Pagkakaplag og Hugot nga Pagtuo diha sa mga Kinatumyan sa Yuta

Ni Michael R. Morris

Mga Magasin sa Simbahan

Ang Ushuaia, Argentina, tingali anaa sa kinatumyan sa yuta, apan alang niadtong midawat sa ebanghelyo, kini ang sinugdanan sa bag-ong kinabuhi.

Ang Les Éclaireurs Lighthouse nagbarug sama sa usa ka guwardiya sa gamayng isla sa mabugnawng Beagle Channel. Pinulongang French nga nagpasabut og “ang Manunuhid” o “ang Tiglamdag,” ang Les Éclaireurs mokidlap matag 10 ka segundo gikan sa iyang hilit nga nahimutangan.

Lima ka nautical miles (9 km) sa amihanang bahin, mao ang kinahabagatang siyudad sa Argentina, ang Ushuaia, nahimutang sa tumoy sa arkipelago sa Tierra del Fuego. Nuybenta ka milya (145 km) sa habagatan mao ang Cape Horn ug lapas ana, ang na-ice nga Antarctic.

Alang niadtong nagpamiyembro sa Ang Simbahan ni Jesukristo sa mga Santos sa Ulahing mga Adlaw dinhi niining gitawag sa mga lokal og “ang kinatumyan sa yuta,” ang Les Éclaireurs nagsilbing simbolo sa gipahiuli nga ebanghelyo. Sama sa parola, ang ebanghelyo mao ang banwag nga naggiya kanila gikan sa espiritwal nga kangitngit ug nagdala kanila diha sa lapyahan sa hugot nga pagtuo ug pag-fellowship.

Nakaplagan Nako ang mga Tubag

Si Guillermo Javier Leiva nakahinumdom sa kasakit sa iyang diborsyo niadtong 2007. Kinahanglan niyang mangita og apartment ug dili na makakita kada gabii sa iyang batan-ong anak nga lalaki, si Julian. Mibati siya og kahaw-ang ug kamingaw.

“Nagguol ko pag-ayo,” siya miingon, “ug sa panahon sa kasagmuyo, nangita ko sa Dios.”

Si Guillermo miampo alang sa mga tubag ug tabang. “Miingon ako, ‘Amahan, dili ako takus aron Ikaw mosulod sa akong balay, apan usa ka pulong gikan Kanimo igo na nga makaayo kanako.’”

Sa wala madugay miabut ang tubag niadtong pag-ampo sa dihang ang mga misyonaryo mihunong aron sa pakig-istorya kaniya samtang siya nakigdula sa iyang anak gawas sa bag-o niyang apartment.

“Usa kanila mitimbaya kanako ug nangutana ko anaa ba koy pagtuo,” siya mihinumdom. “Mitubag ko og oo apan dili ko buotan nga Kristiyano. Siya nangutana kon mobasa ba ko kon hatagan ko niya og basahon. Mitubag ko og oo.”

Samtang gibasa ni Guillermo ang mga bersikulo sa Alma 32 nga gimarkahan sa mga misyonaryo, siya miingon, “Diha-diha dayon mibati ko sa dakong kalipay nga wala na nako mabati sa dugayng panahon. Ang basahon mitandog sa akong kasingkasing. Dili ko ganahang mohunong sa pagbasa.”

Si Guillermo wala na magsimbahan sa iyang tinuohan sa una, apan iyang gisultihan ang mga misyonaryo nga wala siyay plano nga magpabunyag og usab. Hinoon, ganahan siya sa ilang pagbisita ug sa pagbasa sa ilang reading assignment sa Basahon ni Mormon.

Samtang siya nagbasa, siya nagguol kang Nephi sa dihang iyang nasayran nga ang propeta nasagmuyo “tungod sa mga pagtintal ug ang mga sala sayon nga mohasol kanako” (2 Nephi 4:18). “Nasayud ko nga nakasala ko,” miingon si Guillermo, “ug nagmahay niini.”

Samtang nagbasa siya, mibati siya nga giluwas gikan sa kangitngit ug kawala sa paglaum ug gidala ngadto “sa kahayag sa himaya sa Dios” (Alma 19:6).

Ug samtang iyang gibasa ang pakigsaad sa bunyag diha sa Katubigan sa Mormon, siya nakaamgo sa kaimportante nga mabunyagan sa tawo nga may eksaktong awtoridad. “Kon akong nasayran ang liso maayo, ‘unsay anaa kanako … batok sa pagpabunyag diha sa ngalan sa Ginoo’?” (Mosiah 18:10), siya namalandong.

“Kada basa nako, mobati ko og kalinaw ug makakaplag og mga tubag,” miingon si Guillermo. “Nakaamgo ko nga ang Basahon ni Mormon mao ang pulong sa Dios nga akong giampo.”

