Pagdala sa Primary ngadto sa Panimalay

Ako Mipili sa Pagpuno sa Akong Kinabuhi sa mga Butang Nga Nagdapit sa Espiritu

Inyong magamit kini nga leksyon ug kalihokan aron makat-on og dugang kabahin sa tema sa Primary karong bulana.

Makabasa kita sa Biblia og usa ka talagsaon nga istorya mahitungod nila ni Shadrach, Meshach, ug Abed-nego. Si Haring Nebucodonosor mitambog niining tulo ka managhigala ngadto sa kalayo tungod kay midumili sila sa pagsimba sa bulawan nga imahe nga iyang gihimo. Ang tulo ka mga Israelite miingon sa Hari nga simbahon lamang nila ang ilang Dios. Tungod kay matinud-anon ang batan-ong mga lalaki, giluwas sila sa Dios gikan sa nagdilaab nga kalayo. (Tan-awa sa Daniel 3.) Kini nga istorya mao ang mahitungod sa pagsalig sa Dios ug pagkamatinud-anon ug pagkamaisugon. Mahitungod usab kini sa buotang mga higala kinsa nagtinabangay sa pagpili sa matarung.

Silang tulo, si Shadrach, Meshach, ug Abed-nego mipili sa pagtuman sa ilang saad sa pagsimba lamang sa Dios. Mipili sila sa pagbaton og hugot nga pagtuo nga ang Dios moluwas kanila. Mipili sila sa dili pagkahadlok sa hari apan sa pagsalig sa Dios. Si Presidente Henry B. Eyring, Unang Magtatambag sa Unang Kapangulohan, miingon, “Tanan kita nagkinahanglan og tinuod nga higala, nga maminaw kanato, mogiya kanato sa dalan, ug mopamatuod sa kamatuoran ngari kanato” (“True Friends,” Liahona, Hulyo 2002, 32).

Hinumdumi, ang buotan nga mga higala makahimo og kalainan sa inyong kinabuhi pinaagi sa pagtabang kaninyo sa pagpili sa matarung. Pangita og mga higala sama kang Shadrach, Meshach, ug Abed-nego, ug mamahimong higala sama kanila!

Kanta ug Kasulatan

• “Maninguha Kong Mahimong Mahisama Kang Jesus,” Songbook sa mga Bata, 40–41.

• Mga Artikulo sa Hugot nga Pagtuo 1:13

Ikaw Lang

Aniay pipila ka mga ideya sa pagkahimong buotan nga higala:

• Sa katapusan sa semana, isulat sa inyong journal unsay inyong gihimo nga mahimong buotan nga higala sa uban.

• Paghunahuna og mga paagi nga inyong ikapakita ang inyong gugma alang sa inyong mga higala.

• Isulat kon sa unsang paagi kamo ug inyong mga higala makalig-on sa inyong pagtuo sa Dios.

• Ipakigbahin sa usa ka ginikanan o lider sa Primary unsay inyong gihimo nga mahimong buotan nga higala.

CTR nga Dula: Pakighigala

Dulaa kini aron makat-on og dugang kon unsaon nga mahimong buotan nga higala. Magkinahanglan ka og liso o butones alang sa matag magdudula ug gagmayng piraso sa papel nga sulatan og “1,” “2,” o “3”. Isulod kini nga mga papel sa sudlanan o envelope.

Sa pagdula, ang usa ka tawo mopili og papel ug iirog og pipila ka luna ang iyang liso o butones kon pila ang numero. Basaha kon unsa ang naa sa luna ug sunda ang mga instruksyon. Ang dula dili mahuman hangtud ang tanan moabut sa katapusan isip buotan nga higala!

Midapit ka sa usa ka bag-ong estudyante nga motupad kanimo og lingkod diha sa bus. Abante og usa ka luna.

Mitabang ka og batang babaye dihang nasakitan siya sa dulaanan. Abante og usa ka luna.

Natagak ang tray sa pagkaon sa batang babaye, apan wala nimo siya tabangi sa pagpunit. Atras og usa ka luna.

Mipakigbahin ka sa imong paniudto sa batang lalaki nga walay baon. Abante og usa ka luna.

Wala ka motagad sa usa ka bisita sa Primary. Atras og usa ka luna.

Gisungog nimo ang imong higala ug nasakitan siya. Atras og usa ka luna.

Mihatag ka og kaisug sa uban sa paghimo og husto nga mga pagpili. Abante og usa ka luna.

Gikataw-an nimo ang usa ka batang lalaki nga lahi tan-awon. Atras og usa ka luna.

Mibisita ang imong pamilya sa bag-ong silingan. Abante og usa ka luna.

Mipaapil ka og laing bata sa inyong dula atol sa recess. Abante og usa ka luna.

Mitabang ka sa manghod nimong lalaki sa iyang mga buluhaton. Abante og usa ka luna.

Mipakigbahin ka sa ebanghelyo ngadto sa usa ka higala. Abante og usa ka luna.

KATAPUSAN

Mga paghulagway pinaagi ni Brad Teare