Te faa’ite papû nei te mau ite taa ê no ni‘a i te Mesia Ora
Ua riro te mau melo no te Peresideniraa Matamua e no te Pŭpŭ no te Tino Ahuru Ma Piti Aposetolo ei mau peropheta, ei mau ite e ei mau heheu parau no teie nei tau, o te ti‘a nei ei mau « ite papû no te i‘oa no te Mesia i roto i te ao paatoa nei » (PH&PF 107:23) E no teie ti‘araa to ratou, e hopoi‘a na ratou ia faa’ite papû i te hanahana o Iesu Mesia e i Ta’na misioni ei Faaora e ei Taraehara no teie nei ao.
I roto i te mau faahitiraa i muri nei, te faa’ite nei teie mau taata ma’itihia e tonohia, i to ratou iteraa papû no te Taraehara, te Ti‘a-faahou-raa e te ora nei te Faaora.
O Iesu to tatou Taraehara
« Ma to’u aau atoa e to’u varua, te faateitei nei au i to’u reo no te faaite papû i roto i to’u ti‘araa ei ite taa ê e te parau nei au e, te ora nei te Atua. O Iesu Ta’na Tamaiti, te Fanau Tahi a te Metua i te tino nei. Oia to tatou Taraehara ; O Oia to tatou arai i mua i te Metua. O Oia o tei pohe i ni‘a i te satauro ei taraehara no ta tatou mau hara. Ua riro Oia ei oho matamua no te Ti‘a-faahou-raa. E no te mea ua pohe Oia, e ora faahou te mau taata atoa. ‘Auê ïa te oaoa ta teie nei parau e horo‘a mai: « Ua ite au e te ora nei to’u Faaora !’ » [« Ua ite Au te Ora nei To’u Fatu », Te mau Himene, no. 69] ».
Peresideni Thomas S. Monson, « Ua ite au te ora nei to’u Faaora ! » Ensign e aore râ Liahona, Me 2007, 25.
E ite au
« E ite au no te Ti‘a-faahou-raa o te Fatu mai te huru e, tei reira vau i te ahiahi i piha‘i iho i na pĭpĭ toopiti i roto i te fare i ni‘a i te e‘a no Emausa. Ua ite au e, te ora nei Oia mai ia Iosepha Semita atoa i ite na, a ite atu ai oia i te Metua e te Tamaiti i roto i te maramarama o te hoê po‘ipo‘i anaana i roto i te hoê uru raau i Palmyra…
« … Te faaite papû nei au i te reira ei ite no te Faaora tei ti‘a faahou e to tatou Taraehara ».
Peresideni Henry B. Eyring, Tauturu matamua i roto i te Peresideniraa Matamua, « E haere mai outou Ia’u nei », Ensign e aore râ Liahona, Me 2013, 25.
Te taraehara e te faaoraraa
« O te Atua te Metua te fatu no te evanelia ; e tuhaa tumu hoʻi te reira no te faanahoraa no te faaoraraa a te Atua e aore râ, te opuaraa no te faaoraraa. Ua piihia te reira te evanelia a Iesu Mesia no te mea na te taraehara a Iesu Mesia i faatupu i te taraehara e te faaoraraa. Na roto i te taraehara e faaorahia te taatoaraa o te mau tane, te mau vahine e te mau tamarii i te pohe tino, aita e titauraa no ta ratou iho mau hara mai te mea e farii e e haapa‘o ratou i te evanelia a Iesu Mesia…
« Te faa’ite papû nei au i te reira ma to’u aau e to’u mana‘o atoa i te i‘oa mo‘a no Iesu Mesia ».
Peresideni Dieter F. Uchtdorf, Tauturu piti i roto i te Peresideniraa Matamua, « Aita anei tatou i tano i te oaoaraa ? » Ensign e aore râ Liahona, Novema 2007, 19, 21.
O Iesu te Mesia
« Ua ite au e, te Atua to tatou Metua. Ua faaite mai Oia i Ta’na Tamaiti o Iesu Mesia ia Iosepha Semita ra. Te parau atu nei au ia outou e, ua ite au e, o Iesu te Mesia. Ua ite au e, te ora nei Oia. Ua fanauhia oia i te afa ti‘a o te tau. Ua haapii Oia i Ta’na evanelia e ua tamatahia oia. Ua mauiui Oia e ua faasataurohia e ua ti’afaahou i te toru o te mahana. Mai To’na Metua, e tino i‘o e te ivi To’na. Ua rave Oia i te Taraehara. E faaite papû vau No’na. E ite au No’na ».
