Tatou te rima o te Fatu
Ua riro te imiraa i te feia veve e te taviniraa i te feia e mauiui ra ei tuhaa faufaa rahi no te auraa e te riroraa ei pĭpĭ na Iesu Mesia.
I te mau mahana matamua roa no te Topatari Rahi, ua amui e ono peresideni tĭtĭ no te afaa no Roto Miti no te arai i te mau ata haapoiri no te veveraa e te poʻia, o te haamataʻu ra ia taʻiri e rave rahi melo o te Ekalesia.1 Ua haamauiui teie ati i te pae no te haapa‘oraa faufaa i te mau vahi atoa, teie râ, i Utah, e mea ino roa ïa.2
I tera ra tau, e mea iti roa te rave‘a a te feia faatere o te Ekalesia no te tauturu i te feia i roto i te ati. Parau mau, e nehenehe ihoa ïa ta ratou e faa‘ohipa i te ô haapaeraa maa, aita râ e faaauraa i te aniraa tamau i vai noa na. I raro a‘e i te faatereraa a te Episekoporaa Faatere Rahi, ua haamauhia te hoê piha toroʻa no te ohipa, te Deseret Employment Bureau, i te omuaraa o te mau matahiti 1900. Aita râ te reira i navaʻi roa i te rave‘a no te pahono i teie aniraa teimaha.
Ua ite teie na feia faatere e ono e, ahiri noa’tu e titauhia ia tauturu i te melo o ta ratou mau tĭtĭ, eita e nehenehe e tia’i. Titauhia ia ratou ia faaoti oioi i te ohipa e rave. Ua omua ratou na roto i te faaraveraa i te taata i te ohipa. Ua faanaho ratou i te mau tane ma te tono ia ratou i roto i te faaapu no te ooti mai. Ei haamauruururaa no ta ratou ohipa, ua horo‘a hua’tu te mau ona faaapu i te tahi maa i teie mau tane. E ia rahi roa ana‘e te maa, e hopoihia te reira i hoê fare haaputuraa, i reira e operehia ai i te tahi atu puʻeraa e poʻia ra. No te mea te rahi noa’tu ra te mau ô, ua haamata te Feia Mo‘a i te tapunu i te maa no te faaherehere i te reira. Tera ïa te haamataraa o te faanahoraa totauturu mai tei mâtauhia i teie mau mahana.
E va’u ahuru matahiti i muri iho, i teie anotau, te haapa‘o nei te feia faatere o te Ekalesia na te ao atoa nei i ta ratou amuiraa ma te tape‘a noa i teie mana‘o rahi ia toro i te rima i te feia i roto i te ati.
No niʻa i te reira, ua parau te peresideni Dieter F. Uchtdorf, tauturu piti i roto i te Peresideniraa Matamua : « E mea pinepine roa tatou i te ite i te mau mea e hinaarohia ati a‘e ia tatou, ma te ti‘aturi e, e fâ mai te hoê taata manamana na te atea mai no te pahono i taua mau hinaaro ra. Te tia’i ra paha tatou i te feia ite aravihi no te tatara i te mau fifi papû maitai. Ia na reira tatou, te faaere ra ïa tatou i to tatou taata tupu i te taviniraa ta tatou e nehenehe e rave, e te faaere ra ïa tatou ia tatou iho i te rave‘a ia tavini. Aita [i hape te mana‘o ia titau i] te feia aravihi, [ia haamana‘o atoa râ tatou e] : eita e nava‘i te feia aravihi no te tatara i te mau fifi atoa. Ua tuu mai râ te Fatu i Ta’na autahu‘araa e ta’na faanahoraa i mua i to tatou mau opani i roto i te mau fenua atoa tei reira te Ekalesia i te faati‘araahia ».3
Na roto i teie piiraa i te feia faatere e i te mau melo o te Ekalesia ia rave i te ohipa mai tei faaûruhia e te Varua Maitai, ua arata‘ihia e rave rahi taata na te ao atoa nei, mai ta te peresideni Uchtdorf i parau, ia « [feruri ratou iho] i te reira ».4 Ua viri ratou i to ratou rima ahu ma te faaoti papû ia « haamana‘o i roto i te mau mea atoa i te feia veve e tei ere hoi, te feia maʻi e tei roohia ra i te ati » (PH&PF 52:40).
Equateur
Te hi‘o ra te episekopo Johnny Morante no Guayaquil, i Equateur, i te tahi mau melo o ta’na paroisa, teimaha a‘era to’na aau. Ua rahi roa hoʻi te mau utuafare e tafifi ra ia fana‘o i te mau mea matamua i roto i te oraraa. Ua hinaaro oia ia tauturu ia ratou, e no reira ua apoo oia e te feia faatere o te paroisa e ua hopoi i teie ohipa i mua i te Fatu.
