Sunda ang Propeta
Pagkat-on sa Pagserbisyo sa Uban
Si Thomas Spencer Monson ginganlan og pareho sa iyang apohan si Thomas Condie. Ang batan-ong si Tommy nakakat-on og daghang leksyon gikan sa iyang apohan, nga nagpuyo pipila lamang ka balay ang gilay-on. Ang leksyon nga mahinumduman gayud niya mao ang pagserbisyo sa uban.
Usa ka adlaw dihang si Tommy mga walo ang edad, siya ug ang iyang apohan nanglingkod sa duyan atubangan sa ilang balay. Usa ka gulangon nga tawo gikan sa England ang nagpuyo usab didto nga dalan. Ang iyang ngalan si Robert Dicks, apan kadaghanan sa iyang mga silingan motawag kaniya og “Old Bob.” Biyudo siya og kabus.
Si Iyo Bob milingkod sa duyan uban ni Tommy ug sa iyang apohan. Miingon siya nga ang gamayng balay nga iyang gipuy-an pagagub-on. Wala siyay pamilya, walay kwarta, ug walay kaadtoan.
Naghunahuna si Tommy kon unsaon sa pagtubag sa iyang apohan ang looy nga sitwasyon. Mikuot sa bulsa ang iyang apohan ug mikuha sa gamayng panit nga pitaka. Mikuha siya og yawe ug gibutang kini sa kamot ni Iyo Bob. “Mr. Dicks,” lumo siya nga miingon, “mahimo nimong ibalhin ang imong mga butang ngadto sa bakante nakong balay sa tapad. Wala kay bayad, ug mahimo kang mopuyo didto kutob sa imong gusto. Ug hinumdumi, wala nay mopalayas pa nimo.” Miagas ang luha sa mga mata ni Iyo Bob.
Ang mama ni Tommy nagtudlo usab kaniya sa paghigugma ug pagserbisyo sa uban. Matag Dominggo sa dili pa manihapon ang pamilyang Monson, ang mama ni Tommy mag-andam og usa ka plato sa adobo nga baka, patatas, ug sawsawan alang ni Iyo Bob. Usahay lakipan usab kini sa ilado nga ribbon cake sa mama ni Tommy nga may pink, green, ug puti nga ang-ang sa cake ug pinakaging nga chocolate. Ang trabaho ni Tommy mao ang paghatod sa panihapon ngadto ni Iyo Bob.
Sa una wala kasabut si Tommy nganong dili man una siya makakaon sa dili pa ihatod ang plato. Apan wala gayud siya moreklamo. Modagan dayon siya ngadto sa balay ni Iyo Bob, nga magdala sa puno nga plato. Dayon mahinamon siyang maghulat samtang si Iyo Bob hinay nga moduol sa pultahan.
Ang duha mag-ilis dayon og plato—ang limpyo nga plato ni Bob sa miaging Dominggo ug ang plato ni Tommy nga nag-ugdo sa pagkaon. Dayon motanyag si Bob og sinsilyo isip bayad sa kamabination.
Ang tubag ni Tommy mao lang gihapon: “Dili ko makadawat sa kwarta. Silutan ko sa akong mama.”
Ang tigulang mohikap sa buwagaw nga buhok ni Tommy ug moingon, “Dodong, duna kay talagsaong inahan. Ingna siya nga salamat.” Dihang gibalitaan ni Tommy sa iyang mama ang pulong gikan ni Iyo Bob, migimaw ang mga luha sa iyang mga mata.
Ang pagpakita og gugma nga putli, dili hinakog nga paghatag sa uban, pag-una sa uban, ug pagkabuotan nga higala ug buotan nga silingan importante sa panimalay nga Monson. Nahimo kining ilhanan sa kinabuhi ni Presidente Monson.
Paghulagway pinaagi ni Paul Mann; litrato sa maayong kabubut-on sa pamilyang Monson