita nagkinahanglan og kalig-on. Nagkinahanglan usab kita og maayong buot.
Kaniadtong 2007 sa usa ka pagsaulog sa gradwasyon alang sa mga gradwado sa BYU–Hawaii, si Elder M. Russell Ballard sa Korum sa Napulog Duha ka mga Apostoles miingon. “Kon kamo mosunod sa mga baruganan sa ebanghelyo [kay sa] magtuon lamang niini, kana nga talagsaong kombinasyon sa kahibalo motugot kaninyo nga mobati og kasayon ug maandam sa pagtudlo unsa ang inyong nahibaloan nga tinuod—sa bisan unsa nga sitwasyon.”
Pag-andam sa Sitwasyon
Kon kita motubag og mga pangutana o mga komentaryo mahitungod sa atong relihiyon, importante nga mag-andam og pipila ka mga sitwasyon sa sinugdan.
Kay sa tubagon lamang ang mga nagsunod-sunod nga nagkalainlaing mga pangutana, kini makatabang sa paghatag una og 30 ka segundo sa pag-andam og pundasyon. Kana ingon ka yano sama sa pagpasabut nga atong gihuptan si Jesukristo isip atong Manluluwas ug gidawat ang mga pagtulun-an sa Biblia mahitungod sa Iyang pagkatawo, kinabuhi, pangalagad, Paglansang sa Krus ug Pagkabanhaw. Nagtuo usab kita nga ang Kristiyanong kalibutan mibiya gikan sa kamatuoran nga gitudlo ni Jesus diha sa Biblia ug nga ang Simbahan nga Iyang gitukod gikinahanglan nga ipahiuli.
Ang pagpahiluna sa pundasyon nga mga pagtuo sa Simbahan niini nga paagi naghatag og punto sa pakisayran kon ang panaghisgot motipas ngadto sa laing mga doktrina sa ebanghelyo.
Pagsumpay sa mga Impormasyon
Samtang ang mga miyembro maminaw sa mga pangutana, sila makaila sa baruganan sa ebanghelyo taliwala sa pangutana ug makasumpay sa tubag ngadto sa Manluluwas.
Sama pananglit, nganong magpadala kita og mga misyonaryo ngadto sa Kristiyanong mga nasud? Tungod kay sa Iyang panahon mipadala si Jesus sa Iyang mga mensahero og tinagurha “sa tibuok kalibutan.” Ug atong gibuhat ang sama karon. Nganong kita naglikay sa pagpuyo-puyo nga wala pa ang kaminyoon? Tungod kay si Jesus ug ang Iyang mga Apostoles mitudlo sa kabalaan sa kaminyoon ug sa tanan nga nga may kalabutan niini.
Kita wala magkinahanglan og makuti, pasulabi nga kalibutanong mga argumento kon ang mga baruganan nga atong gipaninguha nga sundon nagagikan sa Anak sa Dios.
Pakigbahin og Personal nga mga Kasinatian
Ang pagtubag sa mga pangutana sa atong mga higala dili mahitungod sa pagsulti sa gisag-ulo nga mga tubag. Ang pakigbahin og tinuod, personal nga mga kasinatian makadapit sa Espiritu sa pagpamatuod ug pagdala sa mensahe ngadto sa kasingkasing sa naminaw.
Usa sa labing dako nga mga babag sa pagpakigbahin sa atong tinuohan mao ang kahadlok nga kita walay tubag. Pipila sa mga tawo sa ubang mga simbahan mga eksperto sa ilang kaugalingon nga kasaysayan o doktrina, ug ang mga gitun-an nagpakita nga ang mga Santos sa Ulahing mga Adlaw hilabihan ka na-edukar sa ilang kaugalingon nga tinuohan kon itandi.
Kon may tawo nga mangutana mahitungod sa kasaysayan o doktrina sa Simbahan nga kita wala mahibalo, mahimo ra nga moingon, “Wala ako mahibalo.” Apan kitang tanan makahimo sa pagpakigbahin og personal nga mga kasinatian sa pagpasabut kon unsa ang atong gibati mahitungod sa atong tinuohan.
Kon atong iasoy ang atong kaugalingon nga mga kasinatian mahitungod sa pag-ampo o pagpuasa o sa pagpakigsulti sa epektibo nga paagi sa atong mga pamilya, kadto nga mga kasinatian dili masukna. Kini atoa, ug walay usa nga makasabut niini og mas maayo kay kanato.
Pagpakabana sa Inyong Tigpaminaw
Ang pipila ka mga tawo dili moduol og miyembro nga may pangutana tungod kay sila nahadlok nga mapugos sa pagpaminaw og tunga sa oras nga lecture. Kon sila mangutana ug yano nga pangutana, pagpakabana sa ilang interes, kasayon, ug gitas-on sa pagsabut. Ang pagpakita sa atong pagpakabana sa sinugdan makabutang niadtong kinsa nangusisa diha sa kasayon.
Sabta nga ang sama nga pakigsinultihay dili moepekto alang sa tanan tungod sa nagkalainlaing mga kaagi—relihiyoso, sekular, ug uban pa.
Pakigbahin sa Unsay Atong Gituohan
Ang mga miyembro sa Simbahan adunay dili katupngan nga oportunidad nga mahimong pwersa alang sa kaayohan sa pagtabang og patin-aw sa mga sayop nga mga pagtuo mahitungod sa unsa nga kita dili mao ug sa pagdugang og pasabut sa uban kinsa kita ug unsay atong gituohan.
Samtang ang mga tawo nagkadaghan og nahibaloan mahitungod sa mga pagtuo sa Santos sa Ulahing mga Adlaw, mahimo nga sila makakita og tataw nga mga kalainan ug gani makakaplag og pipila ka wala damha nga pagkaparehas nga makatukod og mas maayong mga relasyon.
Ang pagpakigbahin og personal nga mga kasinatian mas epektibo nga paagi sa pagtubag sa mga pangutana kay sa pagsulti sa gimemorya nga mga tubag.
Kon motubag og mga pangutana sa amigo, ipakita kon si kinsa ka. Kini sa kasagaran mao ang rason nga sila nangutana nimo.