Mga Pag-ampo, Mubo nga mga Sulat, ug Natural nga mga Kalamidad

Ni Marissa Widdison

Mga Magasin sa Simbahan

Bisan og kining duha ka batang babaye managlahi og pinulongan ug nagpuyo kapin sa 6,000 ka milya ang gilay-on sa usag usa, dunay butang nga komon kanila: sila pareho nga nakakaplag og pamaagi nga magbaton og positibong kinaiya dihang ang natural nga mga kalamidad miigo sa ilang dapit. Tan-awa kining tinuod nga mga istorya ni Honoka O. nga taga-Japan ug ni Maggie W. nga taga-Missouri, USA. Atol sa subo ug makalilisang nga mga panahon, unsa ang nakatabang kanilang padayon sa kamatinud-anon ug malaumon?

Honoka

Ang akong ngalan si Honoka, ug nagpuyo ko sa Chiba Prefecture, Japan. Ganahan kong magdula, mag-jumping rope, ug mag-drawing. Ang akong pangandoy mao nga mahimong tighulagway [illustrator] ugma damlag.

Ang paborito nakong istorya sa kasulatan mao ang damgo ni Lehi (tan-awa sa 1 Nephi 8). Sa akong hunahuna ang Primary importante kaayo tungod kay makakat-on ko og daghan mahitungod sa Dios ug ni Jesus. Ganahan ko sa miting sa sakrament tungod kay akong mabati nga nalimpyo ang akong kaugalingon kon moambit ko sa sakrament, ug kini nakalipay kanako.

Didto ko sa eskwelahan dihang ang kusog nga linog nahitabo. Mao kini ang akong mga nahunahunaan, “Kuyawa ani!” ug “OK ra ba kaha ang akong pamilya.” Nag-ampo ko sa akong kasingkasing nga unta luwas sila ug ang kinabuhi sa mga tawo maluwas. Wala madugay akong nahibaloan nga walay usa sa akong mga higala ang nasakitan. Nianang higayona, akong gibati nga gipanalipdan kami sa Dios. Nahibalo ko nga ang Dios ug si Jesus buhi.

Maggie

Hello! Ako si Maggie nga taga-Joplin, Missouri. Usa ka gabii ang akong mama nakakita sa balita nga nagpasidaan nga may bagyo, ug tanan kami nangadto sa ilawom sa balay[basement]. Ang kusog, nagdahunog nga hangin nakahadlok kanako. Nabalaka ko sa akong mga higala ug among mga hayop. Human sa bagyo, nagpasalamat ko nga luwas ang akong pamilya ug ang among balay dili dako og kadaot.

Daghan sa ubang mga balay ug mga patigayon nangaguba tungod sa buhawi nga miigo sa lungsod. Naguol ko alang sa mga tawo nga nawad-an og mga minahal. Ang akong mga ginikanan ug mga magulang mihukom nga motabang og limpyo sa among lungsod. Nakapahunahuna kini kanako sa kasulatan, “Kon kamo anaa sa pag-alagad sa inyong mga isigkatawo kamo anaa lamang sa pag-alagad sa inyong Dios” (Mosiah 2:17).

Gusto sab kong motabang sa pagpanglimpyo, apan miingon si mama nga dili kini luwas alang sa usa ka bata. Dayon akong gibati ang Espiritu Santo nga mipakigbahin og maayong ideya sa paglipay sa mga tawo. Naghimo ko og 20 ka mugbong mga sulat sa pasalamat ngadto sa mga bolunter. Migahin ko og dakong panahon sa paghimong espesyal sa matag kard aron mobati sa Espiritu ang mga tawo ug mahibalo nga importante kaayo sila sa among lungsod.

Akong nakat-unan nga bisan og dili ka makahimo og piho nga mga butang sa pagserbisyo, makahunahuna ka og ubang mga paagi sa pagserbisyo. Ang Langitnong Amahan mopanalangin kanimo tungod sa pagserbisyo Kaniya ug sa imong isigkatawo.

Ang Balay ni Maggie

Ang Balay ni Honoka