Pagsaulog sa Adlaw sa Pagserbisyo

Ni Kathryn H. Olson

Welfare Services

Ang pagpanglimpyo sa mga building, pag-mop sa mga salug, pagtudlo sa mga estudyante, pagpundok og pagkaon, pagtabang sa mga milalin, pagbisita sa mga biyuda, pag-ibot sa sagbut sa nataran, ug pamintal og mga eskwelahan. Kini mao lamang ang pipila sa daghang mga proyekto sa pagserbisyo nga gihimo sa miaging tuig sa mga miyembro sa Simbahan isip tubag sa pagdapit sa Unang Kapangulohan sa pagpahigayon og adlaw sa pagserbisyo isip pagsaulog sa ika-75 nga anibersaryo sa programa sa welfare. Kini nga mga proyekto klarong nakaapekto niadtong miserbisyo ug giserbisyohan. Daghang mga komunidad sa tibuok kalibutan ang milambo.

London, England

Ang mga miyembro sa Simbahan sa London nagsaulog sa anibersaryo pinaagi sa pagtabang og limpyo sa Tottenham, siyudad nga nakasinati og mga riot niadtong Agosto 2011. Sa regional park, ang mga bolunter namutol sa mga sagbut, naghimo og mga flower bed, ug nanglimpyo.

Ang mga miyembro miserbisyo usab sa ospital sa mga bata, diin sila milimpyo sa agianan sa hardin ug mihimo sa nataran sa ospital nga mas nindot alang sa mga bata ug sa ilang pamilya. Si Charlotte Illera mitabang sa paghan-ay sa proyekto. “Kadto sa tinuoray lisud nga buluhaton, apan kadto nahimong makapalipay usab nga buluhaton,” miingon siya. “Bisan ang gamay nga butang sama sa pagpanilhig makatabang kaayo. Dili kinahanglan nga kamo adunay talagsaong mga kahanas. Ang gagmay nga mga butang makahimo og dakong kalainan sa ubang mga tawo.”

Si Rudi Champagnie mipakigbahin sa iyang panglantaw sa inspirasyon sa pagdapit sa Unang Kapangulohan sa pagserbisyo: “Sa akong hunahuna kini nga pinadayag mas makapahiusa kanato—masuod kita sa komunidad, sa pakighimamat og bag-ong mga tawo.” Siya mipadayon, “Nga nakita ang Simbahan nga nanginlabut sa komunidad usa ka nindot kaayo nga butang. Ang mahilakip niini gani mas espesyal. Kini nakapalig-on sa akong pagpamatuod, ug nakahatag kanako og tinguha nga mas magkugi pa.”

Hong Kong, China

Ang mga hamtong nga lider sa kabatan-onan sa Hong Kong China Stake mihangyo sa youth council sa pagpili og ilang proyekto sa pagserbisyo. Human makita sa mga batan-on ang panginahanglan sa komunidad, sila mihukom sa pagtudlo sa mga bata gikan sa kabus nga mga pamilya sa usa ka lokal nga eskwelahan. Mga 125 ka mga batan-on ang mitudlo sa sobra sa 80 ka mga estudyante kabahin sa pagpalambo sa mga talento, paghimo og makapahimsug nga pagkaon, paghimo og mga panagpundok sa pamilya, ug pagmugna og tinuoray nga pakighigala.

“Kini dili lang kausa nga higayon nga impluwensya,” miingon si Anita Shum, ang stake Young Women president. “Ang gibuhat sa mga batan-on ngadto sa mga bata adunay mahangturong epekto.” Siya midugang nga ang mga batan-on adunay nindot nga mga panumduman ug mga kasinatian nga mopanalangin kanila sa kahangturan.

Accra, Ghana

Ang mga miyembro sa Accra, Ghana, miapil sa adlaw sa pagserbisyo pinaagi sa pagpamintal sa mga eskwelahan, pagpanglimpyo sa kadalanan ug mga gutter, ug nanglimpyo sa mga nataran sa mga ospital ug klinika.

Si Emma Owusu Ansah sa Accra Ghana Christiansborg Stake nahilakip sa pagplano sa ilang adlaw sa pagserbisyo. “Ang pagtinabangay isip miyembro sa Simbahan nakapahiusa kanamo ug nakapasayon sa pagsunod sa baruganan sama sa pagserbisyo,” miingon siya. Pagkahuman sa proyekto, ang mga miyembro nagpundok aron mopakigbahin sa ilang pagpamatuod. Si Sister Ansah misulti, “Human sa pagpaminaw sa tagsa-tagsa ka mga pagpamatuod, nakaamgo ko sa kadako nga mawala kon kita dili moserbisyo sa uban.”

