Unsa ang Atong Gituohan

Ang Sakrament Paghinumdom sa Manluluwas

Ang sakrament sagrado nga ordinansa sa priesthood nga ipahigayon matag Dominggo. Si Jesukristo mipasiugda niining ordinansa sa dihang anaa Siya sa yuta ug gipahiuli kini sa atong panahon pinaagi ni Propetang Joseph Smith. “Ang ordinansa sa sakrament,” miingon si Elder Dallin H. Oaks sa Korum sa Napulog Duha ka mga Apostoles, “naghimo sa miting sa sakrament nga labing sagrado ug importante nga miting sa Simbahan.”¹

Ang Ginoo nagsugo kanato nga magpundok ug moambit sa sakrament matag Dominggo (tan-awa sa D&P 20:75). Ang mga tighupot sa Aaronic Priesthood mopanalangin ug mo-pass sa tinapay ug tubig ngadto sa kongregasyon, kinsa moambit sa sakrament isip pahinumdom sa lawas ug dugo ni Jesukristo. Sa pagbuhat niini, sila mipasalig pag-usab sa pagtuman sa mga pakigsaad ngadto sa Ginoo sa dihang sila nabunyagan. Sa pihong paagi, sila nagsaad sa kanunay nga mohinumdom ni Jesukristo, sa pagdala sa Iyang ngalan, ug pagsunod sa Iyang mga sugo. (tan-awa sa D&P 20:77).

Ang husto nga pagpangandam sa pag-ambit sa sakrament naglakip sa paghinulsol, pagtinguha sa pagsunod sa Manluluwas, ug pagbaton og “masulub-on nga kasingkasing ug usa ka mahinulsulon nga espiritu” (3 Nephi 9:20). Ang pag-ambit sa sakrament usa ka senemanang oportunidad sa pagpamalandong ug pagpahinungod og usab. Ang balaan nga pagtahud ug pag-ampo makapabalaan sa kasinatian. Ang mga indibidwal kinsa seryosong nakasala dili gayud moambit sa sakrament hangtud sila maghinulsol, lakip ang pagkumpisal ngadto sa ilang bishop o branch president (tan-awa sa 3 Nephi 18:28–30).

Ang takus nga pag-ambit sa sakrament makahatag og talagsaong mga panalangin, sama sa kapasayloan sa mga sala, ang pagpakig-uban sa Espiritu Santo, ug pagkabalaan—mabalaan—pinaagi sa Pag-ula.

1. Gipasiugdahan ni Jesukristo ang sakrament diha sa Iyang Napulog Duha ka mga Apostoles nianang gabhiuna sa wala pa Siya Gilansang sa Krus (tan-awa sa Lucas 22:19–20).

2. Human sa Iyang Pagkabanhaw, gipasiugdahan sa Manluluwas ang sakrament sa Amerika (tan-awa sa 3 Nephi 18:1–11).

3. Ang mga tighupot sa Aaronic Priesthood moandam, mopanalangin, ug mo-pass sa sakrament ubos sa direksyon sa bishop o branch president.

4. Atol sa sakrament, kita mag-focus sa pagsimba ug maglikay sa mga lihok nga makapasamok sa uban.

5. Hinumduman nato ang kinabuhi, ehemplo, mga pagtulun-an, ug Pag-ula sa Manluluwas samtang moambit sa sakrament uban sa balaan nga pagtahud.

Mubo nga sulat

1. Dallin H. Oaks, “Ang Miting sa Sakrament ug ang Sakrament,” Liahona, Nob. 2008, 17.

Alang sa dugang impormasyon, tan-awa sa 1 Mga Taga-Corinto 11:23–30; Doktrina ug mga Pakigsaad 27:2.

“Atong gidawat nga tanan kita masayop. Ang matag usa kanato may panginahanglan sa pagkumpisal ug sa pagbiya sa atong mga sala ug kasaypanan ngadto sa atong Langitnong Amahan ug sa uban nga tingali atong napasakitan. Ang Adlaw nga Igpapahulay naghatag kanato og bililhong oportunidad sa paghalad niining—atong mga sakrament—ngadto sa Ginoo.”

Elder L. Tom Perry sa Korum sa Napulog Duha ka mga Apostoles, “Ang Adlaw nga Igpapahulay ug ang Sakrament,” Liahona, Mayo 2011, 8.

Pagtubag sa mga Pangutana

Kadtong dili pamilyar sa atong mga miting sa Dominggo tingali maghunahuna kon kadtong dili mga miyembro makatambong ug makaambit ba sa sakrament. Ang tanan welcome nga mosimba uban kanato. Ang sakrament gituyo sa pagtabang sa mga miyembro sa pagbag-o sa ilang mga pakigsaad, apan kon ang pag-ambit sa sakrament makatabang sa bisita sa pagsimba, mahimo nila kining buhaton.

Sa ubos: Ang Katapusang Panihapon, ni Simon Dewey; sa tuo: Ang Katapusang Panihapon, ni Carl Heinrich Bloch, gigamit nga may pagtugot sa National Historic Museum sa Frederiksborg sa Hillerød, Denmark, dili mahimong pakopyahan; painting pinaagi ni Del Parson; paghulagway sa mga litrato pinaagi ni Edwin Redrino, Robert Milne, ug Christina Smith