Thomas S. Monson
Pagtubag sa Tawag sa Katungdanan
Kaniadto pa si Presidente Thomas S. Monson mipasalig nga tumanon ang iyang katungdanan sa buhat sa Ginoo ug mosunod sa ehemplo ni Jesukristo
Kadaghan si Presidente Thomas S. Monson misulti, “Ganahan ko sa pulong nga katungdanan.” Iya kining gikonsiderar nga “usa ka butang nga sagrado.”1 Agi og pagtuman sa iyang katungdanan isip ika-16 nga Presidente sa Simbahan ni Jesukristo sa mga Santos sa Ulahing mga Adlaw, siya miingon, “Akong itahan ang akong kinabuhi, ang akong kusog—ang tanan nga madalit kanako—sa pag-alagad [sa Ginoo] ug sa pagdumala sa mga kalihokan sa Iyang Simbahan pinasubay sa Iyang kabubut-on ug pinaagi sa Iyang pagdasig.”2
Nailhan sa iyang pagserbisyo sa uban, ihatag ni Presidente Monson ang iyang suit ug sapatos kon anaay buluhaton sa abroad ug mopauli nga naka-slacks ug tsinelas. Iyang nabatasan ang pagbisita sa mga higala ug kaila kinsa nanginahanglan og pagdasig. Siya nakapanalangin sa dili maihap na mga tawo diha sa mga ospital ug care center, misunod sa aghat sa pagtawag gamit ang telepono, ug kadaghan nga namulong sa mga haya. Siya nagpakaon, nanghatag og manok nga aslunon, ug mga libro nga may sulat sa pagka manggihunahunaon. Ang iyang eskedyul matag adlaw isip Presidente sa Simbahan napuno og mga miting ug sabut, apan kanunay siyang naggahin og panahon alang sa mga tawo—kasagaran sa tinagsa. Sa mga rekord sa kasaysayan sa Simbahan, siya maila sa iyang gugma sa katawhan ug sa iyang pagpakita nianang gugma pinaagi sa paggahin kanila sa iyang panahon.
Ang Ehemplo ni Jesukristo sa Katungdanan
Ang mga buhat ni Presidente Monson nadasig tungod sa iyang pagpamatuod sa Ginoong Jesukristo. Siya miingon: “Bisan kon mianhi Siya dinhi sa yuta isip Anak sa Dios, mapaubsanon Siya nga miserbisyo niadtong naglibut Kaniya. Mianhi Siya gikan sa langit aron mopuyo dinhi sa yuta isip mortal nga tawo ug motukod sa gingharian sa Dios. Ang Iyang mahimayaon nga ebanghelyo miusab sa panghunahuna sa kalibutan.”3 Ang Manluluwas mipahayag sa Iyang panabut sa katungdanan sa dihang Iyang gipahayag, “Ako mianhi dinhi sa kalibutan aron sa pagbuhat sa kabubut-on sa akong Amahan” (3 Nephi 27:13). Uban sa determinasyon ug kalumo tungod sa mahangturong panglantaw, Siya “nagpangadto-ngadto sa paghimog kaayohan, … kay ang Dios uban man kaniya” (Mga Buhat 10:38).
Si Presidente Monson naghatag og gibug-aton sa dihang anaa na ang katungdanan ni Jesus diha sa Tanaman sa Getsemani, Siya mitubag, “Amahan ko, kon mahimo man, isaylo lang kanako kining kopa: ngani, dili sumala sa akong pagbuot kondili sa imo” (Mateo 26:39). Ang Manluluwas nasayud ug mitubag kanunay sa Iyang katungdanan sa paggiya, pagbayaw, ug pag-awhag sa mga anak sa Iyang Amahan. Si Presidente Monson misulti kabahin niini: “Ang Manluluwas kanunay gayud aktibo ug bisi—nagtudlo, nagpamatuod, ug nagluwas sa uban. Ang samang gimbuhaton maoy atong indibidwal nga katungdanan isip mga sakop.”4
Nagkat-on sa Pagtuman sa Iyang Katungdanan
Si Presidente Monson nagdako sa Sixth-Seventh Ward sa Temple View Utah Stake. Didto siya nakakat-on sa iyang katungdanan sa pagtuman sa iyang mga buluhaton sa priesthood ubos sa giya sa maalamong mga lider sa priesthood, ug siya nakaangkon og kahibalo ug pagpamatuod sa ebanghelyo ni Jesukristo gikan sa dinasig nga mga lider.
Niadtong 1950 sa edad nga 22, si Thomas Spencer Monson gipaluyohan isip bishop sa Sixth-Seventh Ward. Iyang gigamit ang iyang nakat-unan ngadto sa nagtudlo kaniya sa kahulugan niini. Siya ang amahan sa ward, ang presidente sa Aaronic Priesthood, tigtabang sa kabus ug nanginahanglan, ang tighupot sa eksaktong mga rekord, ug ang gikauyonan nga maghuhukom sa Israel. Daghan ang iyang mga buluhaton, apan iya kining nahimo nga may positibong kinaiya.