Sa dihang si Presidente Henry B. Eyring, Unang Magtatambag sa Unang Kapangulohan, midapit sa pag-apil sa adlaw sa pagserbisyo, siya namulong sa makapahiusa nga epekto tungod sa mga proyekto: “Ang … baruganan sa ebanghelyo nga nahimo nakong giya sa buhat sa welfare mao ang gahum ug panalangin sa panaghiusa. Kon kita maghiusa sa pagserbisyo sa mga tawo nga nanginahanglan, ang Ginoo mohiusa sa atong mga kasingkasing.”¹

Córdoba, Argentina

Bisan pa sa ulan niadtong Oktubre 1, 601 ka mga Santos sa Ulahing mga Adlaw gikan sa lima ka stake sa Córdoba, Argentina, midonar og 10,234 ka oras sa pagserbisyo sa nursing home. Ang mga miyembro mihatag og mga sinina, pagkaon ug mga hygiene kit. Sila usab naghardin, nagpintal sa mga bong-bong ug lingkuranan, ug nagpasundayag og mga talento. Pipila ka mga sister miboluntaryo sa pagpanindot sa buhok, tiil, ug kamot.

“Nasayud ko nga ang proyekto dili lang tabang alang kanila apan sa kanako usab,” miingon ang 14-anyos nga si Rocío B. human sa proyekto. “Nasayud ko nga gibuhat nako ang matarung nga butang ug ang Langitnong Amahan nahimuot kanako.”

São Paulo, Brazil

Ang mga miyembro sa São Paulo Brazil Stake nadasig sa pagkolekta og asukal, mantika, bugas, ug beans ug gidonar sa duha ka charities. Dayon ilang gibansay ang mga representante gikan sa charities unsaon pagtipig og pagkaon. Ang mga miyembro miboluntaryo usab sa pagbansay sa mga sakop sa stake ug komunidad sa edukasyon, panalapi, ug pagpanarbaho sa pagtabang kanila sa pagpalambo og mga kahanas nga gikinahangalan aron madawat sa trabaho.

“Ang komunidad nga among gidapit nalipay sa buhat sa Simbahan. Daghan ang wala kaila namo, apan miuli sila nga may maayong pagbati,” miingon si Kátia Ribeiro. “Sa mga miyembro, may diwa sa panaghiusa ug serbisyo, ug niadtong among giserbisyuhan, adunay diwa sa pagkamapasalamaton.”

Falls Church, Virginia, USA

Ang mga miyembro sa Falls Church, Virginia, USA, mibati og kalipay nga naghiusa og serbisyo sa duha ka homeless shelter. Nagnusnus sa bong-bong, si Adeana Alvarez miingon sa kaubang miyembro, “Bati kaayo ang akong semana, ug nindot kaayo nga akong inusnus ang akong kalagot niining bong-bong! Kitang tanan nanginahanglan og serbisyo panagsa sa atong kinabuhi, ug nindot nga buhaton kini ngadto sa uban.”

Laing miyembro sa ward, si Anne Sorensen, misulti, “Nindot kini nga paagi nga malakip sa komunidad. Karon mas ganahan kong masayud unsa ang nahitabo niadto nga organisasyon. Matag higayon nga moanhi ko, maghunahuna ko sa mga tawo nga mitambong sa mga klase ug naglaum nga ang among gibuhat dinhi makahatag kanila og paagi nga mobati nga sila wala mag-inusara sa pagpalambo sa ilang kaugalingon.”

Tokorozawa, Japan

Sa usa ka eskwelahan sa elementarya sa Tokorozawa, ang mga miyembro mipresentar og seminar unsaon pagtipig og pagkaon sa 50 ka mga ginikanan ug magtutudlo. Tungod sa linog niadtong Marso 2011, ang mga lider sa komunidad naghinam-hinam unsaon pagpangandam alang sa natural nga mga kalamidad, ilabi na unsaon pagtipig og pagkaon sa taas nga panahon.

“Bisan pa sa dakong linog mga nahitabo sa silangang Japan, wala koy gibuhat sa pagpangandam,” miingon ang usa ka partisipante. “Nalipay ko nga nakakat-on ko niini. Gusto kong makakita og lugar nga katipigan og pagkaon, ug gusto kong protektahan ang akong pinalanggang pamilya.”

Si Akihito Suda, miyembro sa Musashino Japan Stake nakaobserbar nga ang Kahayag ni Kristo mitandog sa komunidad samtang ang mga miyembro mipakita sa ilang pagpangandam sa krisis. “Si Kristo mao ang Kahayag sa Kalibutan,” siya miingon. “Ang Iyang mga pagtulun-an midan-ag sa komunidad.”

