Ite mai i te ti‘aturiraa i roto i to tatou ananahi

Na Stan Pugsley

Te ora nei te taata papaʻi i Arizona, te mau Hau Amui no Marite.

Na te mataʻi i taʻiri e i haamataʻu ia matou, i ueue atoa i te mau huero no te tauiraa e te tupuraa.

I te 12 no setepa 2001, tei ô maua ta’u vahine i te fare maʻi no Tucson, Arizona, te mau Hau Amui no Marite, e te overe noa ra maua e tau hora no te tia’i ia fanau mai ta maua aiu tamaiti. I ni‘a i ta maua afata teata e te mau afata teata atoa o teie fare maʻi, ua puʻe noa te mau hoho‘a no te mahana na mua’tu i New York—te hoho‘a o na pare e piti e ti‘a teitei nei i roto i te reva o teie oire, tei marua e huʻahuʻa repo roa’tu ra. No taua mau hoho‘a ra tei patahia, i te mau hora atoa, ua huru taiâ roa maua. Mai te huru ra e, o te taime ino roa a‘e te reira no te faatae mai i te hoê aiu i ni‘a i te fenua nei—e ao poiri e te haamataʻu.

Poʻipoʻi a‘e, i te aahiata, ua fanau ta maua aiu. Te tape‘a ra vau i ta maua aiu iti, e ua feruri au i te mau ohipa ino tei tupu i te mau mahana na mua’tu, e mau ohipa tei faahoʻi ia’u i te auahi rahi i te vahi ra Yellowstone National Park i te matahiti 1988. E 323 750 ta uru raau tei nina-roa-hia e te auahi. E au e, ua ano-roa-hia teie vahi. Te faaite ra te mau hoho‘a apî i te fenua oriorio e te au auahi ereere i roto i te reva. Aore e ohipa ta te taata e nehenehe e rave no te faahoʻi oioi mai i teie pau. E au e, eita atoa te tupuraa tamau e te itoito o te natura e nehenehe e aro i teie mana haamou o te auahi.

Atira noa’tu, i te tau faatupuraa raau i muri iho, ua tupu mai te hoê semeio marû—ua haamata te mau raau rii e te mau tiare i te oteo mai na raro mai i teie repo tei ama i te auahi. E haere noa e, ua tupu rahi faahou mai te mau tiare e te mau raau rii e te mau tumu raau i ni‘a i te fenua. Ua fanau marû faahou mai teie vahi e ua î i te mau mea rii iti e te hanahana, e i te hopea, e ohipa maere mau tei tupu.

I roto i te mau taime haamataʻu, te mau taime e haapau nei ia tatou mai te auahi ura i Yellowstone, ia raʻe to tatou faaroo e te ti‘aturiraa i to’na hopea roa, e ti‘a ia tatou ia haamana‘o e, te vai nei te hoê niu hau e te aueue ore i raro mai ia tatou, e niu mana rahi a‘e i te puai o te enemi ta tatou e faaruru atu. Te faataa nei Helamana e, taua niu ra o te « papa ïa o to tatou Ora, o te Mesia ïa, o te Tamaiti a te Atua ». Ia faatumu tatou ia tatou iho i ni‘a Ia’na, e « ia hapono mai te diabolo i to’na ra mataʻi uʻana, e ta’na mau ohe na roto i te puahiʻohiʻo, e ia ma’iri mai to’na ra ûa paari, e to’na vero rahi i ni‘a iho ia orua ra, e ere oia i te mana i ni‘a iho ia orua e putôhia’i orua i raro i te abuso, a mamae ai i te oto mure ore ra, no te papa pai ta orua i ti‘a i ni‘a ra, o te niu mau ïa ; o te tumu ia patuhia i ni‘a e te taata, e ore e ti‘a ia ma’iri ratou i raro » (Helamana 5:12).

Ia faaruru ana‘e tatou i te mau puai uʻana o te enemi e te mau faahemaraa o te ao nei, e mana‘o paha tatou e, ua hemo e ua neneʻihia te faaûruraa haʻihaʻi e te ohie o te evanelia. E feaa paha tatou ma te taiâ atoa a tia’i noa ai i te mau mea ino ia faaafarohia, te mauiui ia faaorehia e te mau uiraa ia pahonohia mai. Tera râ, te ueue nei teie mau mataʻi e taʻiri nei ia tatou i te mau huero no te tauiraa e te tupuraa, e te ohipa marû noa nei te mana rahi o te evanelia i raro a‘e i te repo o te oraraa tahuti, no te faaineine e tauasini huero no te ti‘aturiraa e te ora.