O Tatou Aiga, O Tatou Auaiga
Tatou te Iloa le Mea o loo i ai o Ia
E alala le tusitala i Kolomupia.
O le tatou tulimatai atu i le avea ai ma se aiga e faavavau o le a faatotonugalemuina i le Atua.
Ata na tusia e Michael T. Malm
Ina ua faaali mai foliga o ni alii talavou se toalua i le vaega pito i luga o le faitotoa o lo matou fale i Kolomupia, sa matou manatu o loo tutu i laua i luga o se mea ina ia mafai ona vaai mai i le faitotoa. E leai; sa matuai uumi lava i laua! O le ma atalii e tolu tausaga, o Pablo Ezequiel, na tilotilo atu i luga ia i laua ma le ofo. I totonu o ni nai aso, sa avea i laua ma ana uo sili.
O lo matou aiga—o Ludy, o lo’u toalua; Erika; Yesica; ma Ezequiel laitiiti—sa saili mo le Alii. Ua leva lava ona matou ola i nisi o mataupu faavae: sa matou tatalo i taimi o taumafataga; sa matou tatalo o se aiga, ma sa matou faia gaoioiga faaleaiga. Sa faavae o matou olaga i la matou faatasiga faaleaiga. O le faaali mai o na “agelu lapopoa” e toalua, e pei ona valaau ai faifeautalai e Ezequiel, na faamauina ai a matou faiga masani o le faamalosia o le aiga ma le taulai atu i le Atua.
I le faaaogaina o tusitusiga paia e avea ma lo la taiala, na aoaoina ai i matou e Elder Fa ma Fields i le ala. Sa matou tuufesili atu i le Alii po o fea e tatau ona matou tapuai ai. Ua tuuina mai e le Tusi a Mamona ma le talalelei toefuataiina tali i fesili taitasi sa ia i matou i le tele o tausaga i a matou talanoaga faaleaiga. E fetaui lelei tali, ma sa vave ona avea i matou ma tagata o le Ekalesia. E tasi le tausaga mulimuli ane, ae matou osia ni feagaiga ma sa faamauina faatasi o se aiga e faavavau i le Malumalu o Bogotá Kolomupia.
Sa ma lagonaina se olioli tele i le iloaina sa ma amataina le ma fanau i le ala o le talalelei. Sa faatasi mai le Agaga i o matou olaga ma le aiga, ma o Ezequiel, lea sa fa tausaga, sa ofoina atu se tatalo o le a matou le faagaloina lava. Sa ia fai mai, “Tama Faalelagi Pele e, matou te faafetai atu ia te Oe mo lenei tamaitiiti aulelei o au, amene.” Sa matou tali uma atu amene ma feopoai i le lotolotoi o foliga ataata. O lena tamaitiiti laitiiti na te aumaia le olioli ia i matou.
I tausaga na sosoo ai, sa matou faia o se masani le o soo i le malumalu ma sa mafai ona matou o faalua pe faatolu i tausaga taitasi. Matou te nonofo i le 420 km (260 maila) mai le malumalu, ae e lei foliga mamao lava ia i matou. O le sauni e o i le malumalu sa avea o se mea fiafia i taimi uma mo i tatou. O le galuega o le talafaasolopito o aiga o se mea e faamuamua mo le ma fanau, ma sa latou fiafia e fai papatisoga mo e ua maliliu. Sa i ai pea lava le sauniuniga o le migao ona sosoo ai lea ma se aafiaga faaselesitila i le maota o le Alii.
Sa tuputupu ae Ezequiel i le agaga ma i le faatuatua. Sa avea lona tina ma lana oa e sili ona taua. E i ai pea lava pea ia te ia se faamalo faapitoa mo ia. I se tasi aso na ia ta’u atu i lona tina, “Mama, ou te alofa ia te oe e sili atu nai lo ivi o le tainasoa!” Sa matou talie uma lava ona o lana gaoioiga e fiafia i ai o le vaavaai lea mo ivi o tainasoa.
O lo ma atalii faapelepele o Ezequiel na faasoa mai le 14 tausaga o lona olaga faatasi ma i matou i le talalelei lea e tuufaatasia i matou. Sa masani ona vave usitai o ia. Sa faasusulu mai lona alofa i lo matou aiga. O ona tuafafine ma le Au Paia i tusitusiga paia o ana faataitaiga sili ia. Sa tumu o ia i le malosi ma gaoioiga. Sa lei misia lava e ia sana vasega seminare. Sa ia faatumulia lo matou aiga i le fiafia. Sa migao o ia pe a ia tufaina le faamanatuga. Ae na suia lo matou olaga faatasi ina ua valaauina Ezequiel e toe foi atu i lo tatou Tama Faalelagi. Sa matou matuai misia lava o ia e sili atu nai lo le mea e mafai ona matou faamatalaina.
Na aveeseina mai o ia ia i matou e se siama e tulaga ese. E ui lava i le tiga matautia o lona alu ese atu, ua matou mautinoa o le a matou toe faatasi ma ia. O loo ia i matou le folafolaga na faia i la matou faamauga i le malumalu. Ua faatumuina le lagona o le gaogao lea na tuua e lona maliu i le malamalama na valaauina o ia e le Alii e auauna atu i se misiona i se isi nofoaga. Sa matuai faapitoa lava le falelauasiga o Ezequiel lea na toatele ai tagata na uunaia e sailiili i le Ekalesia. Sa ou faamoemoe lava o le a ia auauna atu i se misiona, ma o lenei ua ia faia. Ona o le ata o le faaolataga, ua matou iloa ai le mea o loo i ai Ezequiel ma po o ai o faatasi ma ia.
O loo matou taulai atu pea i lo matou aiga ma i le Atua. O la matou molimau e faapea o loo soifua le Atua ma e i ai Sana fuafuaga mo o tatou olaga. E tatau ona tatou faaauau pea i le faatuatua. O le toesea o se pele e faamanatu mai ai ia i tatou le fuafuaga paia.
O nisi o upu e sili ona faamafanafana loto ua tatou maua e mai le Perofeta o Iosefa Samita. I o matou loto ua matou iloa ai lo latou moni a’ia’i: “E aveeseina e le Alii le toatele e oo lava i le fanau iti, ina ia latou o ese ai mai le losilosivale o tagata, ma faanoanoaga ma leaga o lenei lalolagi; e mama tele i latou, matagofie tele, e soifua ae i le lalolagi; o le mea lea, afai e manatunatu i ai ma le sa’o, o le a leai se faavauvau ae o le a i ai le mafuaaga e fiafia ai ona o le a aveeseina mai i latou mai le leaga, ma o le a le toe umi ona tatou toe faatasi lea ma i latou” (Aoaoga a Peresitene o le Ekalesia: Iosefa Samita [2007], 187).
O le faamoemoe o le a toe vaai ia Ezequiel i le taeao o le Toetu na aumaia le lototele i o matou agaga ma fesoasoani ia i matou e onosaia aso pogisa.