Ny Vavahady sy ny Lalana

Ankoatra ny finoana an’i Jesoa Kristy sy ny fibebahana, ireo ôrdônansy sy fanekempihavanan’ny fisoronana dia mametraka antsika eo amin’ny lalana mankany amin’ny fiainana mandrakizay sy manome antsika ny hery ilaintsika amin’izao fotoana izao.

Isika rehetra dia mikatsaka ny fiainana mandrakizay, izay midika hoe voavonjy sy nasandratra amin’ny ambaratonga ambony indrindra ao amin’ny fanjakan’ny lanitra, izay toerana ahafahantsika miaina miaraka amin’ny fianakaviantsika eo anatrehan’ny Ray any an-danitra.

Ireo ôrdônansy sy fanekempihavanan’ny fisoronana dia mamela antsika hiditra amin’ilay lalana izay mitondra any amin’ny fiainana mandrakizay. Na oviana na oviana nidiranao tamin’io lalana io ary na aiza na aiza no misy anao eo amin’izany lalana izany—na teraka tao am-piangonana ianao na niova fo taty aoriana, na nazoto foana ianao nandritra ny fiainanao na vao niverina nazoto vao haingana—dia afaka mivoatra eo amin’izany lalana izany ianao rehefa mifantoka amin’ireo fanekempihavananao sy ny zavatra azonao atao mba handraisana sy hanajana azy ireny.

Ary zava-dehibe ny mahafantatra fa ireo ôrdônansy sy fanekempihavanan’ny fisoronana dia tsy manome fampanantenana hahazo ho avy feno voninahitra fotsiny ihany. Izy ireo koa dia manome ny tanjaka, sy fankaherezana, ary fanohanana izay ilaintsika amin’izao fotoana izao mba hahafahantsika manaraka ilay lalana sy maharitra hatramin’ny farany amim-pahamarinana.

Vavahady

Lalana mitondra mankany amin’ny fiainana mandrakizay (faharetana hatramin’ny farany)

Jereo ny 2 Nefia 31

Ireo Ôrdônansy sy Fanekempihavanana Ilaina

“Ny fahefan’ny fisoronana ao amin’ny Fiangonana no hanatanterahana ireo ôrdônansy sy fanekempihavanana masina izay mamehy ny fianakaviana sy mahatonga antsika tsirairay avy ho mendrika ny hiverina any amin’Andriamanitra, ilay Ray sy i Jesoa Kristy ao amin’ny fanjakana selestialy. Mitondra fiadanana ireo ôrdônansy ireo satria fanekempihavanana miaraka amin’ny Tompo izy ireo.”

Loholona Quentin L. Cook ao amin’ny Kôlejin’ny Apôstôly Roambinifolo, “Fiadanan’ny Tena Manokana: Valisoa avy amin’ny Fahamarinana,” Liahona, Mey 2013, 34.
- Batisa
- Fanomezana ny Fanahy Masina
- Fanomezana ny fisoronana sy fanendrena ho amin’ny fisoronana (ho an’ny ZATOVOLAHY)
- Fanafiana masina any amin’ny tempoly
- Famehezana any amin’ny tempoly
Fanavaozana sy Fanamafisana ireo Ôrdônansy

“Rehefa mandray anjara amim-pahamendrehana amin’ireo ôrdônansin’ny fisoronana ianao, dia hanome anao hery, sy fiadanana, ary fomba fijery mandrakizay bebe kokoa ny Tompo.”

Loholona Neil L. Andersen ao amin’ny Kôlejin’ny Apôstôly Roambinifolo, “Hery ao amin’ny Fisoronana,” Liahona, Nôv. 2013, 95.
- Fanasan’ny Tompo—fanavaozana isan-kerinandro ny fanekempihavanana tamin’ny batisa
- Tsodranon’ny patriarika—fitarihana miavaka ho an’ny tena manokana sy fitahiana nampanantenaina
- Tsodrano ho an’ny marary—fanampiana sy fanasitranana
- Tsodrano omen’ny raim-pianakaviana sy tsodrano hafa fankaherezana sy mifono torohevitra—fiadanam-po sy fitarihana rehefa ilaina izany

Fiainana mandrakizay (fanjakana selestialy miaraka amin’ny fianakaviana)

Fanampiana eny an-dalana

Soratra Masina—fitarihana sy torolalana raisina noho izy ampahany amin’ny fanekempihavanan’Andriamanitra sy ny vahoakany (jereo ny F&F 84:57)

Vavaka—“[Ilay Mpampianatra] dia manome antsika ny fanekempihavanana mba ‘hahatsiaro Azy mandrakariva’ sy ny fampitandremana mba ‘hivavaka mandrakariva’ mba hatokisantsika Azy, izay hany fiarovana ho antsika” (Filoha Henry B. Eyring, Mpanolotsaina Voalohany ao amin’ny Fiadidiana Voalohany, “Always,” Ensign, Ôkt. 1999, 9).

Asa fanompoana—fanatanterahana ny fanekempihavanantsika amin’ny fanompoana an’Andriamanitra sy ireo zanany, ka tafiditra ao anatin’izany ny antso, ny asan’ny tempoly sy ny tantaram-pianakaviana, ny fizarana ny filazantsara, ny asa fitoriana ny filazantsara amin’ny fotoana feno

Fibebahana—fahatsiarovana ireo fanekempihavanantsika sy fanakaikezana ny Mpamonjy rehefa nivily lalana isika, indraindray dia ahitana fanampiana avy amin’ireo mpitarika ao amin’ny fisoronana