Paglihok Agi og Tubag sa Panahon sa Panginahanglan

Tun-i kini nga materyal sa mainampuon nga paagi ug, kon angay, hisguti kini uban sa mga sister nga inyong bisitahan. Gamita ang mga pangutana sa pagtabang kaninyo sa paglig-on sa inyong mga sister ug sa paghimo sa Relief Society isip aktibong bahin sa inyong kaugalingon nga kinabuhi.

Hugot nga Pagtuo, Pamilya, Kahupayan

Isip mga visiting teacher, usa sa atong katuyoan mao ang pagtabang sa paglig-on sa mga pamilya ug panimalay. Ang mga sister nga atong gibisitahan kinahanglan nga makasulti, “Kon ako adunay mga problema, nasayud ko nga ang akong mga visiting teacher motabang nga dili na sultihan.” Aron makaserbisyo, kita kinahanglan nga masayud sa mga panginahanglan sa mga sister nga atong gibisita. Kon kita magtinguha og inspirasyon, kita masayud unsaon sa pagtubag sa espiritwal ug temporal nga mga panginahanglan sa matag sister nga gi-assign kanato. Dayon, gamit sa atong panahon, mga kahanas, mga talento, mga pag-ampo sa hugot nga pagtuo, ug espiritwal ug emosyonal nga tabang, kita makahatag og mapuanguron nga serbisyo panahon nga dunay nagmasakiton, kamatayon, ug uban pang espesyal nga mga sirkumstansya.¹

Pinaagi sa report sa mga visiting teacher, ang kapangulohan sa Relief Society moila niadtong may espesyal nga mga panginahanglan tungod sa pisikal o emosyonal nga balatian, emerhensya, pagpanganak, kamatayon, may kakulangan, kamingaw o uban pang mga hagit. Ang Relief Society president mo-report dayon sa iyang nahibaloan ngadto sa bishop. Ubos sa direksyon sa bishop, siya mopahigayun sa tabang.²

Isip mga visiting teacher kita adunay “dako nga katarungan … nga maglipay” tungod sa “panalangin nga gitugyan ngari kanato, nga kita nahimo nga mga himan diha sa mga kamot sa Dios aron sa pagpahinabo niining dako nga buluhaton” (Alma 26:1, 3).

Gikan sa mga Kasulatan

Mateo 22:37–40; Lucas 10:29–37; Alma 26:1–4; Doktrina ug mga Pakigsaad 82:18–19

Gikan sa Atong Kasaysayan

Sa bag-o pa lang ang Simbahan, gamay pa lang ug dug-ol ra ang mga miyembro. Ang mga miyembro makatabang dayon kon adunay nanginahanglan. Karon ang gidaghanon sa mga miyembro labaw na sa 14 ka milyon ug mikatap sa tibuok kalibutan. Ang visiting teaching kabahin sa plano sa Dios aron sa pagtabang sa Iyang mga anak.

“Ang bugtong sistema nga makahatag og tabang ug kahupayan tadlas sa usa ka simbahan nga dako kaayo diha sa kalibutan nga nagkadaiya mao ang pinaagi sa tagsa tagsa ka sulugoon duol sa mga tawo nga nanginahanglan,” miingon si Presidente Henry B. Eyring, Unang Magtatambag sa Unang Kapangulohan.

“… Ang matag bishop ug branch president dunay usa ka presidente sa Relief Society nga saligan,” mipadayon siya.“Siya adunay mga visiting teacher, nga nasayud sa mga pagsulay ug sa panginahanglan sa matag sister. Siya makahimo, pinaagi kanila, nga masayud sa kasingkasing sa tagsa-tagsa ka mga tawo ug sa pamilya. Makatabang siya sa mga panginahanglan ug makatabang sa bishop sa iyang tawag sa pag-amuma sa tagsa-tagsa nga mga tawo ug sa pamilya.”³

Mga paghulagway sa litrato pinaagi ni Bradley Slade