Sa dihang nabunyagan siya niadtong Marso 2009, siya nausab sa espiritwal nga paagi ug may bag-ong paglaum sa umaabot. “Ang bunyag mao ang kahigayunan nga magbag-o,” miingon si Guillermo. “Giusab nako akong kinabuhi. Malipayon ko karon. Nasayud ko nga kini ang tinuod nga Simbahan ni Jesukristo ug ang Dios motubag sa mga pag-ampo tungod kay Iyang gitubag ang akong pinakamahinungdanon nga pag-ampo.”

Kami Nanginahanglan og Simbahan

Isip bata, si Amanda Robledo walay espiritwal nga tambal alang sa iyang pisikal nga kasakit human namatay ang iyang inahan. Ug ang iyang bana, si Ricardo, wala makakaplag og mga tubag sa iyang matinuoron nga kinasingkasing mga pangutana sa pagkamatay sa iyang igsoon.

Usa niadto nga mga pangutana mao, Aduna bay simbahan sa kalibutan nga nagsunod sa mga pagtulun-an ni Jesukristo? Ang ilang pagpangita niana nga simbahan ug mga tubag sa ilang pangutana nakaandam kanila sa pagdawat sa gipahiuli nga ebanghelyo.

Samtang sila nagsiksik, sila misimba sa lain-laing relihiyon ug nag-imbestigar sa daghang pagtuo. Sila nangita og simbahan nga wala lang mahiuyon sa mga pangtulun-an ni Kristo apan makalig-on usab sa ilang pamilya.

“Kadto lisud nga panahon sa among pamilya,” mihinumdom si Amanda, “ug kami nagkinahanglan og simbahan sa pagtabang kanamo.”

Sa sayong bahin sa mga tuig 1990 ang pamilyang Robledo mibalhin gikan sa Mendoza, sa amihanang kasadpan sa Argentina, ngadto sa Ushuaia. Sa dihang ilang nahibaloan ang Simbahan paglabay sa duha ka tuig, ilang nabati dayon nga adunay lahi sa diwa ug mga pagtulun-an sa mga full-time nga misyonaryo.

Gamay lang ang nasayran ni Amanda sa Simbahan. “Ug dili maayo ang akong nadungog,” siya miingon. Apan siya, si Ricardo, ug upat nila ka anak natandog sa ilang nakat-unan.

“Nabati nako ang Espiritu sa dihang ang mga misyonaryo mitudlo kanamo,” miingon ang ilang anak nga si Bárbara, kinsa 11 anyos niadtong panahona. “Ug ganahan ko sa dihang mitudlo sila nga kami makaampo isip pamilya.”

Ang pagpaminaw sa mga diskusyon sa misyonaryo, pagbasa sa Basahon ni Mormon, ug pagsimba, miingon si Ricardo, “nakahatag sa mga tubag nga among gipangita—mga tubag kabahin sa bunyag, kinabuhi sa wala pa dinhi sa yuta, ang kabalaan ni Kristo, ang imortalidad sa tawo, mga ordinansa sa ebanghelyo, kaminyoon, ug sa pagka mahangturon sa pamilya.”

Alang sa mga Robledo, ang pagkasayud nga ang ilang pamilya mahimong mag-uban hangtud sa hangtud mao ang labing mahinungdanon nga doktrina sa gipahiuli nga ebanghelyo.

“Ang akong pagkakabig nahitabo nianang higayuna,” miingon si Ricardo, kinsa nabunyagan sa wala pay tulo ka semana human sa unang diskusyon ug karon nagserbisyo isip second counselor sa district presidency. “Nag-antus ko sa dihang namatay ang akong igsoon sa edad nga 49, apan nasabtan nako nga maluwas nako siya pinaagi sa buhat diha sa templo. Kini nga kasiguroan naghatag kanako og kalinaw ug kalipay.”

Si Amanda, sa wala madugay nabunyagan usab uban sa usa sa ilang mga anak, miingon, “Wala na koy inahan sukad bata pa ko. Kanunay maghunahuna ko nga wala na siya, ug kini nakapasagmuyo kanako. Apan sa dihang ang mga misyonaryo miingon kanamo nga ang pamilya mahimong mag-uban sa kahangturan, kini nakapatandog sa akong kasingkasing. Nindot kaayong hunahunaon nga makakita ko niya pag-usab.

Human nga naminyo alang sa kahangturan sila si Ricardo ug Amanda didto sa Templo sa Buenos Aires Argentina, ang ilang mga anak na-sealed ngadto kanila. Ang pagka-sealed isip pamilya, pagkompleto sa ordinansa alang sa daghang nangamatay nga mga paryente, ug pagpamisyon sa ilang tulo ka anak nakapalipay pag-ayo nila ni Ricardo ug Amanda.

“Usa sa dakong panalangin nga among nadawat isip miyembro sa Simbahan,” miingon si Amanda, “mao nga ang among mga anak nagsunod sa Dios.”

