Parau poroʻi na te mau tuahine hahaere
Te misioni hanahana a Iesu Mesia : Te Faaora e te Taraehara
A tuatapapa na roto i te pure i teie materia ma te imi ia ite eaha te faaite atu. Nahea te maramaramaraa i te oraraa o te Faaora e i Ta’na misioni e faarahi ai i to outou faaroo Ia’na e e haamaitai ai i te feia ta outou e haapa‘o nei na roto i te tere hahaereraa ? No te mau haamaramaramaraa hau atu, a haere i ni‘a i te reliefsociety.lds.org.
Te Faaroo, Te Utuafare, Te Totauturu
I roto i te mau ti‘araa rahi roa a‘e e faaite ra ia Iesu Mesia, [te vai nei ïa] te ti‘araa… ei Faaora », ta Elder D. Todd Christofferson ïa no te Pŭpŭ no te Tino Ahuru Ma Piti Aposetolo i parau. « Te auraa o te ta‘o faaora, no te faaho‘i ïa i te hoê titauraa e aore râ te hoê tarahu. Te auraa atoa o te ta‘o faaora o te horo‘araa ïa i te ora e aore râ te faatiʻamâraa na roto i te aufauraa i te hoê tino moni. … Te faataa nei teie mau auraa tata‘itahi i te mau hi‘oraa taa ê o te faaoraraa rahi tei ravehia e Iesu Mesia na roto i Ta’na Taraehara, oia ho‘i, mai te au i te mau parau a te titionare, ‘no te faaora i te hara e i te mau oto, na roto ra i te faatusiaraa e ravehia no te taata hara’ ».1
Ua parau te tuahine Linda K. Burton, peresideni rahi no te Sotaiete Tauturu : « Ua tae roa [i to tatou Metua i te Ao ra] i te tono mai i Ta’na Tamaiti Fanau Tahi e te maitai roa ho‘i no te mamae no ta tatou mau hara, no te mauiui o to tatou aau, e no te mau mea maitai ore atoa i roto i to tatou oraraa.
« … Ua parau te hoê vahine, ma te ta‘i, tei faaruru i te tamataraa e te oto e rave rahi matahiti, ‘ua ite au i teie nei e, e au vau mai te hoê moni parau tahito e 20 tara marite—ua mi‘omi‘o, ua mahaehae, ua repo, ua ino roa, e hitoretore roa. Tera râ, e moni parau noa hoa vau e 20 tara marite’. Ua ite teie tuahine… no to’na faufaa i mua [i te Atua] ua tono mai Oia i Ta’na Tamaiti ia pohe tusia no’na, ei taata hoê. E mea ti‘a ia ite te mau tuahine atoa o te Ekalesia i te mea ta teie tuahine i ite ».2
No roto mai i te mau papaʻiraa moʻa
No roto mai i to tatou aamu
Tei roto i te Faufaa Apî te aamu no te mau vahine tei faaʻohipa i te faaroo ia Iesu Mesia, tei haapii e tei ora i Ta’na mau haapiiraa, e tei faaʻite i to ratou iteraa papû no ni‘a i Ta’na ohipa, Ta’na mau semeio e To’na hanahana.
Ua parau Iesu i te vahine i te apoo pape e :
« Area te inu i te pape e horo‘a hia’tu e au nei, e ore roa ïa oia e po‘iha faahou, e riro râ taua pape e horo‘a hia’tu e au na’na ra, ei pape pihaa i roto ia’na iho, e ti‘a i te pihaa raa e tae noa’tu i te ora mure ore ra.
« Ua parau maira taua vahine ra ia’na, e te Fatu, ho mai na i taua pape ra na’u…
« Ua ite au e, te haere mai na te Mesia (o te Cheriti ra ïa,) e ia tae mai oie na’na ia e faa ite mai ia matou i te mau parau atoa ra.
« Ua parau atura Iesua ia’na, O vau ïa e parau atu ia oe na ».
« Vaiiho ihora [oia] i ta’na farii pape » e ua faa’ite atura No’na i roto i te oire. (Hi‘o Ioane 4:6–30.)