O Dria to’u i‘oa, no te fenua Philipino

Mabuhay, Kaibigan!*

No roto mai i te hoê uiuiraa na Amie Jane Leavitt

Ua moemoea a‘enei outou ia ora i ni‘a i te hoê motu ? O Alejandria teie, e pii noa râ to’na utuafare e to’na mau hoa ia’na o Dria, no te haapoto. Te ora nei oia i ni‘a i te motu no Cebu i te fenua Philipino, e to’na mama, to’na papa e e piti tuahine. E tuaane to’na, ua pohe râ na mua i te fanauraa o Dria. « Ua ite au e, tei roto noa oia i to matou utuafare, e e ite ihoa vau ia’na i te hoê mahana no te mea e mea mure ore te utuafare », ta’na ïa parau.

Hoê mea ta’u e au roa nei, o te ori ïa. E ori au i te ori « ballet classique ». I teie matahiti i muri nei, maitai e, e raʻehia ia’u te faito « pointe », te ori i ni‘a i te muaraa o te tiaa. Te auraa ra, e tiaa taa ê ïa ta’u e oomo atu no te ori i ni‘a i to’u manimani avae.

Ua hau te 7 000 motu i te fenua Philipino, no reira, ua rau te mau vahi nehenehe e mata‘ita‘i atu. Tei te pae tahatai to matou fare, e e mea au na’u ia ha‘uti i roto i te miti. Hoê mea ta’u e au roa nei, o te ‘au ïa. Na’u iho i haapii !

E mea au na’u ia haere e to’u utuafare e tere mata‘ita‘i i te mau pae tahatai. I te hoê mahana, ua haere matou i Palawan—te hoê motu tei reira te tahora pape rahi roa a‘e o te ao nei na raro a‘e i te fenua. Ua hopu vau i ô e to’u titiʻa mata, e ua mata‘ita‘i au i te mau iʻa u rau.

I te hoê mahana i te haapiiraa, ua parau te tahi o to’u mau hoa e, aita te mau Momoni e ti‘aturi nei i te Atua. Ua parau vau ia ratou e, oia. I te mahana i muri iho, ua afaʻi au i te tahi mau tareta tei ni‘a iho te hoho‘a o Iesu e i muri mai, te vai ra te mau hiro‘a faaroo. I to to’u mau hoa hi‘oraa i te hoho‘a e to ratou tai‘oraa i te tahi o to tatou mau ti‘aturiraa, ua oaoa roa ratou i te iteraa e, te ti‘aturi nei tatou i te Atua.

E mea au na’u ia hi‘o i te hiero

Ua fanaʻo matou ia ora i piha‘i iho i te hiero no Cebu City Fenua Philipino. Ua fana‘o vau i te tere mata‘ita‘i i te hiero e to’u utuafare na mua to te reira haamoʻaraahia. E vahi nehenehe mau e te hau. Ua mauruuru vau no te mea, auaʻe te mau hiero, ua ti‘a i to’u utuafare ia ora tahoê e a muri noa’tu.