No te varavara roa o te ohipa i tera vahi, ua haamata oia i te ohipa ona e 11 tuahine, ma te faaitoito ia ratou ia imi i te rave‘a no te hoê ohipa o ratou iho te paoti. Ua feruri teie mau tuahine i te hoê hinaaro e vai ra i to ratou vahi, te hinaaro no te tahi mea faito maitai e te moni mâmâ no te tamâ i te fare, e ua mana‘o atura ratou e, peneiaʻe e nehenehe ta ratou e hamani e e hoo atu ai i te reira i to ratou vahi. Nahea râ ratou i te haapii ia hamani i te reira mau mea ?
I tera ra tau, e tuahine no te paroisa ta te episekopo Morante i faaroo e, aita ta’na e ohipa e ua rave na mua a‘e i te ohipa ei taata hoo raau i roto i te hoê fare raau. I to teie na tuahine e 11 aniraa ia’na ia tauturu ia ratou, ua anaanatae roa teie tuahine i te haapiiraa ia ratou nahea i te hamani i teie mau mea no te tamâ i te fare, te tahi mau mea au e te faito maitai.
Ua faaineine ratou i ta ratou opuaraa tapihooraa, ua faataa i ni‘a i te hoho‘a fenua i te mau vahi ta tera e tera tuahine e haapa‘o atu, ua ma‘iti i te mau mea ta ratou e hamani e ua feruri i te vairaa e te hoho‘a o teie mau mea.
Maa avaʻe noa, ua oti ta ratou vahi hooraa e te navaʻi ra te faufaa no te tamărû i to ratou veve e no te tauturu i te mau hinaaro o te utuafare.
I to te tahi mau ona taiete hamani raau, i tera iho vahi, faarooraa no ni‘a i teie ohipa, ua ui maere ratou no ni‘a i te aamu o teie taata hamani raau tei ore i tihepuhia. E i te hopea, ua uiui ratou ia’na e ua tihepu roa mai ia’na i roto i ta ratou iho taiete.
Rusia
I roto i te paroisa no Rechnoy i Moscou, Rusia, ua hee o Galina Goncharova, te taata papa‘i aamu o te paroisa, i ni‘a i te tahi pape paari e ua fati roa to’na na rima e piti. Ua afaʻihia oia i te fare maʻi, e i reira, ua timahia to’na rima. Aita ta’na e nehenehe faahou e tamaa e e faaahu ia’na iho. Aita ta’na e nehenehe e pahere i to’na rouru e e pahono i te niuniu.
I to te mau melo o te paroisa faarooraa i te ohipa i tupu, oioi roa ratou i te tapaparaa’tu. Ua horo‘a te mau taea‘e o te autahu‘araa i te haamaitairaa no’na e ua ohipa atoa na muri i te mau tuahine o te Sotaiete Tauturu no te hamani i te tahi tarena hahaereraa i teie tuahine iti no te tauturu ia’na i roto i to’na mau hinaaro.
Ua parau o Vladimir Nechiporov, te taata faatere ohipa misionare no te paroisa, « Ua haamana‘o a‘era matou i te hoê aʻoraa tei horo‘ahia i roto i te hoê amuiraa rahi no ni‘a i te hoê tii no te Mesia tei ere i te rima.5 I raro noa mai i teie tii, ua tuu te tahi taata i te hoê papa‘iraa i te na ô raa e, ‘O outou to’u na rima’. No te maororaa o na hepetoma ua pêpê teie tuahine iti, ua faaau te mau melo no te paroisa no Rechnoy i teie aamu ia ratou. E au ihoa, o matou to’na na rima ».
Fenua Philipino
I te tereraa te mataʻi rorofaʻi Washi na ni‘a i te fenua Philipino i te matahiti 2011 ra, e diluvi tei taʻiri i te reira fenua i te mataʻi rahi. E 41 000 tiahapa fare tei parari e ua hau i te 1 200 taata tei faaruʻe roa mai.
Na mua mai i teie diluvi, ua puta mai te mana‘o i roto ia Max Saavedra, te peresideni o te tĭtĭ no Cagayan de Oro i te fenua Philipino, e faaineine i te hoê pŭpŭ no te mau ohipa ru. Ua faanaho oia i te tahi mau tomite e ta ratou tuhaa ohipa—te huru tautururaa atoa mai te maʻimiraa e te faaoraraa e tae noa’tu i te utuuturaa rû, te horo‘araa i te maa, te pape e te ahu.
I te roromaraa te pape i te hoê faito tano, ua haamata te feia faatere e te mau melo o te Ekalesia i ta ratou ohipa. Ua haapa‘o ratou i te maitai o te melo tata‘itahi ma te hi‘opo‘a atoa i te mau mea ino. Ua horo‘a mai te hoê melo i te tahi paʻepaʻe uaua no te haere na ni‘a i te pape e tie mai i te taata tei painu i te tahi atu mau vahi. Ua vai matara te mau fare pureraa no te haapuraa o te taata atoa tei ere i te maa, i te ahu, i te ahu taoto e i te vahi faaearaa. Te fifi rahi roa, o te pape mâ ïa, e no reira, ua taniuniu te peresideni Saavedra i te hoê taiete e pereoo tupohe auahi ta ratou, e na ratou i faauta mai i te pape mâ i te mau fare pureraa atoa tei faataahia ei vahi haapuraa. Ua amui atoa mai te mau melo e ite to ratou i te pae no te utuuturaa maʻi, no te tauturu i te feia pêpê.
