Faatae i te mau haamaitairaa o te autahu‘araa i roto i to outou fare
Mai te mea e, e haapa‘o outou i ta outou mau fafauraa, te titau ra ïa outou i te mana o te autahu‘araa no te haamaitai i to outou fare e to outou utuafare.
Faahoho‘araa na Sudi MC Collum
Ei taure‘are‘a tamaroa e ei taure‘are‘a tamahine, noa’tu te huru o to outou oraraa, nahea e ti‘a ai ia outou ia titau i te mana o te mau fafauraa autahu‘araa o te bapetizoraa ta outou iho i rave no te haapuai i to outou fare e to outou utuafare ? Na te maramaramaraa i te ti‘araa e te faufaa o to tatou utuafare i roto i te faanahoraa a te Fatu, e faaûru ia tatou ia faatura i te mau parau fafau ta tatou i rave, e ta tatou taviniraa rahi roa a‘e, e ta tatou taviniraa anaanatae roa a‘e ia ravehia i roto i to tatou fare. E hi‘o na tatou i te tahi o te mau rave‘a no te titau i te mana o ta tatou mau fafauraa no te haapuai e no te tavini i te feia e taamuraa rahi to tatou ia ratou.
Nahea outou i te pahono ?
E pô monire teie, e ua rahi roa ino ta outou ohipa haapiiraa. Te faaroo ra outou i to outou metua tane ia pii mai i te utuafare no te haaputuputu no te pureraa pô utuafare. Eaha te rave ?
Ma’itiraa A : E pahono atu outou, « E papa, aita to’u taime no te reira i teie pô ! Ohipa haapiiraa ta’u ! »
Ma’itiraa B : Oioi outou i te haaputuputu mai i to outou mau taea‘e e tuahine, ei reira, e oaoa ai i te mau pure, te mau himene e te haapiiraa.
Ia vai ana‘e te arata‘iraa a te autahu‘araa i te fare
Ua riro te patururaa i to outou mau metua na roto i te amui-anaanatae-raa i roto i te pureraa pô utuafare, te pure utuafare e te tuatapaparaa papa‘iraa mo‘a ei mau rave‘a no te haapuai i te arata‘iraa a te autahu‘araa i roto i to outou fare. E rave rahi â rave‘a e vai ra, mai :
-
Te pureraa no to outou na metua (Papû ihoa paha te pure nei ratou no outou i te mahana tata‘itahi.)
-
Te patururaa i to outou na metua i roto i ta raua mau piiraa a te Ekalesia ma te tauturu atu ia ratou i te fare, i te taime ihoa râ ua rahi roa ta raua ohipa no te tahi tonoraa taa ê.
-
Te tautururaa i to outou na metua ia farii i te mau haapii utuafare ia haere mai ratou, ma te faaroo maite i ta ratou parau poroʻi.
-
Mai te peu te vai ra te hoê hiero i to outou vahi, a tuu i te mana‘o e haapa‘o outou i te mau teina, ia nehenehe i to outou na metua ia haere i te hiero e ia amui atu i roto i te mau oro‘a o te autahu‘araa.
A haamana‘o e, e ere na te mau metua noa te hopoi‘a ia titau e ia tape‘a noa i te Varua i to outou fare. E rave rahi mea ta outou e nehenehe e rave no te titau manihini i te Varua, na roto i ta outou mau ohipa e to outou huru. Te rave nei anei outou i ta outou tuhaa no te titau manihini i te faaûruraa a te Varua i roto i to outou fare ?
Aita ana‘e e arata‘iraa a te autahu‘araa i te fare
E mea taa ê te mau utuafare na reira atoa ta ratou faanahoraa. E utuafare metua otahi paha to outou e aore râ aita e taata e mau nei i te autahu‘araa no te peresideni i to outou fare. Te vai ra râ te tahi mau rave‘a e rave rahi no te titau manihini i te mana no te autahu‘araa no te haapuai ia outou e to outou utuafare. Teie te mau mea e ti‘a ia tatou paatoa ia rave, noa’tu te huru o to tatou oraraa :
-
Faatupu i ta outou iho pure, ta outou iho tuatapaparaa papa‘iraa mo‘a e ta outou iho haapaeraa maa. E tauturu mai teie mau tautooraa ia outou ia vai puai i te pae varua ma te titau manihini atoa i te Varua i roto i to outou oraraa e i rotopu i te mau taata e faaati nei ia outou.
-
Rave i te tahi taime no te faarahi i to outou piiraa e aore râ ta outou tuhaa ohipa i roto i te Ekalesia e ia faaineine ia outou no te mau haapiiraa i te sabati. Na te reira e tauturu ia outou ia faarahi i to outou ti‘aturiraa ia outou iho ma te faa’ite atoa i to outou paturu i te mau ohipa a te autahu‘araa.
-
Faatura i te mau melo atoa o to outou utuafare ma te paturu atoa i ta ratou mau faaoaoaraa au. E tauturu teie mau ma‘itiraa ia haapuai i te utuafare taatoa.
-
Faa’ite i to outou utuafare i te mau mea ta outou i haapii e i rave i roto i ta outou mau piha e mau pŭpŭ autahu‘araa a te Ekalesia. E rave‘a te reira no te afaʻi mai i te mau haapiiraa i to outou fare.
-
Imi i te tahi mau rave‘a no te tavini i te feia e faaati nei ia outou na roto i te tahi mau ohipa rii ohie e te maitai.
-
Tauturu na roto te raveraa i te mau ohipa i te fare e aore râ te tautururaa i te taea‘e e aore râ te tuahine.
-
Faa’ite i te here huru Mesia i to outou utuafare—tera mau te mea te riro i te tauturu rahi roa a‘e i te paturaa i te hoê utuafare puai, rahi atu i te tahi noa a‘e mea ê ta outou e nehenehe e rave.
Faatura i ta outou mau fafauraa
Na roto i te taviniraa, te hereraa e te haapuairaa i to tatou utuafare, te haapa‘o nei tatou i te mau fafauraa ta tatou i rave i te taime no te bapetizoraa ia ti‘a ei ite no Iesu Mesia, ia haapa‘o i Ta’na mau faaueraa e ia haapuai i te mau taata e faaati nei ia tatou. E nehenehe ta tatou ia titau i te puai o te mau fafauraa a te autahu‘araa ia riro mai ei hoê haamaitairaa e no te tauturu atoa i to tatou fare e te utuafare. Te autahu‘araa, te taviniraa, e te fare, e mau taʻo te reira e ti‘a ia vai tuʻati noa i roto i to tatou feruriraa, a muri noa’tu. E ti‘a i te mau melo o to tatou utuafare ia riro mai ei ohipa numera hoê roa no tatou a imi ai tatou i te tahi rave‘a no te amui atu i roto i te ohipa no te faaoraraa. Ia haapuai ana‘e tatou i to tatou utuafare, te haapuai atoa nei ïa tatou i te Ekalesia, to tatou oire e te ao atoa nei.