Ang Sinugdanan sa Tanang Butang

Si Marcelino Tossen nagtuo sa Dios, nagbasa sa Biblia, ug ganahang makig-istorya kabahin sa relihiyon, busa sa dihang ang full-time nga mga misyonaryo mituktok sa iyang apartment usa ka adlaw sa Enero 1992, gipasulod niya sila. Kadto nga desisyon nakapausab sa iyang kinabuhi.

“Sila si Elder Zanni ug Elder Halls misunod sa mga impresyon sa Espiritu,” mihinumdom si Marcelino. Sa wala pa matapos ang unang panaghisgutan, ang mga elder miingon nga siya mabunyagan sa Simbahan, gani misulti sa tukmang petsa nga siya mabunyagan.

“Dili ko magpabunyag,” mitubag si Marcelino “Ganahan ra kong makig-istorya ninyo.”

Ang mga misyonaryo mihatag kaniya og Basahon ni Mormon ug mihangyo nga basahon ang pipila ka bersikulo ug iampo ang ilang mensahe niadtong gabhiona. Iya kining gibuhat apan wala siya’y gibati.

Atol sa sunod nga diskusyon, si Elder Zanni mihangyo kaniya, “Mahimo ba nga mag-ampo ta aron imong mapangutana ang Langitnong Amahan kon ang among gitudlo tinuod?”

Samtang siya nag-ampo, si Marcelino miingon, “nabati nako ang akong kasingkasing miinit. Wala gyud ko makasinati og ingon adto sukad-sukad. Wala gani nako mahuman ang pag-ampo, ug mibarug ko.”

Si Elder Zanni nangutana kang Marcelino kon aduna ba siyay gibati atol sa pag-ampo. Sa dihang si Marcelino mitubag nga wala, ang misyonaryo miingon, “Nabati nako nga kusog kaayo ang Espiritu. Lisud katoohan nga wala nimo mabati.”

Sa dihang iyang giangkon nga iyang nabati, si Marcelino miingon, “ang mge elder mibasa sa Doktrina ug mga Pakigsaad, naghisgut nako nga kon ang Ginoo adunay buot ipahibalo kanato nga eksakto, Iyang ipadala ang Iyang kalinaw o mopainit sa atong kasingkasing [tan-awa sa D&P 6:23; 9:8]. Kadto nga adlaw nakadesisyon ko.”

Sukad niadto, ang Espiritu midasig kaniya ug mipamatuod sa kamatuoran sa daghang espiritwal nga mga kasinatian. “Nabati nako pag-usab ang kainit sa dihang nag-inusara ko sa apartment,” miingon si Marcelino. “Kon ablihan nako ang bintana, makit-an nako ang mga elder sa eskina nagtudlo sa mga tawo kabahin sa Simbahan. Mabati nako kon duol sila, ug giseryuso nako ang ilang gitudlo kanako.”

Si Marcelino mainitong giabi-abi sa dihang misimba siya. Siya nabunyagan niadtong April 22—ang tukmang petsa nga gisulti sa mga misyonaryo tulo na ka bulan nga milabay. Karon, human magserbisyo og siyam ka tuig isip presidente sa Ushuaia district, siya ngaserbisyo isip second counselor sa presidency sa Buenos Aires north mission.

“Kon atong mabasa nga ang Ginoo ‘mopadala sa [Iyang] pulong ngadto sa mga kinatumyan sa yuta’ [D&P 112:4], kana ang Ushuaia,” miingon si Presidente Tossen. “Ang Ushuaia mao ang kinatumyan sa yuta. Apan alang niadtong nakakaplag sa ebanghelyo dinhi, kini ang sinugdanan sa tanang butang. Dinhi inyong makita ang parola sa kinatumyan sa yuta. Apan dinhi nako nakaplagan ang hugot nga pagtuo ug parola sa Ginoo.”

Pinaagi sa Basahon ni Mormon, ang Dios “mitubag sa akong pinaka mahinungdanon nga pag-ampo,” miingon si Guillermo Leiva (sa ibabaw, tunga), kinsa nagserbisyo isip branch president sa Ushuaia. Ibabaw sa tuo: Les Éclaireurs Lighthouse ug mga litrato sa Ushuaia.

Sa tuo: Alang kang Amanda ug Ricardo Robledo (uban sa ilang mga anak nga babaye nga sila si Bárbara ug Irene), ang pagkasayud nga ang ilang pamilya mahimong mag-uban hangtud sa hangtud mao ang labing mahinungdanon nga doktrina nga nakapadawat kanila sa gipahiuli nga ebanghelyo.

Ang Ushuaia mahimong anaa sa kinatumyan sa yuta, apan alang nila ni Marcelino Tossen kinsa nakakaplag sa ebanghelyo dinhi, “kini ang sinugdanan sa tanang butang.”