Walay Paglubad nga mga Istorya sa Ebanghelyo
Pagkat-on sa Inyong Katungdanan
Si Joseph B. Wirthlin natawo niadtong Hunyo 11, 1917, sa Siyudad sa Salt Lake, Utah. Siya gipaluyohan ngadto sa Korum sa Napulog Duha ka mga Apostoles niadtong 1986. Ang mosunod nga kinutlo gikan sa iyang pamulong nga gihatag sa kinatibuk-ang komperensya niadtong Oktubre 5, 1980, isip sakop sa First Quorum of the Seventy. Alang sa kompleto nga teksto sa Iningles, tan-awa sa Ensign, Nob. 1980, sa ensign.lds.org.
Ang katungdanan nagpahinumdom kanato nga kita mga tinugyanan sa tanang gisalig kanato sa atong Tiglalang.
Kadaghanan kanato mobuhat sa unsa ang angay natong buhaton kon kini dili makasamok sa gusto natong buhaton, apan nagkinahanglan og disiplina ug kahingkod aron buhaton nato ang angay buhaton gusto man nato o dili. Sa kanunay ang katungdanan mao ang gipaabut sa usa ka tawo gikan sa uban ug dili ang iyang gibuhat. Ang gihunahuna ug gituohan ug giplano sa mga tawo importante kaayo, apan ang ilang gibuhat mao ang labing mahinungdanon. Kini usa ka hangyo nga isalikway ang pagkahakog ug hunahunaon ang ikaayo sa tanan.
Kinahanglan nga hinumduman nato kanunay nga ang katungdanan nagpahinumdom kanato nga kita mga tinugyanan sa tanang gisalig kanato sa atong Tiglalang. Kon dawaton nato ang mga katungdanan nga andam ug matinuoron, kita makakaplag og kalipay. Kadtong giuna lang ang kalipay sa kinabuhi gidahuman nga mapakyas, kay, ang kalipay mao ang bunga ug dili ang tumong mismo. Ang kalipay naggikan sa pagbuhat sa katungdanan ug pagkasayud nga ang iyang kinabuhi nahiuyon sa Dios ug sa Iyang mga sugo. …
Ang tanang malampuson nga mga tawo sa kasaysayan sa kalibutan nasayud sa ilang katungdanan ug adunay lig-ong tinguha sa pagtuman niini. Ang Manluluwas adunay hingpit nga pagsabut sa katungdanan. Bisan tuod ang gikinahanglan Kaniya sobra sa kapabilidad sa usa ka tawo, Iyang hingpit nga gitugyan ang Iyang kaugalingon ngadto sa kabubut-on sa Iyang Amahan ug mituman sa Iyang balaanong katungdanan pinaagi sa pag-ula sa mga sala sa katawhan.
Si Joseph Smith maunungon sa iyang calling ug mituman sa iyang katungdanan bisan pa nag-atubang og grabeng pagpanggukod ug dakong personal nga sakripisyo. Siya nagmakugihon, milahutay, ug mibuhat sa Pagpahiuli sa tinuod nga ebanghelyo ni Jesukristo. …
Si Presidente Spencer W. Kimball [1895–1985] midawat sa sugo sa pagdala sa ebanghelyo ngadto sa mga kinatumyan sa yuta. Siya matinud-anong nagbuhat sa iyang katungdanan ug usa ka talagsaong ehemplo alang kanato sa tanan niyang gibuhat sa pagpakatap sa ebanghelyo sa gugma. Ang resulta mao ang Simbahan nga milukop sa kalibutan ug katumanan sa usa ka panagna sa ulahing adlaw.
Kining halangdon nga mga tawo … mahimo untang mopili sa mas sayon nga dalan kaysa asa sila gidala sa ilang katungdanan. Apan wala nila kini buhata. Sigurado ang ilang katungdanan dili sa kanunay nakahatag og kahupay o kahamogaway. Sa kanunay ang ilang katungdanan nagkinahanglan og dakong sakripisyo ug personal nga kakugi; apan bisan pa man, ang katungdanan ang ilang gipili ug gituman.
Ang kinabuhi nagkinahanglan kanato nga mobuhat og daghang katungdanan—ang pipila balik-balik, ang uban mas makahuluganon ug mahinungdanon. Usa sa importante kaayo nga bahin sa katungdanan mao ang mahimong maayo nga ehemplo ug sa pagpahimulos sa matag oportunidad sa pagtabang sa uban niining lisud nga dalan sa kinabuhi. Kini mahimo pinaagi sa makapaawhag nga pulong, pagdayeg, paglamano—bisan unsa nga lihok nga nagpasabut og pag-amuma. Ug atong hinumduman nga samtang kita maayong nagkat-on sa mga buluhaton dinhi, kita nag-andam usab sa pagbuhat sa mahangturong mga katungdanan. …
Ang kinahanglanon gayud buhaton nga atong mga katungdanan sa panimalay, sa Simbahan, sa atong trabahoan matag adlaw, ug sa atong pinalanggang nasud … klaro ug maayo kaayong pagkahulagway sa Gamhanang Magtutudlo, si Jesukristo. Siya mideklarar:
“Kay walay maayong kahoy nga magapamungag mga bungang walay pulos, ni may kahoy nga walay pulos nga magapamungag bungang maayo.
“Kay ang matag kahoy maila pinaagi sa iyang bunga. Kay walay mga igos nga anha popoa gikan sa kasampinitan, ni mga parras gikan sa kadyapaan.
“Ang maayong tawo, gikan sa maayong bahandi sa iyang kasingkasing, magapagulag maayo; apan ang dautang tawo, gikan sa iyang dautang bahandi, magapagulag dautan: kay gikan sa kadagaya sa kasingkasing magasulti ang iyang baba.
“Nganong motawag man kamo kanako nga, Ginoo, Ginoo, apan dili mobuhat sa ginasugo ko kaninyo?
“Ang matag usa nga magaduol kanako ug magapatalinghug sa akong mga pulong ug magabuhat niini, ipakita ko kaninyo kon sa unsa siya mahisama:
“Siya mahisama sa usa ka tawo nga nagtukod og balay, nga nagkalot og lalum, ug nagpahiluna sa patukoranan diha sa ibabaw sa bato: ug sa pag-abut sa baha, ang bulhog mihasmag niadtong balaya, apan wala makatay-og niini: kay kini maayo man nga pagkatukod.
“Apan siya nga nagpatalinghug, ug dili magabuhat niini, mahisama siya sa usa ka tawo nga nagtukod sa iyang balay nga walay patukoranan diha sa yuta; kini gihasmagan sa bul-og ug diha-diha napukan; ug daku gayud ang pagkagun-ob niadtong balaya” (Lucas 6:43–49).
“Ayaw pagluya diha sa maayo nga buhat” (D&P 64:33), akong mga kaigsoonan. Ang pagkamatinuoron sa katungdanan usa ka timaan sa tinuod nga disipulo sa Ginoo ug sa mga anak sa Dios. Magmaisug sa inyong katungdanan. Magpabiling lig-on. Ayaw og kapakyas sa inyong labing mahinungdanon nga buluhaton, nga mao ang inyong pagpakabuhi dinhi sa yuta. Pagmatinuoron sa inyong katungdanan, kay makapaduol kini ninyo sa Dios.
Mohatag ko sa akong lalum ug kinasingkasing nga pagpamatuod nga kini mao lang ang paagi nga makabaton og kalipay ug makatabang sa paglambo sa gingharian.
Paghulagway sa litrato pinaagi ni Craig Dimond