Usa sa katungdanan sa bishop mao nga padalhan ang matag serviceman og Church News ug Improvement Era ug personal nga mosulat kaniya matag bulan. Tungod kay si Presidente Monson nakaserbisyo sa navy sa Ikaduhang Gubat sa Kalibutan, siya nasayud sa kaimportante sa sulat gikan sa panimalay. Siya adunay 23 ka mga miyembro sa ward nga nagserbisyo sa military, busa mitawag siya og usa ka sister sa ward sa pagdumala sa pagpadala niining mga sulat. Usa ka gabii gihatag ni Presidente Monson kaniya ang 23 ka mga sulat.
“Bishop, dili ka ba maluya?” nangutana siya.“Ania na usab laing sulat para kang Brother Bryson. Kini ang ika-17 nga sulat nga imong gipadala kaniya nga walay tubag.”
“Nan, tingali karong bulana,” siya miingon. Mao gyud ang nahitabo. Ang tubag gikan ni Brother Bryson mabasa: “Pinalanggang Bishop, dili ko kaayo mahilig sa pagsulat. Salamat sa Church News ug mga magasin, apan labaw sa tanan salamat sa imong personal nga mga sulat. Nausab nako karon. Naordinahan nako pagka-priest sa Aaronic Priesthood. Malipayon kaayo ko.”
Nakita ni Presidente Monson sa sulat ang praktikal nga paggamit sa sanglitanan “Buhata ang inyong katungdanan, kana ang pinakamaayo. Kay ang Ginoo motabang kaninyo.” Daghang tuig ang milabay, samtang nagtambong sa komperensya sa stake, siya namulong sa iyang kasinatian sa pagsulat ngadto sa mga servicemen. Human sa miting, usa ka batan-ong lalaki miduol kaniya ug nangutana, “Bishop, kahinumdom ka nako?”
Diha-diha dayon si Presidente Monson mitubag, “Brother Bryson! Kumusta ka? Kumusta ang imong pagsimba?”
Ang serviceman kaniadto mitubag uban sa dakong pasalamat nga siya maayo ra ug nagserbisyo sa elders quorum presidency. “Salamat usab sa imong kabalaka alang kanako ug sa personal nga mga sulat nga imong gipadala nga akong gibahandi.”5
Sa mga panghitabo sama niini, si Presidente Monson miingon: “Sa kasagaran ang gagmay nga mga buhat sa pagserbisyo mao ra ang gikinahanglan sa pagbayaw ug pagpanalangin sa uban: usa ka pangutana mahitungod sa pamilya sa tawo, mubo nga mga pulong sa pag-awhag, usa ka sinsero nga pagdayeg, usa ka gamay nga sulat sa pasalamat, mubo nga tawag sa telepono. Kon kita mapaniiron ug nakaamgo, ug kon kita mobuhat sa mga pag-aghat nga moabut kanato, kita makahimo og daghang kaayohan.”6
Pagkat-on sa Pagtuman sa Atong Katungdanan
“Samtang atong sundon ang mga lakang [ni Jesukristo] karon, kita usab adunay oportunidad sa pagpanalangin sa kinabuhi sa uban,” miingon si Presidente Monson. “Si Jesus nagdapit kanato sa paghalad sa atong kaugalingon: ‘Tan-awa, ang Ginoo nagkinahanglan sa kasingkasing ug usa ka andam nga hunahuna.’”7
Ang panglantaw sa atong propeta kabahin sa katungdanan nagkinahanglan og lapas pa sa personal nga ambisyon, kalampusan, kasayon, o kalipay nga makatabang ug makatubag sa kaayohan sa kadaghanan. “Sa pagkaplag og tinuod nga kalipay,” si Presidente Monson miingon, “kinahanglang dili nato hunahunaon ang atong kaugalingon. Walay tawo nga makakat-on sa kahulugan sa pagpakabuhi hangtud iyang unahon ang pagserbisyo sa uban. Ang pagserbisyo sa uban susama sa katungdanan, ang pagtuman niini makahatag og tinuod nga kalipay.”8
Siya nagtuo nga ang panaghigala makapasayon sa pagserbisyo sa uban. “Ang usa ka higala mas maghunahuna sa pagtabang sa katawhan kaysa dayegon,” siya miingon. “Ang usa ka higala moamuma. Ang usa ka higala mohigugma. Ang usa ka higala maminaw. Ug ang usa ka higala motabang.”9
Daghang mga tuig ang milabay si Presidente Monson mitambong sa komperensya sa stake sa Star Valley, Wyoming, USA, aron sa pag-organisar og usab sa stake presidency. Apan sobra pa sa pagtuman niana nga katungdanan ang iyang gibuhat. Natandog niya ang kinabuhi niadtong tanan nga mitambong uban sa yanong pagpakita og gugma samtang iyang gi-release ang stake president, E. Francis Winters, kinsa nagserbisyo sulod sa 23 ka tuig.