Peresideni Boyd K. Packer, Peresideni no te Pŭpŭ no te Tino Ahuru Ma Piti Aposetolo, « Te Tino Ahuru Ma Piti », Ensign e aore râ Liahona, Me 2008, 87.
E hoo no te utuafare taata nei
« [O Iesu Mesia]te tumu o te faanahonahoraa mure ore a te Metua, te Faaora tei horo‘ahia mai ei hoo no te taata nei. Ua tono mai te Atua i Ta’na tamaiti here ia upooti‘a i ni‘a i te hi‘araa o Adamu e o Eva. Ua haere mai Oia i te fenua nei ei Faaora e ei Taraehara no tatou. Ua upooti‘a Oia i ni‘a i te pohe tino na roto i te horo‘araa i To’na iho ora. A pohe ai Oia i ni‘a i te satauro, ua faataa-ê-hia To’na varua i To’na tino. I te toru o te mahana, ua tahoê-faahou-hia To’na varua e To’na tino e a muri noa’tu, e ore roa e taa ê faahou ».
Elder L. Tom Perry no te Pŭpŭ no te Tino Ahuru Ma Piti Aposetolo, « Te fanahonahoraa no te faaoraraa », Ensign e aore râ Liahona, Novema 2006, 71.
Te ohipa tumu i roto i te aamu o te taata nei
« Ua ravehia te Taraehara a te [Faaora] i Gesetemane ra, i reira To’na hou i te tahe-rahi-raa, e toto pûtua roa tei tahe mai (hi‘o Luka 22:44), e i Golagota (e aore râ te Kalavary kerani), i reira To’na tino i te faauta-raa-hia i ni‘a i te satauro i te « vairaa apu upoo » ra, te faaauraa no te pohe (Mareko 15:22; Mataio 27:33; hi‘o atoa 3 Nephi 27:14). Na teie Taraehara mure ore e faaora i te taata nei mai te mure ore o te pohe nei (hi‘o 2 Nephi 9:7). Na roto i te Taraehara a te Faaora ua riro atura te ti‘a-faahou-raa ei ohipa papû e te ora mure ore ei rave‘a matara i te taatoaraa. Ua riro atura te Taraehara ei ohipa tumu i roto i te aamu o te taata nei ».
Elder Russell M. Nelson no te Pŭpŭ no te Tino Ahuru Ma Piti Aposetolo, « The Peace and Joy of Knowing the Savior Lives », Ensign, Titema 2011, 20; Liahona, Titema 2011, 22.
Ei tusia no te hara
« Ua faaruru Iesu Mesia i te mauiui faito ore no te faariro Ia’na iho ei tusia no te mau hara a te taata atoa. Na taua tusia ra i pûpû i te maitai hopea—te Mamoe viivii ore e te ino ore—no te faito hoê roa o te ino—te mau hara a te ao taatoa nei…
« Taua tusia ra—te Taraehara a Iesu Mesia—o te ohipa tumu ïa o te opuaraa no te faaoraraa…
« Ua ite au e, o Iesu Mesia te Tamaiti Fanau Tahi a te Atua te Metua Mure Ore. Ua ite au e, na roto i Ta’na tusia taraehara, i ite ai tatou e, e farii tatou i te tahuti ore e te rave‘a e roaa ai te ora mure ore. O Oia to tatou Fatu, to tatou Faaora, e to tatou Arai ».
Elder Dallin H. Oaks no te Pŭpŭ no te Tino Ahuru Ma Piti Aposetolo, « Tusia », Ensign e aore râ Liahona, Me 2012, 19, 22.
Te arata‘i nei te Faaora i Ta’na Ekalesia i teie tau
« Ua riro te Taraehara a Iesu Mesia ei tuhaa faufaa rahi i roto i te faanahoraa a te Metua no te misioni a Ta’na Tamaiti i niʻa i te fenua nei, e no to tatou atoa faaoraraa. Auê to tatou mauruuru rahi i to tatou Metua i te Ao ra, Oia i ore i faaô mai Ia’na, ua tapeʻa râ oia i To’na aroha metua ia faaora i Ta’na Tamaiti Here. No To’na here mure ore ia outou e ia’u nei, ua faatiʻa Oia ia rave faaoti roa Iesu i Ta’na misioni tei faataa-atea-hia ei Faaora no tatou nei…
« Aita Iesu Mesia, Te Faaora e te Taraehara o te taata nei i pohe. Te ora nei Oia—te ora nei teTamaiti tiʻa-faahou a te Atua—to’u ïa iteraa papû, e te faatere nei oia i te mau ohipa o Ta’na Ekalesia i teie mahana ».
