Atong Luna
Ngano nga Adunay mga Pagsulay?
Sa bisan unsang mga panahon maghunahuna kita nganong may mga problema man ta bisan nagsunod kita sa mga sugo ug nagpakabuhi sa ebanghelyo. Dili gayud nato hikalimtan nga mianhi kita sa yuta aron masulayan. Kon malatasan nato ang mga pagsulay ug makapakita sa Langitnong Amahan nga Siya atong gihigugma pinaagi sa atong mga pagpili, kita Iyang panalanginan aron diha sa atong mga pamilya ang Espiritu sa Ginoo modumala.
Kahellyn V. (sa ubos), Venezuela
Katungdanan ngadto sa Dios
Nagtrabaho ko sa pagkompleto sa akong Ganti sa Katungdanan Ngadto sa Dios, bisan didto pa ko nagpuyo sa Venezuela ug sa dihang mibalhin ko kuyog sa akong pamilya ngadto sa China.
Ang programa nga Katungdanan ngadto sa Dios dinasig gayud. Ang usa ka batan-ong lalaki makakat-on og talagsaong mga butang nga magamit sa tibuok niyang kinabuhi pinaagi sa pagkompleto sa mga tumong diha niana nga programa. Makakat-on siya og espirituhanong mga butang, temporal nga mga butang, pisikal nga mga butang, ug daghan pa.
Tugbang gayud ang paningkamot sa pagpahinungod sa kaugalingon aron makompleto kini nga mga tumong. Nakakat-on ko nga mahimong mas maayo nga tawo, mitubo ang akong pagpamatuod sa ebanghelyo ni Jesukristo, ug akong naandam pag-ayo ang akong kaugalingon sa pagdawat sa Melchizedek Priesthood ug magserbisyo og usa ka misyon. Makalipay ang pagkasayud nga mahimo akong maayong ehemplo sa umaabut nakong mga anak.
Jonathan A., China
Ang Akong Paborito nga Kasulatan
Kini nga kasulatan naglig-on sa akong pagtuo tungod kay gipakita ni Nephi nga panahon sa mga pagsulay mituman gihapon siya ug mihimo sa gipabuhat kaniya sa Ginoo. Ug ang Langitnong Amahan mipanalangin kaniya tungod niana.
Kaila T. (sa ibabaw), Philippines
Personal nga Kauswagan
Niadtong Pebrero 27, 2011, nadawat nako ang Pasidungog sa Pagka-Batan-ong Babaye [Young Womanhood Recognition]. Nalipay ko nga nakompleto nako ang programa sa Personal nga Kauswagan, nga kanunay kong putli ug limpyo, ug makasul-ob ko sa akong medalyon uban sa garbo. Nahibalo ko nga ang organisasyon sa Young Women nagtabang kanamo nga molambo ug maandam ang kaugalingon alang sa kaminyoon sa balaan nga templo. Mapasalamaton ko sa akong Langitnong Amahan tungod niini nga organisasyon. Sa pagkadawat sa akong medalyon, nakompleto nako ang usa sa akong mga tumong, ug nahibalo ko nga makapadayon ko sa paghimo og mas maayo pa sa buluhaton sa Ginoo.
Katherine M., Venezuela
Pagpangita og usa ka Personal nga Pagpamatuod
Natawo ko sa Simbahan, ug gamay ra ang akong pagpamatuod hangtud nga gisugdan nako sa pagbasa ang mga kasulatan uban sa tiunay nga katuyoan. Imbis mobasa lamang sa pulong nga naa sa papel, gisiksik pa gayud nako ang mga kahulugan niini. Gibasa nako ang 3 Nephi 11:3, ug akong gibutang ang akong kaugalingon sa ilang dapit. Kadto nga kasulatan ug ingon man ang nagsunod niini mituhop kanako. Sukad niadto nagsigi na ko og basa sa mga kasulatan ug nag-ampo nga tinuoray, ug mitubo ang akong pagpamatuod.
Ryan R., Washington, USA