Sa adlaw sa komperensya sa stake, napuno sa mga miyembro ang building. Ingon og ang matag usa miingon og “hilum nga salamat niining halangdon nga lider,” nga klarong nagbuhat sa iyang katungdanan uban iyang tibuok kalag. Sa pagbarug ni Presidente Monson aron mamulong, iyang gisulti ang gidugayon nga si Presidente Winters nangulo sa stake ug nahimong “mahangturong haligi sa kalig-on sa tanang anaa sa walog.” Dayon siya nadasig sa pagbuhat og usa ka butang nga wala pa niya buhata sukad. Iyang gihangyo ang tanan nga natandog sa kinabuhi ni Presidente Winter nga mobarug. Makapahingangha ang resulta. Ang tanan mibarug.
Si Presidente Monson misulti sa kongregasyon, nga daghan ang naghilak, “Kining dako nga pundok nagpakita dili lang sa indibidwal nga mga pagbati apan sa pasalamat usab sa Dios alang sa maayong pagpuyo sa kinabuhi.”10
Ang Pagpamatuod sa Atong Propeta kabahin sa Katungdanan
Si Presidente Monson naghatag kanato niining makapadasig nga mga pagtulun-an kabahin sa katungdanan:
“Bisan unsa pa ang atong calling, dili igsapayan sa atong mga kahadlok o kabalaka, kita mag-ampo ug dayon moadto ug mobuhat, maghinumdom sa mga pulong sa Agalon, gani ang Ginoong Jesukristo, kinsa nagsaad, ‘Anaa ako kaninyo kanunay, bisan asa nga dapit sa yuta.’”11
“Makapalig-on kita sa usag usa; kita adunay kapasidad nga motagad niadtong wala matagad. Kon kita makabaton og mga mata nga molantaw, mga dalunggan nga makadungog, ug mga kasingkasing nga nasayud ug mobati, kita motabang ug moluwas niadtong kita may responsibilidad.”12
“Kita wala mag-inusara—diha sa atong siyudad, nasud, o sa atong kalibutan. Walay nag-ali sa atong kaabunda ug sa kalisud sa atong silingan.”13
“Adunay mga tiil nga kinahanglang tabangan, mga kamot nga alalayan, mga panghunahuna nga awhagon, mga kasingkasing nga dasigon ug mga kalag nga luwason.”14
“Tingali kon kita moatubang sa atong Tiglalang, kita dili pangutan-on, ‘Pila ka posisyon ang imong nahuptan,’ apan, ‘Pila ka mga tawo ang imong natabangan?’”15
“Samtang kita magpadayon sa atong matag adlaw nga kinabuhi, kita makakita og daghan mga oportunidad nga mosunod sa ehemplo sa Manluluwas. Kon ang atong kasingkasing nahisubay sa Iyang mga pagtulun-an, kita makadiskobre sa kaduol gayud sa Iyang balaanong tabang. Kini sama nga kita anaa sa buhat sa Ginoo; ug dayon kita makaamgo nga kon kita anaa sa buhat sa Ginoo, kita angay sa panabang sa Ginoo.”16
“Pinaagi sa pagkat-on kabahin Kaniya, sa pagtuo Kaniya, sa pagsunod Kaniya, adunay kapasidad nga mahimong sama Kaniya. Ang [atong] panagway mausab; [atong] kasingkasing mahumok; [atong] lakang mapas-pas; [atong] panglantaw molambo. Ang kinabuhi mahimong angay niining mamahimo.”17
Sama sa atong propeta, si Presidente Thomas S. Monson, kita makapasalig nga tumanon ang atong katungdanan sa buhat sa Ginoo ug mosunod sa ehemplo ni Jesukristo.
Gikan sa ibabaw: Si Presidente Monson nagpakita og gugma sa mga tawo samtang siya nagkiglamano sa mga Boy Scouts, nagdawat og regalo (uban sa iyang asawa, si Frances), naggiya sa usa ka batang babaye sa groundbreaking, ug nagwara-wara sa iyang kamot ngadto sa kongregasyon sa kinatibuk-ang komperensya (uban sa iyang asawa).
Si Jesukristo nagtudlo sa sinagoga ug sa atabay. Siya mipanalangin sa gamayng mga bata ug mibanhaw sa anak nga babaye ni Jairo.
Samtang gihangyo ni Presidente Monson ang tanan nga natandog sa kinabuhi sa presidente sa stake nga mobarug, ang tanang anaa sa kongregasyon mibarug.
Sa wala: gilitratohan ni Craig Dimond; sa tuo, gikan sa ibabaw: gilitratohan pinaagi ni Jed A. Clark © IRI, Jeffrey Allred © Deseret News, © Deseret News, ug Christina Smith
Wala, gikan sa ibabaw: Kahayag ug Kamatuoran, ni Simon Dewey; Buhi nga Tubig, ni Simon Dewey; Barug ug Lakaw, ni Simon Dewey; painting pinaagi ni Dan Burr; sa tuo: Paghulagway pinaagi ni Paul Mann