Uiraa e pahonoraa
« Eaha ta’u e ti‘a ia rave ia mahuta mai te hoê tumu parau i te haapiiraa e e tumu parau e pato‘i ra i te mau haapiiraa o te evanelia, mai te haamaruaraa tamarii ? »
E rave rahi rave‘a no te pahono—e aore râ no te ore e pahono—ia au i te taime. A tahi, a feruri e, eaha te tupu mai te mea e parau outou i te hoê mea e aore râ aita. Mai te mea e riro to outou vai-mû-raa ei tapa‘o no to outou mana‘o tuʻati i te hoê mea hape, e ti‘a paha ïa ia imi outou i te hoê rave‘a ohie no te faa’ite atu i to outou mana‘o tu ore. Mai te mea râ e riro ta outou mau parau i te faatupu i te mârôraa, peneiaʻe paha ïa e hi‘o outou i te tahi atu taime no te faa’ite i to outou mana‘o. Teie râ, mai te mea e mea faatura te mau piahi i roto i ta outou piha haapiiraa, e te ani ra to outou orometua haapii i to oe mana‘o, e nehenehe ta outou e pure no te faaûruraa ei reira e faataa atu ai i to outou mau mana‘o.
E nehenehe atoa ta outou e faaineine aʻena mai te mea ua ite outou e, e riro outou i te tauaparau i te hoê tumu parau taa ê i te haapiiraa. Te vai ra te mau papa‘iraa mo‘a e te mau aʻoraa no te amuiraa rahi no ni‘a i taua tumu parau ra, e e nehenehe atoa ta outou e hi‘o i te buka Mau Maite i te Faaroo : Hoê faahororaa no te Evanelia, e aore râ No te Puai o te Feia Apî. E nehenehe atoa ta outou e tamatamata ia faataa no ni‘a i teie tumu parau i roto i te pureraa pô utuafare. Ia ineine outou, no te paraparau atu i to outou orometua haapii e to outou mau hoa i te haapiiraa.
Nahea outou ia pahono, e eaha ta outou e parau, ua aifaito noa ïa to raua faufaa. A faatura i te taata e a tamata eiaha e faa‘ohipa i te mau taʻo a te Ekalesia. E painu to outou mau hoa haapiiraa ia parau atu outou, « Ua parau mai te tahi tauturu i roto i te Feia Apî Tamahine o ta’u paroisa e… »
Te mea faufaa rahi e ti‘a ia outou ia ite, o te mea ïa ta te Ekalesia i haapii e te mea ta te Varua Maitai e parau ia outou, ia ore outou e hahi ê na roto i te mau mea ta outou e faaroo atu e aore râ e tai‘o atu i roto i te piha.
A haamana‘o e ti‘a outou no vai
Ia faaû outou i teie huru ohipa, a haamana‘o e, mea ê rii paha te mana‘o o te tahi mau puʻeraa i to outou no ni‘a i te hoê tumu parau. Eiaha e faahaahaa e aore râ e faahepo, e paruru râ i to outou ti‘aturiraa. A haamana‘o e, e ti‘a outou no te Mesia.
Madeline K., 16 matahiti, Wyoming, te mau Hau Amui no Marite
Ia vai noa te peu maitai
I to’u mana‘o, e ti‘a ia’u ia faa’ite i to’u hi‘oraa na roto i te peu maitai ma te faataa atoa’tu no te aha vau e ti‘aturi ai i te reira. Aita vau e mana‘o nei e, titauhia ia farii roa mai te tahi mau puʻeraa i to’u mana‘o, te mana‘o nei râ vau e, e ti‘a ia ratou ia ite tei hea to’u vairaa no ni‘a i te tahi mau tumu parau e ia maramarama mai ratou i to’u hi‘oraa.
