O La Tatou Avanoa

Tulaga Faatonuina ma Uo

Talu ona ou i ai i le aoga, sa i ai ni au uo e le malamalama i tulaga faatonuina o la tatou tapuaiga. I le taimi muamua sa faigata, ae i le aluga o taimi ua amata ona latou masani i le manatu o lo’u ola mama. Sa ou faia se sini i lo’u olaga ina ia mama ma le pona, ma ua sologa lelei, ia te au faapea foi ia i latou o e na masani ona faitioina au. Mulimuli ane, o le faaaloalo, filemu, ma le olioli ua avea ma se vaega o lo matou li’o o uo agalelei.

Vitória M., Pasila

Faamagaloina O Au Uo

Ona na o au le tagata o le Ekalesia i lau tupulaga, ua ou tofo i ni taimi na faatiga mai ai au uo ia te au. O nisi taimi latou te faamasino ai ma faitio i la’u lotu. Ou te lagonaina le matuai tuua toatasi, ae ou te faafetai ou te iloa tulaga faatonuina o le Ekalesia.

Afai e faatiga mai au uo ia te au, ou te taumafai e faalotomaulaloina au lava ia ma aloese mai finauga, aua ua ou iloa o finauga e leaga. Pe a latou amata ona talanoaina ni mataupu e uiga i le Ekalesia, e na ona ou molimau atu lava i lo’u talitonuga i le talalelei.

Ou te faamagalo atu pea i a’u uo pe latou te faatoese mai pe leai. O le faamagalo atu e le na o le faapea atu, “Taliaina le faatoesega” po o le “E le afaina,” aua o le faamagalo atu i ai se uiga loloto: o Iesu Keriso na togiola mo a tatou agasala ina ia mafai ona faamagaloina i tatou e le Tama Faalelagi.

E ui lava e leo malamalama nei au uo i lo’u talitonuga, ou te iloa e mafai ona avea au ma tufugaaao a le Atua e aoao atu ia te i latou le talalelei. O loo ou fesoasoani ia i latou, ma o le taimi foi lea o loo ou fesoasoani ia te au lava ia e tuputupu ae faaleagaga ma saunia e auauna atu i se misiona.

Iosua V., Filipaina

O Se Tasi o Mau Ou Te Fiafia i Ai

E faaaoga e lo tatou Tama Faalelagi “mea laiti ma faatauvaa” (Alema 37:6) e faalautele ai Lana galuega. O Iosefa Samita sa le o se tagata maoae i le silafaga a le lalolagi, ae na faaaoga e le Atua o ia e toefuatai mai ai le Ekalesia. Ma o se mea faigofie lava na taitai atu ai i le Toefuataiga: o se tatalo. Aua e te manatu e te laitiiti tele e galue i le tovine a le Alii. O le avea ma se faataitaiga lelei e mafai ona fesoasoani i lou tuaoi ia avea ma se tagata o le Ekalesia. E le manaomia e le Atua ni uiga faaletagata maoae, na o tagata e faamaoni ma usiusitai.

Ronick R., Haiti