Faatino i Luga o Lenei Laueleele mo ni Tausaga
E alala le tusitala i Iuta, ISA.
E pei o peau o le sami, o le faatosinaga faalelagi a le Atua e mafai ona taialaina i tatou agai atu i Lana fuafuaga mo lo tatou olaga.
E pei o le toatele o tamaiti, sa ou miti po o le a le mea o le a avea ai au pe a ou matua. I lo’u tulaga, sa ou talitonu o le a avea au ma se fuimu i le masina. I lo’u mafaufau o le lima tausaga le matua, e leai lava se isi lava auala e mafai ona suia ai lo’u olaga. Ou te masalo o le toatele o i tatou na i ai ni miti faatamaitiiti pe faapei lo tatou olaga pe a tatou matutua. Ou te masalo foi o le toatele o i tatou na faia, i se tasi taimi, na toe tepa i tua i o tatou olaga ma alaga atu, “E le o le mea lenei sa ou manatu o le a tupu!”
E lua mau e fesoasoani ia i tatou e faatumau ai o tatou olaga i le vaaiga manino. Muamua:
“Aua o o’u manatu e le o outou manatu, o o’u ala e le o outou ala, ua fetalai mai ai Ieova.
“Aua e pei ona sili ona maualuga o le lagi i le lalolagi, ua faapea ona sili ona maualuga o o’u ala i o outou ala, ma o’u manatu e sili i o outou manatu” (Isaia 55:8–9).
Lona lua: “E lē faia e le [Atua] se mea vagana ai ua mo le manuia o le lalolagi; ona uaalofa o ia i le lalolagi” (2 Nifae 26:24).
Ua aoao mai e nei mau ia i tatou o mea uma e faia e le Tama Faalelagi e faaiu lava mo lo tatou manuia, e tusa lava pe tatou te le malamalama pe aisea. Ma talu ai o manatu o le Atua e maualuga atu nai lo tatou, e tatau ona tatou siitia o tatou olaga ia avea atili ai e tusa ai ma Lana fuafuaga mo i tatou.
Mafaufau a o Se
O nisi taimi tatou te talanoa e uiga i le fanauga a Isaraelu a o fesetai i le vao mo le 40 tausaga ae lei faatagaina e ulu atu i le laueleele na folafolaina. O se ao po o le afifaaniutu e tumau i luga o le tapeneko pe a tatau ona latou malolo, ma pe a siitia, e mulimuli i ai le tolauapiga (tagai Numera 9:15–18, 21–23). Ou te masalo na latou “mafaufau” foi i le 40 tausaga i le vao—mafaufau pe o afea latou te siitia ai, po o afea ae po o fea o le a latou malolo ai, ma po o afea o le a iu ai ina latou taunuu i le nuu folafolaina.
O lenei tala e matua oa lava i faatusa. A o tatou taitasi ma malaga i tatou lava i la le tino, tatou te mananao ia taunuu i le “nuu na folafolaina” o le ola e faavavau faatasi ma le Atua. Ua Ia folafola mai e taitai atu i tatou iina. Ae a o manaomia e tagata taitoatasi ona fesetai solo i le ala lava lea e tasi—ia usiusitai, salamo, maua sauniga o le perisitua, ma tumau ma le faamaoni—e tulaga ese olaga o tagata taitoatasi.
Fai mai Elder Richard G. Scott o le Korama a Aposetolo e Toasefululua: “Ua saunia e le Alii aafiaga faalelagi mo lou olaga, e taitaiina ai oe i le fuafuaga na faia faapitoa mo oe, ua finagalo o Ia e te faataunuuina i lenei lalolagi. Ia saili e ala i le Agaga ia iloa ma mulimuli ai ma le faaeteete i lena taitaiga ua tuuina atu e le Alii i lou olaga. Fuafua i ai lou olaga. Filifili, ma le naunautai, ia faatinoina lou saolotoga e te mulimuli i ai.”1
Mafaufau i mea sa sili atu ona faigata i le tolauapiga a Isaraelu e onosaia: o le faaaluina o se tausaga i se nofoaga lē lelei po o le tuua o se nofoaga manaia ina ua mavae aso e lua? Ou te manatu o tulaga uma e lua na tofotofoina ai lo latou faatuatua.
E faapena foi i tatou. E mafai ona le faamalieina i tatou i o tatou tulaga ma faapea ona faaalu ai se taimi e mafaufau ai pe o afea o le a sui ai. Pe atonu tatou te aafia i se suiga e lei mafaufauina i lo tatou tulaga masani matagofie. O le ala tatou te filifili e tali atu ai i nei aafiaga e fuafuaina, i se vaega tele, o lo tatou fiafia. Ma afai tatou te faaaluina o tatou olaga e mafaufau ai a o tatou fesetai, e mafai ona tatou misia avanoa matagofie mo le tuputupu ae faaleagaga.
Alu Loa ma Fai se Mea i le Asō
I le tautotogo o le 1831, na amata faapotopoto ai le Au Paia i Katelani, Ohaio. O se tagata lotu e igoa ia Leman Copley na malie e faataga se vaega mai Colesville, Niu Ioka, ina ia nonofo i lana faatoaga i Thompson, e le mamao mai Katelani. Ia Me 1831 na faaali atu ai le Alii i le Perofeta o Iosefa Samita:
“Ma ua ou faapaiaina mo i latou lenei laueleele mo se vaitau itiiti, seia oo ina faia e Aʼu, o le Alii, se isi mea mo i latou, ma poloaiina i latou e o atu i ai;
“Ma o le itula ma le aso e lei tuuina atu ia te i latou, o le mea lea ia tuu atu ai ia te i latou ia galulue i luga o lenei laueleele e peiseai ua mo ni tausaga e tele, ma o le a liliu mai lenei mea ia te i latou mo lo latou lelei” (MF&F 51:16–17 ua faaopoopo le faamamafa).
