Sa Ou Iloa O Le A Saunia E Le Atua
Abethemia Trujillo, Albay, Filipaina
Ata na tusia e Bradley Clark
Ae ou te lei auai i le Ekalesia, sa ma’i tigaina lo’u toalua. Sa ou tatalo malosi atu i le Atua, ma fai atu i le Atua ina ia tuu mai lo’u toalua e ola mo le lelei o le ma fanau e toalima ma le pepe sa ou maitaga ai. Ae o a’u tatalo sa le aoga.
Ina ua maliu lo’u toalua, o lo’u alofa mo le Atua ma lo’u faatuatua ma le faalagolago ia te Ia sa oti foi. Sa lofituina au i tiutetauave ua i luga nei o o’u tauau. O le mea e lelei ai, na i ai iina ou matua e fesoasoani mai.
I se tasi aso i ni nai tausaga mulimuli ane, sa ou faalogoina se tuitui i lo’u faitotoa. Sa tutu ai iina ni tagata ese se toalua ma ni ataata faauo ma se tusi i o la lima. Sa la faailoa mai i laua lava o ni faifeautalai mai Le Ekalesia a Iesu Keriso o le Au Paia o Aso e Gata Ai. Ou te lei faalogo muamua i le la ekalesia. Sa la tuumuli ese ina ua ou fai atu sa ou pisi, ae sa faaauau pea ona ou mafaufau ia i laua.
O le aso na sosoo ai sa ou vaai ia i laua o faaali atu le la tusi i se tuaoi. I le fiailoa, na ou faalatalata atili atu. Na iloa mai au e faifeautalai ma toe fesili mai pe mafai ona la asiasi mai ia te au. Sa ou te’i lava i la’u tali: “Ioe, soo se taimi!”
A o ou faalogologo i lesona a faifeautalai ma suesue i le Tusi a Mamona, sa ou iloaina mea sese na ou faia i le olaga, salamo i au agasala, ma faalatalata atili atu i le Atua. Ina ua faalogo ou matua na aoaoina au e faifeautalai, e ui i lea, sa le fiafia i laua. Na la faamata’u mai o le a faato au ma la’u fanau. Na valaaulia au e faifeautalai ina ia papatiso, ae sa ou musu aua o le a le mafai ona matou ola e aunoa ma le fesoasoani a o’u matua.
A o lei tuumuli ese faifeautalai, sa la fai mai ia te au e faitau le 3 Nifae 13:31–34. Ina ua ou faitau “ia outou muai saili le malo o le Atua ma lana amiotonu, ma o le a faaopoopo atu ia te outou nei mea uma” (fuaiupu 33), sa ou iloaina o le a saunia e le Tama Faalelagi pe afai ou te faamuamua o Ia ma usiusitai i Ana poloaiga. Ina ua toe foi mai faifeautalai, sa matou faatulagaina loa le aso o lo’u papatisoga.
I le aso o lo’u papatisoga, na toe oo mai ai le leo ita o lo’u tina i lo’u mafaufau. Sa ou popole, ae sa ou ulu atu i le vai ma papatiso ai. Mulimuli ane sa ou matua fiafia lava, ma ina ua faamauina au o se tagata o le Ekalesia ma tuuina mai le meaalofa o le Agaga Paia, sa ou lagonaina ua aveesea la’u avega.
Ina ua faalogo ou matua ua ou auai i le Ekalesia, sa la faatoina au. Ae na matou toe faalelei i se tausaga mulimuli ane, ma na papatisoina ou uso e toalua mulimuli ane faatasi ai ma le maliega a o matou matua.
O le toatolu o la’u fanau na iu ina auauna atu faamisiona, ma e le o toe umi ae ou faamanatuina le 40 tausaga o se tagata o le Ekalesia. Oka se maoae o faamanuiaga ua ou maua—o mea uma e faafetai ai i ni faifeautalai se toalua na tuitui mai i lo’u faitotoa, faailoa mai ia te au le Tusi a Mamona, ma fesoasoani e toefuatai mai lo’u alofa mo le Atua ma lo’u faatuatua ma le faalagolago ia te Ia.