« E mea ohie roa ïa e papa û ! »
No roto mai i te a‘oraa no te amuiraa rahi no te ava‘e Eperera 2013.
Ua faaue mai te Fatu e : « Te imi nei outou i te parau i papa‘ihia ra, no te mea te mana‘o na outou e roaa te ora mure ore i reira : o te faaite ïa ia’u o taua mau parau ra ». (Ioane 5:39).
Ua here au i te Buka a Moromona e to’u Faaora, o Iesu Mesia. I te hoê mahana, ua ani au i ta’u mootua tamahine o Raquel, eaha to’na mana‘o ia tuu i te hoê fâ no te tai‘o i te Buka a Moromona. No haapii noa a‘e nei Raquel i te tai‘o.
« E papa û », ta’na ïa parau, « e mea paari roa. E buka me‘ume‘u ho‘i ».
Ani atura vau ia’na ia tai‘o mai i te hoê api. Rave mai nei au i te hoê uati e ua faito tetoni ia’na. Toru noa minuti to’na tai‘oraa i taua api ra.
Te Buka a Moromona ta matou e tai‘o nei, mea na roto ïa i te reo Paniola, e i roto i te Buka a Moromona reo Paniola, e 642 api. Ua parau vau ia’na, e 1 926 noa ïa minuti no te tai‘o i te buka taatoa.
Hau roa’tu paha ïa to’na taiâ, no reira ua tuha atura vau na 60 minuti. Ua parau atura vau ia’na, e 32 noa ïa hora no te tai‘o i te buka. Eita e ra‘ehia te hoê mahana e te afa !
Parau mai nei oia, « E mea ohie roa ïa e papa û ! »
I to ratou tai‘oraa i te Buka a Moromona, o Raquel, to’na taea‘e o Esteban e te tahi atoa o ta maua mau mootua, ua maoro rii a‘e ratou. Te tumu, no te mea ia tai‘o tatou i te reira, titauhia ia tatou ia rave i te tahi taime no te pure e no te feruri i te mau mea ta tatou i tai‘o.
Mai ia Raquel e o Esteban, e nehenehe ta tatou paatoa ia haapii ia here i te mau papa‘iraa mo‘a. Ei reira tatou e tuô ai ma te oaoa : « Aue te monamona ta oe parau ia amu! e momona rahi ïa to te reira i to te meli i to’u nei vaha ! » (Salamo 119:103).