Ia oti pauroa te mau melo i te haapa‘ohia, ua tere a‘era te peresideni Saavedra e ta’na pŭpŭ na te tahi atu mau vahi haapuraa o te oire no te tauturu atoa’tu. Ua afaʻi ratou i te maa e te tahi atoa mau tauihaa. E rave rahi melo, noa’tu â ua ere ratou i te fare, tei tavini ma te pipiri ore i te taata i muri noa mai i te vero. I te mauraa te ua e te marôraa te repo, ua haere te feia Rima Tauturu a te Momoni, no roto mai e toru tĭtĭ, e opere haere i te tahi mau tauihaa e e tauturu atoa i te tamâraa.
Beresiria
I roto i te oire no Sete Lagoas, i Beresiria, te vai nei te hoê fare no te mau vahine huma tei ino te oraraa i te mau raau taʻero. Aita e mahana aita e aroraa no te imi i te ora. E umu naʻinaʻi ta ratou no te hamani i te tahi faraoa rii, e 30 i te mahana hoê. Ua farii ihoa teie mau vahine i te tahi tauturu no roto mai i te pû tautururaa taata o te oire, aita râ i navaʻi roa no te faatamaa ia ratou. I to te feia faatere o te Ekalesia, no te tĭtĭ no Sete Lagoas, faarooraa i te parau no te hinaaro o teie mau vahine, ua hinaaro ratou e tauturu atu.
Ua paraparau ratou i teie mau vahine no ni‘a i to ratou mau hinaaro. Ua parau mai teie mau vahine e, ahani e nehenehe ta ratou e hamani faarahi faahou atu i te faraoa, e tamaa maitai a‘e ratou, e peneiaʻe e nehenehe ratou e hoo atoa’tu i te tahi faraoa ia apî mai i te tahi moni ta ratou e ere nei.
E ua ohipa te feia faatere e te mau melo o te Ekalesia i piha‘i iho i te mutoʻi faʻehau e i te tahi fare haapiiraa o te oire no te haamaitai atu â i te oraraa o teie mau vahine. Na roto i te ô tauturu i te ao nei a te Ekalesia e te feia tei horo‘a noa i to ratou taime, e melo no te Ekalesia e e taata no te oire, ua manuïa ratou i te hamaniraa i te hoê fare eu faraoa—roaa roa’tura i teie mau vahine ia hamani e 300 faraoa i te mahana hoê.
E na roto i te apî ta ratou i farii, ua roaa i teie mau vahine i te tihepu mai i ta ratou rave ohipa matamua roa—te hoê o te mau vahine i taua fare haapuraa ra.
Te ohipa totauturu
Mai teie mau feia faatere faaûruhia o te Ekalesia, e rave rahi ahuru matahiti i teie nei, tei ite i te hinaaro rahi na piha‘i iho ia ratou e tei ore i horo ê i teie hopoi‘a, te rave nei te feia faatere e te mau melo o te Ekalesia na te ao atoa nei i teie ohipa i to ratou iho vahi e ia au i ta ratou mau rave‘a.
I to te peresideni Uchtdorf paraparauraa i te Ekalesia no ni‘a i te aupururaa i te taata tupu, ua parau oia : « Te rave‘a a te Fatu, e ere ïa i te parahiraa i te hiti anavai a tia’i ai ia pau te pape i te tahe ei reira tatou e haere ai i te tahi pae. E amui râ tatou, e firi i to tatou rima ahu, e rave i te ohipa, e e hamani i te hoê araturu e aore râ, i te hoê poti no te tere na ni‘a iho i te pape o to tatou mau titauraa.6
Ua riro te imiraa i te feia veve e te taviniraa i te feia e mauiui ra ei tuhaa faufaa rahi no te auraa ia riro ei pĭpĭ na Iesu Mesia. Teie mau te ohipa ta Iesu Mesia iho i rave a tavini ai Oia i te taata i To’na tau. « Teie ohipa no te raveraa na roto i te rave‘a a te Fatu, e ere ïa i te tahi noa ohipa ê atu i roto i te tabula o te mau faanahoraa a te Ekalesia », ua opani te peresideni Uchtdorf. « Eita roa e ti‘a ia tau‘a-ore-hia e aore râ, ia tuuhia i te hiti. Tei ropu mau te reira i ta tatou haapiiraa tumu ; o te ora mau te reira o ta tatou haapa‘oraa ».7