Elder M. Russell Ballard no te Pŭpŭ no te Tino Ahuru Ma Piti Aposetolo, « Te taraehara e te faufaa o te varua o te hoê taata », Ensign e aore râ Liahona, Me 2004, 85, 86.
Ta tatou Ti‘aturiraa, to tatou Arai, to tatou Faaora.
« Tei roto to tatou parururaa i [to tatou Metua i te Ao ra] e i Ta’na Tamaiti Here, o Iesu Mesia. Ua ite au e, ua here te Faaora ia outou. E haapapû Oia i to outou iteraa papû, ia riro te reira ei mana maitai roa aʻe i roto i to outou oraraa, e mana no te tauturu ia outou i te mau taime atoa, e e mana no te hau i roto i te mau taime fifi.
« Ei hoê o Ta’na mau Aposetolo, faatiahia ia parau i te iteraa papû No’na ra, te haapapû maitai atu nei au e ua ite au e te ora nei te Faaora, e ua ti’afaahou mai Oia, e taata hanahana e te here mau. O Oia to tatou ti‘aturiraa, to tatou Arai, to tatou Faaora ».
Elder Richard G. Scott no te Pŭpŭ no te Tino Ahuru Ma Piti Aposetolo, « Te Mana o te Hoê Iteraa Papû Puai », Ensign, Novema 2001, 89; Liahona, Tenuare 2002, 103.
Inu i te au‘a maramara
« I roto i te Ô no Getesemane, aita to tatou Faaora e to tatou Taraehara i oriorio i te inuraa i te au‘a maramara no te Taraehara. [hi‘o PH&PF 19:16–19]. E i ni‘a i te satauro, ua mamae faahou Oia no te rave i te hinaaro o To’na Metua, e tae roa i te taime ua ti‘a Ia’na ia parau e, ‘Ua oti’ [Ioane 19:30]. Ua faaoroma‘i Oia e tae noa’tu i te hopea. Ei pahonoraa i te haapa‘o maitai hope o te Faaora e i To’na ti‘a-mau-papû-raa, ua faaite to tatou Metua i te Ao ra e, ‘Inaha, o tau Tamaiti here, ua mauruuru roa vau ia’na, ua haamaitai hoi au i to’u i‘oa ia’na’ [3 Nephi 11:7]
« … E faahanahana na tatou i te i‘oa o te Atua na roto i te ti‘a-mau-papû-raa e to tatou Faaora, o Iesu Mesia. Te faaite nei au i to’u iteraa taa ê e, te ora nei Oia ».
Elder Robert D. Hales no te Pŭpŭ no te Tino Ahuru Ma Piti Aposetolo, « Ti‘a mau papû i te mau vahi mo‘a ra », Ensign e aore râ Liahona, Me 2013, 51.
Te Tamaiti Fanau Tahi maitai roa a te Atua
« Ua ite au i te mau taime atoa e i te mau huru atoa e o te Atua to tatou Metua here i te Ao ra. Ua ite au e o Iesu ana‘e iho Ta’na Tamaiti Fanau Tahi maitai roa, tei horo‘a ma te here i To’na ora ma te hinaaro o te Metua e te Tamaiti iho no te faaoraraa i te taata atoa e ere ho‘i i te mea maitai roa. Ua ite au e ua Ti‘a mai Oia mai taua pohe mai ra ia ora faahou, e no te mea ho‘i e, ua na reira Oia, e na reira atoa ïa tatou ».
Elder Jeffrey R. Holland no te Pŭpŭ no te Tino Ahuru Ma Piti Aposetolo, « E te Fatu, ua faaroo vau », Ensign e aore râ Liahona, Me 2013, 95.
