Mga Ideya sa Family Home Evening

Kini nga isyu naglangkob og mga artikulo ug mga kalihokan nga mahimong magamit alang sa family home evening. Ang mosunod mao ang pipila ka mga ehemplo.

“Natural nga mga Kalamidad—Dili Kita Kinahanglang Mahadlok,” pahina 30: Basaha og una ang artikulo ug sa mainampuong paagi pamalandong unsa ang mabuhat sa inyong pamilya nga mas maandam og maayo alang sa natural nga mga kalamidad sa inyong dapit. Dayon, sama sa gisugyot ni Elder Ellis, gamita ang family home evening sa pagpatuman sa inyong plano. Mahimo kamong modesisyon sa pagpundok sa mga emergency pack, pagdugang sa inyong pundo sa pagkaon sa panimalay, o sa paghisgot kon unsaon nga maandam sa espiritwal nga paagi. Hatagi og gibug-aton ang makapadasig nga mensahe ni Elder Ellis nga “kon kita andam, kita makasugakod sa bisan unsang unos.”

“Padayon sa Hugot nga Pagtuo sa Makalibug nga Kalibutan,” pahina 42: Hunahunaa ang pagpakigbahin sa kasinatian ni Bishop Caussé diha sa klasehanan nga makita sa sinugdanan sa artikulo. Dayon pangutan-a ang mga sakop sa pamilya unsa kaha ang ilang buhaton niana nga sitwasyon. Mahimong inyong ribyuhon ang mga baruganan nga gisunod ni Bishop Caussé sa pagpabilin nga lig-on sa iyang pagpamatuod.

“Unsaon Nako sa Pagkahibalo nga Ako Napasaylo?” pahina 46: Sugdi pinaagi sa pagpangutana sa mga sakop sa pamilya, “Human kamo naghinulsol, unsaon ninyo pagkahibalo nga kamo napasaylo?” Dayon inyong mabasa ang tubag ni Elder Callister diha sa ikaduhang paragraph sa artikulo. Pakigbahin og dugang mga seksyon sa artikulo nga angay sa inyong pamilya.

“Pagkat-on sa Pagserbisyo sa Uban,” pahina 66: Basaha ang istorya mahitungod sa pagkabata ni Presidente Monson ngadto sa inyong pamilya. Dayon mahimong inyong buhaton ang tukma nga mga kalihokan uban sa bisan kinsang bata sa pamilya. Taposa pinaagi sa inyong pagpamatuod nga si Thomas S. Monson mao ang buhing propeta.

Usa ka Hingpit nga Hulagway sa Family Home Evening

Kanunay akong nangandoy nga makahimo og mga family home evening sama sa akong nakita sa mga hulagway diha sa Simbahan. Apan human ang akong bana ug ako makasagop og maanyag nga gamay nga batang babaye, dili siya gustong moapil. Busa kami nakaamgo nga kinahanglan namong maghimo og mga kausaban sa among mga family home evening aron maapil siya.

Unsa ka mapasalamaton ako alang sa mga ideya sa family home evening nga gimantala diha sa Liahona. Karon ang among anak nga babaye mao ang unang gusto nga maghimo og family home evening ug nangandoy nga among himoon kada adlaw.

Usa sa among paborito nga mga leksyon mao ang mahitungod sa unsaon nga ang Espiritu Santo makagiya kanato. Among gisugo ang among anak nga babaye sa pagsulod sa iyang lawak. Human sa among pag-ihap og tulo, makabalik siya sa sala ug mosulay sa pagpangita og hulagway sa Manluluwas. Kon siya maduol niini, miingon kami nga siya init, ug kon siya malayo, miingon kami nga siya bugnaw. Nalipay kaayo siya sa dihang nakit-an niya ang hulagway. Nindot kaayong tan-awon siya nga nakasabut sa importansya sa pagkamasulundon ug sa pagsunod sa Espiritu aron maduol sa atong Manluluwas.

Among gitapos pinaagi sa pagbasa sa Doktrina ug Mga Pakigsaad 11:12. Pinaagi sa pagtugyan sa atong “pagsalig diha niana nga Espiritu nga nagtultol sa pagbuhat og maayo,” among nakita nga ang family home evening usa ka panalangin.

Moema Lima Salles Broedel, Brazil