Ia Malolosi ma Lototetele
Ata na tusia e Michael S. Parker
“Ua faasilasila mai e le ulu o leoleo a le peresitene o le a faia se tatou pati tele ona na matuai maoae lava a tatou faafiafiaga!” na alaga atu ai se tasi o leoleo.
Sa tatau ona ou fiafia, ae o le taimi lava na ou faalogo ai i le tala, sa amata ona ou tatalo. Sa ou iloaina o la matou faafiafiaga o le a avea ma se pati pia. Sa lava lou malosi faaleagaga e le inu ai, ae ou te lei manao i oʼu uso-a-leoleo e puapuagatia ona o au.
O tiute faamiliteli e faamalosia ai uma alii talavou o Korea i Saute, o lea na ou auai loa i le autau i le taimi lava na uma ai la’u misiona talai. Sa tofia au i le au leoleo a le peresitene. Na iloa e o’u uso-a-leoleo o le a ou le inuina lava soo se meainu malosi ona o au o se tagata o Le Ekalesia a Iesu Keriso o le Au Paia o Aso e Gata Ai. Ina ua fofogaina mai le pati, na amata ona popole i latou ona o le a latou pagatia pe afai ou te le inu pe a tuu mai e lo matou taitai le faatonuga e faia lena mea i le pati.
Sa i ai se tu masani faapea, i faafiafiaga o le a tulai le taitaiau i luma o leoleo taitasi, e auauai, ma faatumu le ipu malamalama a le leoleo i le ava malosi. Ona uu lea i luga e le leoleo o le ipu malamalama ma faapea atu, “Faafetai lava, lau susuga!” ma inu loa lava le ava malosi i le taimi lea.
I le olaga faamiliteli, o le le usitaia o soo se faatonuga mai se ofisa sinia o le tetee lea ma e mafai ona oo ai i se tulaga matuia e le gata mo le tagata le usitai, ae faapea foi mo tagata o lana vaega. I le tulaga sili ona leaga, o le tetee e mafai ona oo lava i le auina atu i le falepuipui, ma o le mea lea na faapopoleina ai o’u uso-a-leoleo.
Ua oo mai le aso o le pati, ma o i matou o leoleo e toa 10 sa saofafai faataamilo i le laulau. Sa tofu ma se ipu malamalama avanoa i ona luma. Sa ou nofo i le nofoa lona tolu. Na taunuu mai lo matou taitaiau ma faatumu le ipu malamalama muamua. Na sii i luga e le leoleo lana ipu ma faapea atu, “Faafetai lava, lau susuga!” Ona ia inu ai lea.
Na agai atu lo matou taitaiau i le leoleo lona lua ma toe faia faapea. Ona oo lea i lo’u taimi. Sa ou sauni e tausia le Upu o le Poto, ma sa ou tatalo pea i lo’u loto mo o’u uso-a-leoleo. Ina ua faatumulia e lo matou taitaiau la’u ipu malamalama, ma le leo tele sa ou fai atu, “Faafetai lava, lau susuga!” Sa faapea ou te fai atu ou te faatoese atu ae le mafai ona ou inu.
O le taimi lena, na ulu mai ai lana failautusi ma faapea atu, “Lau Susuga, o loo i ai se valaau mo oe.” Na faliu atu lo matou taitaiau ia te ia ma fai atu, “O loo ou pisi.”
Sa ou uuina pea le ipu malamalama ae faaopoopo mai le failautusi, “Lau Susuga, o le peresitene.” Sa tali atu lo matou taitaiau, “Oi, ua lelei,” ona ia vave aluese lea.
Na faafuasei lava ona fesuiai e le leoleo lona lua lana ipu malamalama avanoa ma laʼu ipu ma vave inu le ava malosi. E lei umi ae toe foi mai le taitaiau, na vaai i la’u ipu malamalama avanoa, ma fai mai, “Oi, ua uma ona e inu!” Ona ia agai atu lea i le leoleo lona fa. Sa manavanava loloa tagata uma ona to’a lea.
I le tolu sefulu-lima tausaga mulimuli ane, ua leva se taimi talu ona uma lo’u tiute i le militeli, na ou maua ai se telefoni mai se peresitene o le paranesi o le Ekalesia i Korea i Saute. Sa ia fesili mai pe o ou manatua se Mr. Park mai la’u auaunaga faamiliteli.
