Te uputua e te eʻa

Te tuu nei te mau oroʻa e te mau fafauraa o te autahu‘araa ia tatou i niʻa i te eʻa o te ora mure, e na te reira atoa e haamaitai mai ia tatou i te puai tei titauhia, i teie nei.

Te imi pauroa nei tatou i te ora mure ore, oia hoʻi te faaoraraa e te faateiteiraa i roto i te faito teitei roa aʻe o te basileia tiretiera, i reira tatou e ora ai ei utuafare i mua i te aro o te Metua i te Ao ra.

Taa ê noa’tu te faaroo ia Iesu Mesia e te tatarahapa, te faati‘a nei te mau oro‘a e te mau fafauraa o te autahu‘araa ia tatou ia tomo i ni‘a i te eʻa e arata‘i nei i te ora mure ore. Noa’tu to outou taime tomoraa i ni‘a i teie eʻa e aore râ te vahi tei reira outou—noa’tu ua fanauhia outou i roto i te Ekalesia e aore râ ua faafariuhia outou i muri iho, noa’tu ua vai itoito noa outou i to outou oraraa taatoa e aore râ no hoʻi noa mai nei outou i roto i te Ekalesia—e nehenehe ta outou e haere i ni‘a i teie eʻa ia tutonu outou i ni‘a i ta outou mau fafauraa e te mea ta outou e nehenehe e rave no te farii e no te haapa‘o i te reira.

E e mea faufaa atoa ia ite e, eita te mau oro‘a e te mau fafauraa no te autahu‘araa e pûpû noa mai i te parau fafau no te hoê ananahi hanahana. Te horo‘a atoa nei te reira ia tatou i te puai, te tamahanahana e te patururaa e titauhia nei e tatou, i teie nei, no te pee i teie eʻa e no te faaoroma‘i i roto i te parau ti‘a e tae noa’tu i te hopea.

Te uputa

Te eʻa e arata‘i i te ora mure ore (faaoroma‘i e tae noa’tu i te hopea)

Hi‘o 2 Nephi 31

Te mau oro‘a e te mau fafauraa tumu

« Na te mana o te autahu‘araa i roto i te Ekalesia e faafana‘o i te mau oro‘a mo‘a e te mau fafauraa e taamu i te mau utuafare e e faati‘a atoa ho‘i ia tatou tata‘itahi ia ho‘i atu i te Atua te Metua e ia Iesu Mesia i roto i te basileia tiretiera. E hopoi mai teie mau oro‘a i te hau no te mea e mau fafauraa te reira i te Fatu ra ».

Elder Quentin L. Cook no te Pŭpŭ no te Tino Ahuru Ma Piti Aposetolo, « Te hau i roto ia tatou: Te utu‘a no te parau-ti‘a », Ensign e aore râ Liahona, Me 2013, 34.
- Bapetizoraa
- Te horo‘araa i te Varua Maitai
- Te horoʻaraa e te faatoro‘araa i te autahu‘araa (no te feia apî tamaroa)
- Oro‘a hiero
- Taatiraa hiero
Te mau oro‘a faaapî e te mau oro‘a haapuai

« A amui ti‘amâ ai outou i roto i te mau oro‘a o te autahu‘araa, e horo‘a mai te Fatu ia outou i te puai rahi a‘e, te hau [rahi a‘e] e te hi‘oraa mure ore [rahi a‘e].”

Elder Neil L. Andersen no te Pŭpŭ no te Tino Ahuru Ma Piti Aposetolo, « Te mana i roto i te autahu‘araa », Ensign e aore râ Liahona, Novema 2013, 95.
- Te oro‘a mo‘a—te faaapîraa i te fafauraa no te bapetizoraa, i te mau hepetoma atoa
- Te haamaitairaa patereareha—te arata‘iraa taa ê no te taata iho e te mau haamaitairaa fafauhia
- Te haamaitairaa i te feia maʻi—te tauturu e te faaoraraa i te maʻi
- Haamaitairaa a te metua tane e te tahi atu mau haamaitairaa tamahanahanaraa e parau-aʻo-raa—te hau e te arata‘iraa e titauhia

Te ora mure ore (te basileia tiretiera e te utuafare)

Te mau tautururaa i ni‘a i te eʻa

Te mau papa‘iraa moa—te arata‘iraa e te mau parau aʻo tei fariihia ei tuhaa no te fafauraa i rotopu i te Atua e To’na taata (hi‘o PH&PF 84:57)

Te pure— « Te pûpû nei [te Fatu] ia tatou i te fafauraa no te ‘haamana‘o noa Ia’na’ e te faaararaa ia ‘pure tamau noa’ ia tuu tatou i to tatou ti‘aturiraa i ni‘a Ia’na, to tatou paruru tootahi » (Peresideni Henry B. Eyring, tauturu matamua i roto i te Peresideniraa Matamua, « Always », Ensign, Atopa 1999, 9).

Te taviniraa—te rave-faaoti-raa i ta tatou mau fafauraa na roto i te taviniraa i te Atua e Ta’na mau tamarii, mai te mau piiraa, te ohipa hiero e te aamu utuafare, te faaiteraa i te evanelia, te taviniraa ei misionare rave tamau

Te tatarahapa—te haamanaʻoraa i ta tatou mau fafauraa e te haafatataraa i te Faaora, i te taime ua haere ê atu tatou, i te tahi mau taime, titauhia te tauturu a te feia faatere