O Faamanuiaga Faaleperisitua E Tuuina Mai ma Toe Faafoi
Julie Keyes, British Columbia, Kanata
Ata na tusia e Bradley Clark
I ni nai tausaga ua mavae a o faia se taumafataga a lo matou aiga ma se isi ulugalii mai le matou uarota, na matou maua se valaau mai le matagaluega o faalavelave faafuasei o le matou falemai i le lotoifale. Sa fesili mai le tagata faigaluega o le falemai i lo’u toalua, o lē sa avea ma peresitene o le siteki i le taimi lea, pe mafai ona alu atu se tasi mai la tatou Ekalesia e vaai se talavou e 17 tausaga ua mafatia i se manuaga ogaoga o le ulu.
Ina ua taunuu atu, na iloa ai e lo’u toalua o le alii talavou na pau ifo mai se poletito agai i luga o se auala savali sima e 30 futu (9 m) i lalo ifo. Sa lei malamalama o ia ma e leai se faamoemoe e ola.
Sa tuu atu e lo’u toalua ma le uso na matou fai taumafataga i le afiafi se faamanuiaga i le alii talavou. Sa faafesootai lona aiga, e nonofo i le afe maila (1,610 km) le mamao, ma logoina ma faamatalaina atu lona tulaga o i ai.
O se vavega lava, ina ua mavae ni nai aso o tigaina tele, na toe malamalama le alii talavou ma amata ona manuia. Mo le fa vaiaso, na asiasi atu ona matua ia te ia i aso uma i le falemai. Ona latou auina atu lea o ia i le vaalele i lona aiga i Arisona, ISA, ina ia mafai ona faaatoatoa ai lona malosi.
E ese le ofoofogia o le molimauina o le mana faamalolo o le galuega faaperisitua i se auala e tuuina atu ai i lenei alii talavou se avanoa lona lua i se lumanai manuia. Ma sa ou matuai faafetai lava mo se toalua ma isi tagata o le uarota ua saunia e faatino le auaunaga faaleperisitua ma galue i le pule paia.
Sa ou lagonaina le agaalofa mo matua o le alii talavou, o e na mamao mai lo la atalii i le taimi o lona faalavelave. Sa ou fiafia, e ui i lea, e iloa sa la lagonaina le mafanafana ina ua la iloa ua uma ona maua e lo la atalii se faamanuiaga faaleperisitua, ma sa fiafia tagata o le Ekalesia e fesoasoani.
O lo’u alofa mo na matua na matuai faateleina i ni nai tausaga mulimuli ane ina ua ou maua se valaau e ta’u mai ai ia te au o lau lava tama tama, e nofo i le 2,000 maila (3,220 km) le mamao, sa taia i se taavale a o tietie i lana uila vilivae i le iunivesite lea sa ia faigaluega ma aoga ai. E ui ina sa ou lagonaina le leai o se malosi e fesoasoani ai ia te ia, sa ou faafetai ma faamafanafanaina e iloa na valaauina faifeautalai e tuuina atu ia te ia se faamanuiaga faaleperisitua ma sa tali mai se uarota i St. Paul, Minesota, ISA, i manaoga o lona aiga. Na aumaia e tagata o le uarota meaai i lona fale ma fesoasoani i lona toalua, faatoa uma ona fanau i le aso ae lei tupu le faalavelave, ma tausia le isi toatolu o le la fanau.
Vaai faalemafaufau i le faateleina o lo’u agaga faafetai ina ua ou iloaina o le faifeautalai na faamanuiaina la’u tama tama o le alii talavou lava lea e tasi na mauaina se faamanuiaga mai lo’u toalua i le lima tausaga talu ai. Sa ou maofa ai le auaunaga na tuuina atu na toe foi ane i le fuataga atoa!
O lou faatuatua ma le tatalo o le loto faafetai i lo’u Tama Faalelagi alofa o loo faaauau pea ona faateleina a o ou mafaufau loloto e Na te silafia tatou uma ma mea uma o le a tatou manaomia. Ou te talitonu o lenei faifeautalai talavou na i ai iina ina ia mafai ona matou vaai i le muai silafia o le Atua i se auala e sili ona patino.