“Ioe ou te manatua,” sa ou tali atu ai. Sa ou auauna faatasi ma Mr. Park, ma sa ia faaaloalogia o’u talitonuga ma sa masani ona ia puipuia au i taimi faigata.
Na tuuina mai e le peresitene o le paranesi ia te au le numera o le telefoni a Mr. Park, ma na ou valaau ia te ia i le taimi lava lena. A o ou talanoa atu ia te ia, na tau mai e Mr. Park ia te au faapea i lo matou taimi faatasi o ni leoleo o le peresitene, na ia vaai i se malamalama o susulu mai ia te au, ma sa ia lagonaina e tatau ona fesoasoani ia te au. Mulimuli ane, soo se taimi lava e oo ai ia te ia se mea faigata, sa ia fai mai sa ia mafaufau ia te au.
Sa fai mai Mr. Park ia te au e i ai ni ona atalii se toalua e manao o ia ia avea faapei o au. Na ia ave foi ona atalii i le lotu i se falelotu o le Au Paia o Aso e Gata Ai. O se tasi o i laua ua papatisoina, e ui ina e lei papatiso Mr. Park. Peitai, o lena atalii e leo toe toaga. Sa manaomia e Mr. Park la’u fesoasoani ma le fautuaga.
Sa ou alu e vaai Mr. Park i se vaiaso mulimuli ane. Na manaia le ma talanoaga, ma e lei umi ae amata ona ou feiloai ma lona atalii ma faamalosiau ia te ia e toe foi mai i le Ekalesia. Sa ia taliaina la’u fautuaga ma le lotomaualalo, toe toaga, ma auauna atu i se misiona. Na ala mai i ana tusi i lona aiga a o auauna atu i se misiona, sa ia uunaia lona tama ma na fesoasoani e saunia o ia mo le papatisoga. I se aso o le taumafanafana i le tausaga na sosoo ai ma le ma asiasiga muamua, sa ou papatisoina Mr. Park o se tagata o le Ekalesia.
Oka o se vavega maoae! Sa suia o latou olaga ona o le faatuatua na faatinoina e se alii talavou i le 35 tausaga ua mavae.
Aloese mai Mailei ma Matasele
I le Feagaiga Tuai, na aoaoina e Iosua le fanauga a Isaraelu e uiga i mailei ma matasele o le a latou feagai a o nofo ai i se lalolagi amioleaga:
“Ia outou matua iloa e le toe tulia e Ieova lo outou Atua se isi o ia nuu i o outou luma; a e fai i latou ma mailei, ma matasele ia te outou, ma sasa i o outou itu, ma mea matuitui i o outou mata, seia faaumatia outou ai lenei nuu lelei ua foaiina atu e Ieova lo outou Atua ia te outou” (Iosua 23:13).
Ia te au, i le faalavelave semanu ou te faaoo i ou uso-a-leoleo o se mailei semanu e faaosoosoina ai au e inu le ava malosi. Ae peitai, sa ou filifilia le mea sa’o ma sa sauni e usitaia le Upu o le Poto e tusa lava po o a taunuuga.
Sa ou aoaoina mai ou aafiaga i le militeli o le a faamanuiaina ma puipuia e le Alii Lana fanau pe afai tatou te “faamalosi ma loto tele” (Iosua 1:6). Mo se faataitaiga, sa Ia puipuia le aiga o Isaraelu ina ua latou sopoia le Vaitafe o Ioritana. Ae muamua, o faitaulaga o e na tauaveina le atolaau o le feagaiga sa faaalia lo latou faatuatua ma le lototele e ala i le laa atu i totonu o le vaitafe o loo pa. Ona faatoa “vavaeeseina … le vai” e le Alii ma faia le vaitafe e “tu foi le vai e pei o se mea maupuepue” (tagai Iosua 3:13–17).
