Suia Lou Fefe i le Faatuatua

Saunia e Katherine Nelson

E alala le tusitala i Iuta, ISA.

Ae faapefea pe afai ou te le maua lava se isi tagata e tafafao faamasani ma e le faaipoipo lava?

Ina ua ia vaai mai ia te au, na vave ona iloa e la’u uo sili ua i ai se mea o sese. “Ua faauma le ma faigauo,” sa ou tau atu filemu ia te ia. Sa ou sau i le fale ina ua maea se talanoaga umi ma le alii talavou sa ma tafafao faamasani. E ui lava sa ma faanoanoa e faamavae, na ma malilie uma o le mea sa’o lea mo i maua.

Ae i le aluga o le vaiaso, sa amata ona ou lagona le le mautonu i la’u filifiliga. Ae faapefea pe afai ou te le maua lava se isi tagata e tafafao faamasani ma o le a le faaipoipo lava? Ae faapefea pe afai na ou faateleina le vevesi mai lo ma eseesega?

Sa ou lagonaina le matuai tuua toatasi ma le le mautinoa na lava ina ou manatu ai e toe vaai pe na ia naunau e toe taumafai tasi le ma sootaga. Sa ou, e pei ona taua e Elder Jeffrey R. Holland o le Korama a Aposetolo e Toasefululua, “ua le fiafia i mea o le taimi nei ma mauaina na o ni vaaiga maualalo e uiga i le lumanai.”¹

I se tasi afiafi i ni nai vaiaso ina ua uma ona ma faamavae, sa ou faitau e uiga i le Toetu o le Faaola. Na toe faamatalaina e le Talalelei a Luka faapea i le aso tolu ina ua uma ona teuina le Faaola, na o atu soo faamaoni e faauuina Lona tino i mea manogi. Ae sa latou mauaina le maa na pupuni ai le tuugamau ua fulieseina ma ua leai se tino. Ona oo faaali mai ai lea o agelu e toalua ia te i latou ma faapea atu, “Aisea tou te saili le ua soifua i e ua oti? “E le o iinei o ia, a ua tu” (Luka 24:5–6).

O le fesili a agelu na faafuasei lava ona taia ai au i se malosiaga maoae. Ou te lei mafaufau muamua lava i lagona atonu na oo i le au asiasi i le tuugamau o Iesu, i le iloaina sa latou sailia le Faaola i le nofoaga sese. Ou te lei mafaufau muamua lava i le luitau tele mo i latou i le talitonu sa tuua e Iesu le pala o le tuugamau ma ua toetu i le mamalu.

Na tuuina mai e le mau se aoaiga malie. Sa ou iloaina, e pei o uo a le Faaola, sa ou saili le faamafanafanaga i le nofoaga sese. O le nofoai i le taimi ua tuanai ma “moomoo [ga] faivavale mo ananafi”² sa le faamafanafanaina au pe uunaia ai au e galue malosi. Sa ou iloaina e manaomia ona ou tuu le matamata i le tuugamau o aafiaga ua mavae. Sa ou manaomia ona suia lou fefe i le faatuatua ma faalagolago e mafai ona fatuina e le Faaola se olaga fou mai ou aafiaga ua tuanai.

Ou te mafaufau soo i lena mau i le tele o taimi pe a ou faanoanoa ini filifiliga po o le moomoo e toe foi atu i le taimi ua tuanai. Ona o le Faaola, e mafai ona tatou toe amata. Ona o le Faaola, e mafai ona tatou “toe tepa i tua ia maua mai aloiafi mai aafiaga susulu ae le o lefulefu,” i le iloaina “o le taimi ua tuanai e tatau ona aoao mai ai ae le o le ola ai.”³ Nai lo o le faamaumauina o le taimi i le faanoanoa maimau, e mafai ona tatou vaai atu i le lumanai ma le faatuatua.