Ua ite au e te ora nei te Faaora
« Te faaite nei au i to’u iteraa e to’u mauruuru no te tusia hopea ore e te mure ore o te Fatu o Iesu Mesia. Ua ite au e te ora nei te Faaora Ua ite au i To’na mana taraehara e i To’na mana faatupu, e te faaite papû nei au e, e mana mau teie na mana e piti, e e roaa te reira ia tatou tata‘itahi. Oia ïa, « i roto i te puai o te Fatu ra » e nehenehe ta tatou e rave e e upooti‘a ho‘i i ni‘a i te mau mea atoa a haere ai tatou i mua i roto i to tatou tere i te tahuti nei ».
Elder David A. Bednar no te Pŭpŭ no te Tino Ahuru Ma Piti Aposetolo, « Te taraehara e te tere o te tahuti nei », Ensign, Eperera 2012, 47; Liahona, Eperera 2012, 19.
Ua rave faaoti te Mesia i Ta’na misioni
« Ua rave [Te Faaora] i ni‘a Ia’na iho i te ‘hopoi‘a no te mau hara a te taata’ e ‘te mau mauiui ta Satane e nehenehe e ta‘iri’. [James E. Talmage, Jesus the Christ, 613]. Ua faaoroma’i Oia i te mau tamataraa haavare e te mau ohipa ri‘ari‘a hou To’na faasatauroraa. Ua hope roa te reira na roto i te Ti‘a-faahou-raa hanahana o te Mesia i te mahana no Pasa. Ua rave faaoti te Mesia i Ta’na misioni mo‘a ei Faaora e ei Taraehara. E ti‘afaahou tatou mai roto mai i te pohe e e amui-faahou-hia’tu to tatou mau varua i to tatou mau tino…
« Te faaite nei au i to’u iteraa papû ei aposetolo, te ora nei o Iesu Mesia e o Oia te Faaora e te Taraehara o te ao. Ua horo‘a mai oia i te e‘a e tae atu i te oaoa mau ».
Elder Quentin L. Cook no te Pŭpŭ no te Tino Ahuru Ma Piti Aposetolo, « E pee tatou ia Iesu Mesia », Ensign e aore râ Liahona, Me 2010, 83–84, 86.
Ua faaora te Faaora ia tatou i te hara
« Na te mamae o te Faaora i Getesemane e To’na mauiui oto i ni‘a i te satauro e faaora ia tatou i te hara na roto i te faati‘araa i te mau titauraa a te parau-ti‘a i ni‘a ia tatou. E faatae Oia i te aroha e te faaoreraa hara ia ratou o te tatarahapa. E faati‘a atoa te Taraehara i te tarahu a te parau-ti‘a ia tatou na roto i te rapaauraa e te faafaitoraa i te mau huru mauiui atoa ta tatou i farii ma te hapa ore. ‘Inaha ho‘i, ua faaoroma‘i oia i te mauiui o te taata atoa, oia ïa, te mauiui o te mau taata atoa, te mau tane atoa, e te mau vahine atoa, e te mau tamarii atoa ho‘i, i roto i te fetii o Adamu ra’ (2 Nephi 9:21 ; hi‘o atoa Alama 7:11–12)…
« … Tei roto ia Iesu Mesia e Ia’na ana‘e te faaoraraa hopea. Te faaite papû nei au ma te haehaa e te mauruuru e, o Oia te Faaora ».
Elder D. Todd Christofferson no te Pŭpŭ no te Tino Ahuru Ma Piti Aposetolo, « Faaoraraa », Ensign e aore râ Liahona, Me 2013, 110, 112.
Te Ti‘a-faahou-raa e te Ora
« I ni‘a i te mau mea atoa e poro tatou i te parau no to tatou Faaora e te Ora, o Iesu Mesia. To tatou huru i teie nei—to tatou huru arauaʻe—Ona ïa te tumu…
« Ua atutu Ta’na mau parau i roto i te mau tenetere :
« Tei ia’u te ti‘a-faahou-raa e te ora, o te faaroo mai ia’u ra, pohe noâ oia ra e ora â ïa :
« ’E te taata ora atoa nei e faaroo ia’u ra, e ore roa’tu ïa e pohe’ (Ioane 11:25–26).
« E te mau taea‘e e te mau tuahine, te ora nei Oia. Ua ti‘afaahou mai Oia. Te arata‘i nei Oia i Ta’na ohipa mo‘a i ni‘a i te fenua nei ».
Elder Neil L. Andersen no te Pŭpŭ no te Tino Ahuru Ma Piti Aposetolo, « Haere mai Ia’na ra », Ensign e aore râ Liahona, Me 2009, 80.