Tallinn, Estonia

Ang mga miyembro sa Tallinn migahin og usa ka adlaw sa pagtabang sa nanginahanglang komunidad sa paglimpyo sa ilang panimalay. Pipila sa mga partisipante nagbugha og kahoy ug nagpala og uling, samtang ang uban naglimpyo sa mga karpet, nag-ilis og kurtina, ug naglimpyo sa mga bintana ug bong-bong.

Si Maila Chan uban sa iyang pamilya mibisita og tigulang nga babaye ug nagbugha og kahoy para niya. “Isip inahan nalipay kaayo ko nga ang among pamilya adunay talagsaong kasinatian,” siya miingon. “Nindot kaayo nga samtang nagserbisyo sa uban, inyong kalimtan ang inyong mga problema. Nasayud ko nga samtang nagserbisyo sa uban, kita nagserbisyo lamang sa atong Dios.”

Si Margit Timakov nakaobserbar usab, “Kon dili nako unahon ang akong mga buluhaton ug mopasalig gayud sa pagtabang sa uban, nasabtan nako ang gahum sa sakripisyo. Dili na kinahanglan nga mangutana kon ngano o may mahimo ba kita. Kinahanglan lang ta nga motabang. Motabang ta kay kita nagpakabana. Motabang ta kay gusto tang mosunod sa ehemplo ni Kristo.”

Ang Bunga sa Inyong mga Kahago

Ang mga pagpamatuod niadtong miserbisyo sa ilang komunidad sa tibuok kalibutan nagtudlo kanato nga pinaagi sa pagserbisyo, ang atong pagpamatuod molig-on ug mas maayo ang atong pagbati sa kaugalingon. Si Presidente Eyring mimatuod nga kita mapanalanginan sa atong pagserbisyo: “Sa ngalan sa Agalon akong ipaabut ang pasalamat alang sa inyong buhat sa pagserbisyo sa mga anak sa atong Langitnong Amahan. Nakaila Siya kaninyo, ug nakita Niya ang inyong paningkamot, kakugi, ug sakripisyo. Ako nag-ampo nga Siya mohatag kaninyo og panalangin nga makita ang bunga sa inyong mga paghago diha sa kalipay niadtong inyong natabangan alang sa Ginoo.”²

Pagkaila diha sa mga Komunidad

Usa sa komon nga aspeto sa mga proyekto sa adlaw sa pagserbisyo sa tibuok kalibutan mao ang epekto niini sa lokal nga mga komunidad. Daghang milabay ang nangutana sa mga partisipante kabahin sa Simbahan, ug ang mga miyembro mipakigbahin sa ilang pagpamatuod.

Sa pipila ka bahin sa kalibutan, ang mga opisyal sa gobyerno miila sa mga paningkamot sa mga miyembro sa Simbahan. Sama pananglit, sa interbyu sa radyo kabahin sa adlaw sa pagserbisyo, ang chief sa Kisanga quarter sa Lubumbashi, Democratic Republic of the Congo, nanawagan sa ubang mga relihiyon sa pagsunod sa ehemplo sa “mga Mormons” sa pagserbisyo sa komunidad.

Sa serbisyo nga gihatag sa 300 ka mga miyembro sa Simbahan sa greater London, ang mayor, si Boris Johnson, miingon, “Karon, nindot kaayong tan-awon ang mangihunahunaon sa komunidad nga taga-London—mga bolunter—nga nanagpundok.”

Si Goberndor Dannel Malloy sa Connecticut, USA, ug Gobernador Robert McConnell sa Virginia, USA, miisyu og pamahayag sa pagpasidungog sa mga adlaw sa pagserbisyo sa ilang mga estado. Si Gobernador Malloy miingon sa iyang pamahayag, “Kami mapasalamaton sa Ang Simbahan ni Jesukristo sa mga Santo sa Ulahing mga Adlaw sa ilang pagserbisyo sa uban ug [sa ilang] pagdapit sa mga lumulupyo sa tanang tinuhoan ug background sa pagsaulog uban kanila sa ilang anibersaryo sa tuig sa pagserbisyo.”

London England

Bangalore, India

Bujumbura, Burundi

Falls Church, Virginia, USA

Sa ibabaw: gilitratohan pinaagi ni Todd Schvaneveldt

Litrato sa mga glove © Dani Vincek, 2011 uban sa pagtugot sa Shutterstock.com; ubang mga litrato pinaagi nila ni Charlotte Illera, Cindy Clark, ug Dale Evanson