Ina ia “faamalosi ma loto tele,” e tatau ona tatou “pipii atu ia Ieova” (Iosua 1:6; 23:8). Tatou te pipii atu i le Alii a o tatou faia suesuega i tusitusiga paia a le tagata lava ia ma faaleaiga, tatalo faaletagata lava ia ma faaleaiga, ma afiafi faaleaiga. Tatou te pipii atu foi ia te Ia a o tatou fetagofi atu i le faamanatuga, faalautele o tatou valaauga, tapuai soo i le malumalu, usitai i poloaiga, ma salamo pe a tatou sese. O nei faatinoga e faatagaina ai le Agaga Paia ia mafuta ma i tatou ma fesoasoani ia i tatou ia iloa ma aloese mai mailei ma matasele.
“E amata a o tatou laiti lava, o e nafa ma le tausiga o i tatou e faavaeina taiala ma tulafono e faamautinoa ai lo tatou saogalemu,” na saunoa ai Peresitene Thomas S. Monson. “O le a faigofie atu le olaga mo i tatou uma pe afai tatou te usitaia atoatoa na tulafono. …
O le usiusitai o se uiga tupito lea o perofeta; ua latou maua ai le malosi ma le malamalama i le talafaasolopito atoa. E taua mo i tatou le iloaina tatou te agavaa foi i lenei puna o le malosi ma le malamalama. E faigofie ona avanoa ia i tatou taitoatasi i le asō pe a tatou usiusitai i poloaiga a le Atua.”1
Agai i Luma i le Faatuatua
E lei leva ona valaauina Peresitene Boyd K. Packer, Peresitene o le Korama a Aposetolo e Toasefululua, o se Pulega Aoao, sa ia alu atu ia Elder Harold B. Lee (1899–1973) mo se fautuaga. Na manatua e Peresitene Packer:
“Sa ia faalogo ma le totoa i lo’u faafitauli ma fautua mai ia ou alu e vaai Peresitene Tavita O. Makei [1873–1970]. Sa fautuaina au e Peresitene Makei i le itu e tatau ona ou alu ai. Sa ou matuai naunau lava e usiusitai ae sa leai se auala e mafai ai ona ou faia e pei ona sa ia fautuaina au e fai.
“Sa ou toe foi atu ia Elder Lee ma tau atu ia te ia ou te le o vaaia se ala e agai ai i le itu sa fautuaina ai au ou te alu i ai. Sa ia fai mai, ‘O le faalavelave o oe, o lena e te manao ia e iloa atu le taunuuga mai le amataga.’ Sa ou tali atu ou te fia iloa tau lava o se laasaga se tasi pe lua i luma atu. Ona oo mai lea o le lesona o le olaga atoa: ‘E tatau ona e aoao ia savali atu i le tausiusiuga o le malamalama, ona sosoo ai lea ma ni nai laa i le pogisa; ona mafai lea ona susulu mai le malamalama ma faaali mai le ala i ou luma atu.’”2
I le avea ai ma fanau a lo tatou Tama Faalelagi, o nisi taimi tatou te mananao e malamalama ai i faamatalaga auiliili o mea e tatau ona tatou taliaina, ma faataunuuina i le faatuatua. Ae peitai, tatou le manaomia ona malamalama i mea uma. Pau lava le mea tatou te faia o le laa i luma e pei ona fetalai mai ai le Alii ia i tatou e fai e pei o faitaulaga o le aiga o Isaraelu i le ulu atu i totonu o le Vaitafe o Ioritana o loo pa. E ui lava e le mafai ona tatou vaai pe malamalama i mea uma, o le a fesoasoani le Alii ia i tatou e savavali i le laueleele matutu, pe afai tatou te “malolosi ma lototetele.”
O le a tatou maua le mana e tutu malosi ai a o tatou ola i Ana upu—saili ma mulimuli i Lana taitaiga i tusitusiga paia ma mai Ana auauna. Ioe, o loo tatou ola “i le teritori a le fili,3 ae e le mafai ona manumalo le fili i le Alii, lo tatou Faaola, o le na auina mai e fesoasoani ia i tatou ma laveaiina i tatou.
Ou te iloa e mafai ona avea i tatou ma soo moni o Iesu Keriso e “tutu malolosi ma usiusitai i aoaoga faavae a lo tatou Atua.”4 A o tatou faatinoina le lototele e faia lena mea, ua tatou tutu i nofoaga paia, e tusa lava po o fea o tatou i ai.