O Le Misiona Paia a Iesu Keriso: Mesia

Ia suesue ma le agaga tatalo lenei savali ma saili ia iloa mea e faasoa atu. O le a mafai faapefea e le malamalama i le soifuaga ma le matafaioi a le Faaola ona faateleina lou faatuatua ia te Ia ma faamanuiaina ai i latou o loo e tausia e ala i le faiaoga asiasi? Mo nisi faamatalaga, alu i le reliefsociety.lds.org.

Faatuatua, Aiga, Toomaga

Ata

Christ decending from heaven at His Second Coming. He is standing in the clouds.

Ua aoao mai tusitusiga paia faapea e mafai ona tatou nonofo i le afioaga o le Atua “e ala mai i galuega, ma le alofa mutimutivale, ma le alofa tunoa o le Mesia Paia” (2 Nifae2:8). O le Mesia “o se upu Faa-Aramaika ma Faa-Eperu o lona uiga ‘o lē na faauuina.’ … I le Feagaiga Fou ua taʼua Iesu o le Keriso, o le upu i le Faa-Eleni e tutusa ma le upu Mesia. O lona uiga o le Perofeta faauuina, o le Faitaulaga, o le Tupu, ma le Laveai .”¹

Na molimau mai Elder Jeffrey R. Holland o le Korama a Aposetolo e Toasefululua: “Ou te iloa ua na o [Iesu Keriso] o Le Paia e Toatasi o Isaraelu, o le Mesia o le a toe afio mai i se aso i le mamalu mulimuli, e nofotupu i le lalolagi e avea ma Alii o alii ma Tupu o tupu. Ou te iloa e leai lava se isi igoa ua tuuina mai i le lalolagi e mafai ona faaolaina ai tagata.”²

“O [Iesu Keriso] o le Faaola ma le Togiola o le lalolagi,” o le saunoaga lea a Peresitene Dieter F. Uchtdorf, Fesoasoani Lua i le Au Peresitene Sili. “O Ia o le Mesia na folafolaina mai. Sa Ia soifua i se soifuaga atoatoa ma, na togiolaina mo a tatou agasala. O le a i ai pea o Ia i o tatou autafa. O le a Ia tauina a tatou taua. O Ia o lo tatou faamoemoe; o Ia o lo tatou faaolataga; o Ia o le ala.”³

Mau Faaopoopo

Ioane 1:38–41; 4:25–26, 40–42; 2 Nifae 6:13; 25:16–17

Mai Tusitusiga Paia

O soo tamaitai o Keriso na avea ma molimau o Lana matafaioi o le Mesia. O Maria Le Makatala o se soo o Iesu Keriso. O ia o le tagata muamua na vaai i “le maa ua aveeseina i le tuugamau” i le taeao o le Toetu o Keriso. Sa ia “tu i fafo e lata ane i le tuugamau ua tagi ai” ina ua ia iloaina ua le o toe i ai Lona tino i le tuugamau.

Ona “faliu lea o ia i tua, ua iloa atu Iesu ua tu mai, ae lei iloa e ia o Iesu lava lea.

“Ua fetalai atu Iesu ia te ia, Funa e, se a le mea e te tagi ai? O ai ea e te sailia? A o le fafine, fa te ia o le leoleo ia o le fanua, ua fai mai ia te ia, Le Alii e, afai ua e ave ese ia te ia, ta’u mai ia ia te au po o fea le mea ua e tuuina ai o ia, ona ou aveeseina lea o ia.

“Ua fetalai atu Iesu ia te ia, Maria e. Ona faliu lea o ia, ua fai mai ia te ia, Raponi e; o lona uiga, Le A’oa’o e.” Na iloa e Maria e le o Ia o le faitogalaau ae o Iesu Keriso, le Mesia. (Tagai Ioane 20:1–17.)