Aumaia o le Peraimeri i le Fale
O Gaoioiga Anoa E Faamalosia Ai Lo’u Aiga
E alala le tusitala i Iuta, ISA.
Aoao atili e uiga i le autu o le Peraimeri o le masina lenei!
Sa le fiafia Lucas. Ia fealualuai solo i le fale e saili se tasi la te taaalo. Sa taalo lona uso, o Ben, i le komepiuta. O lona tuafafine, o Sophie, o loo tesi i lana uo. Sa iloiloina e tina le meli, ma sa faitau tusi Tama.
“E le manaia iinei, o le tala lea a Lucas.
Sa tilotilo atu tama mai lana tusi. “O le a le uiga o lau tala?”
“Tatou te le faia faatasi se mea,” o le tala lea a Lucas. “E fai a mea a le tagata ia.”
Na tapuni e tama lana tusi. “E sa’o oe,” o lana tala lea. “O le a ou faapotopoto faatasi le aiga, ma o le a tatou faia se mea malie.”
Sa ataata Lucas. “Lelei tele!”
I ni nai minute mulimuli ane, sa nonofo faatasi le aiga o Lucas, ma mafaufau i le mea e fai. Sa manao Sophie e tesi lana uo. Sa fia taalo pea Ben i lana taaloga i le komepiuta.
“O la’u uo o Paulo e fiafia e o e savavali ma lona aiga,” o le tala lea a Lucas. “Ma e fiafia le aiga o Alexander e taaalo i taaloga.”
Ae sa le manao Sophie e alu i fafo atu i le vevela o le tau, ma sa le mafai ona taalo Ben i ni taaloga ona sa afaina lona tapuvae.
“O mea fiafia na mo au uo e fai, Lucas,” na fai mai ai Tina, “ae o le a se mea e fiafia lo tatou aiga e fai?”
Na fai atu Ben e fiafia o ia e taalo i taaloga i luga o laupapa. Na fai atu Sophie e fiafia o ia e faitau. Na fai atu Lucas e fiafia o ia i taututuuga taavale.
“Sei o tatou pikiina se tasi o na mea e fai i le taimi nei,” o le tala lea a Tama. “Aisea tatou te le taaalo ai muamua i se taaloga i luga o le laupapa?”
E lei umi ae latou faataamilomilo uma i se taaloga ma amata ona taaalo. Ina ua mavae se taimi sa tuuese e Sophie lana telefoni. Na le toe tilotilo Ben i le komepiuta. E oo atu i le faaiuga o le taaloga, ua ataata uma tagata, ae sa tele ai lava le ataata a Lucas.