Sabrina S., 16 matahiti, Oregon, te mau Hau Amui no Marite
Ia faatura noa
E mea faufaa roa ia faaroohia mai tatou, e mea faufaa atoa râ ia faatura’tu tatou i to te tahi ti‘aturiraa. Eiaha e mârô. Na te mârôraa e faatupu mai i te enemi e te taa ore. Ia hiti noa mai te tahi mana‘o e patoʻi ra i ta tatou faaroo, ia vai hau noa, ia feruri maite e ia faatura noa i te taata, e eiaha ia moʻe ia faaroo i te Varua. Te vai nei te tahi mau mea ta te Atua e rave nei, aita tatou e maramarama roa nei. E ti‘a ia tatou ia faaroo e ia haapii mai roto mai i To’na Varua.
Hannah M., 18 matahiti, Utah, te mau Hau Amui no Marite
Faa’ite i te mea ta te Ekalesia e haapii nei
E tamata vau i te pahono i teie mau uiraa i te maitai roa a‘e o to’u aravihi, inaha, eita to’u mau hoa e te mau orometua haapii e maramarama mai maori râ, e parau atu vau eaha te vairaa o te Ekalesia no ni‘a i tera mau tumu parau. E na roto i te reira, ua taa atura ïa ia ratou i to’u vairaa ia hiti noa mai teie tumu parau, e e apî pae varua ta outou e farii mai. A haamana‘o : « Ia anaana ïa i mua i te aro o te taata nei, ia hi‘o ratou i ta outou parau maitai, e ia haamaitai i to outou Metua i te ao ra » (Mataio 5:16).
Joshua M., 16 matahiti, Manchester, Fenua Peretane
Tauturu i te tahi mau puʻeraa ia feruri i te mea ti‘a
E faa’ite i to outou mau mana‘o ma te haavare ore. E rave rahi mau tumu parau i te haapiiraa, mai te haamaruaraa tamarii, te tauaparau-rahi-hia nei, no reira, eiaha e haamâ ia parau atu. E rave‘a maitai te reira no te faa’ite i te evanelia e te mau faatureraa ta tatou e ti‘aturi nei. Ia faa’ite atu outou i to outou ti‘aturiraa, e nehenehe ta outou e tauturu i te mau taata ia feruri i te mea ti‘a.
Madison R., 14 matahiti, Carolina Apatoʻerau
Faaafaro i te haapiiraa tumu hape
Tei roto tatou i te hoê Ekalesia e au i te feruriraa misionare, e ua piihia tatou ia poro haere i te taata ; eita e nehenehe ta tatou e vaiiho i te haapiiraa hape ia parare. Ia tupu noa mai te reira huru ohipa, e ti‘a ia tatou ia haamama i te vaha no te faaafaro i te mau haapiiraa hape atoa e no te tauturu i te taata ia maramarama i te hi‘oraa no ni‘a i teie tumu parau ia au i te evanelia tei faaho‘i-faahou-hia mai.
David M., 16 matahiti, Kasaï-Occidental Province, Repupirita Faatereraa Au Manahune no Congo
Ia ite maitai i te vairaa o te Ekalesia
Tei roto vau i te hoê piha haapiiraa e paraparau-noa-hia teie mau tumu parau mana‘o rahi roa. Te ohipa matamua e rave, te faaturaraa ïa i to te tahi mana‘o, mai ia ratou atoa e faatura mai ia outou. Ia pato‘i roa ana’e te tumu parau i te mana‘o o te Ekalesia, eiaha e mataʻu, e parau atu i to outou mana‘o. Aita e titauhia ia outou ia faahiti i te parau no te Ekalesia i roto i ta outou pahonoraa. Teie râ, e haapapû e, ua ite maitai outou i te vairaa o te Ekalesia no ni‘a i te reira mau mea.
Joseph Z., 18 matahiti, Maryland, te mau Hau Amui no Marite
E haapae i te mârôraa
E faataa’tu vau i to’u hi‘oraa, ma te faa’ite i ta’u mau parau tumu e mau haapiiraa tumu o te Ekalesia, e ma te faatura i to te tahi mau mana‘o. Eita vau e mârô atu, e horo ê te Varua, na Ta’na faaûruraa hoʻi e nehenehe e faafaariu i te tahi mau puʻeraa i te hi‘oraa maitai.
Daiana V., 15 matahiti, Buenos Aires, Ra Parata