E pei lava o le fanauga a Isaraelu e mulimuli i le ao i le vao, na iloa e nei Au Paia o le a le nonofo tumau i latou i le faatoaga a Copley. E i ai se taimi o le a latou o ese ai. Ae tusa lava po o le a le umi latou te nonofo ai, e tatau ona latou galulue e pei o le a i ai iina mo ni tausaga se tele.
O lea la, aisea e tuuina atu ai e le Alii ia te i latou lenei fautuaga? O nisi atonu ua lotovaivai i le nonofo ai i se taavale solofanua po o se faleie i se lotoa palapala a o latou vaaia isi o loo ola i tulaga e sili atu ona lelei. Na tau suia e le fautuaga a le Alii la latou vaaiga mai le lotovaivai i le faamoemoe.
E faapena foi, pe a tatou vaai atu i isi o i ai ni mea tatou te moemiti i ai—se aiga matagofie, fale, galuega, ma se faasinomaga manino i le olaga—e mafai ona tatou lotovaivai. Mo se faataitaiga, pe afai tatou te iloa o le a le umi ona tatou i ai i se uarota po o se paranesi, e mafai ona tatou mafaufau, “Aisea e faalavelave ai le taliaina o se valaauga? Aisea e fia masani ai i soo se tasi?” E mafai lava ona tatou auai i le lotu, ae tatou te le mauaina mea uma e mafai ona tatou maua mai le aafiaga. Afai tatou te faaaluina o tatou olaga e taulai atu i mea tatou te le o mauaina, e mafai ona tatou toilalo i le lagonaina o le loto faafetai moni mo mea o loo tatou maua.
A o tatou pepese i se tasi o a tatou viiga, e i ai “e tele o avanoa e galue ai, avanoa tau le sailia. Aua le faamelea, fai mai, ‘Sei taumafai,’ ae alu loa ma e fai.”2
Pe a tatou “galulue i lenei laueleele e pei mo ni tausaga,” o le a amata ona tatou iloa ai avanoa tatou te lei vaai i ai muamua. Atonu tatou te vaaia foi o nisi o nei avanoa atonu e le toe oo mai ia i tatou. Ona tatou mafaufau lea, “Ona o loo ou i ai iinei, o le a ou galue, fai le mea sili ou te mafaia, ma filifili ina ia fiafia. O le a faaauau pea ona ou faamoemoe mo le lumanai, ae i le taimi nei, ia tuu mai au e fai ni mea lelei iinei.” O le eseesega i le va o le savali i le vai, ma le aau moni lava.
O le taunuuga, e lei nonofo umi ai le Au Paia i Thompson. Sa le tausia e Leman Copley lana folafolaga e tuu atu i le Au Paia e nonofo i lona fanua. Na iu lava ina auina atu e le Alii nei Au Paia i Misuri, ae sa latou faia le mea sili a o latou nonofo ai i le laufanua o lena faifaatoaga, ma na faamanuiaina e le Alii i latou mo lena mea.
Na saunoa mai Peresitene Dieter F. Uchtdorf, Fesoasoani Lua i le Au Peresitene Sili: “E tele taimi na o le pau le ala tatou te malamalama lelei ai i vanu loloto o lo tatou olaga i le taimi nei, o le toe tepa lea i tua mai tulaga o o tatou aafiaga i le lumanai. E tele ina le mafai ona tatou iloa le aao o le Alii i o tatou olaga seiloga e umi se taimi talu ona mavae atu ia tofotofoga. O le tele o taimi, o taimi e sili ona faigata o o tatou olaga o ni vaega taua e fauina ai le faavae o o tatou uiga ma faailogaina ai le ala mo avanoa, malamalama, ma le fiafia i le lumanai.”3
Aua Le Tuua O Outou Mafaufau E Fuli I Tua
O nisi taimi tatou te afaina pe a tatou finau i le faia o mea e tusa ai ma lo tatou lava taimi atofaina, nai lo le faalagolago i le taimi a le Alii.
Mafaufau i le tala i le malaga ese a Liae mai Ierusalema mai le vaaiga a Lamana ma Lemuelu. Na faafuasei ona faalavelavea lo latou olaga manaia ina ua fai atu Liae ua tatau ona sosola ese le aiga ona o le a faaumatia Ierusalema. Ua latou o atu i le vao—ae lei umi ae tatau ona toe foi vave mai e aumai papatusi apamemea mai ia Lapana. O lena taimi atoa o le malaga faifailemu i le toafa faigata ae na o le avanoa mo Lapana e gaoi ai a latou oloa taua ma taumafai e fasioti i latou? O le a ou le fiafia foi!
Ma le isi foi, o le vaavaai atu ia Ierusalema o le vaaiga lava lea e tasi na faaopoopo ai le feita o Lamana ma Lemuelu. Ou te le iloa pe na la faamoemoe e vaai i se nuu faatafunaina pe a toe foi atu, ae e mafai ona ou te mafaufau i o la manatu: “Pe lei tatau ea ona faaumatia Ierusalema? Aisea ua maimau ai lo tatou taimi i le vao ae o lea e sololelei lava mea iinei?” I soo se tulaga lava, o nei mea uma sa vave ona taunuu i lo la sasaina o Nifae ma Sama (tagai 1 Nifae 3:29).
Pe a le tutupu mai mea i le ala tatou te manatu e tatau ona i ai; pe a tatou mafaufau i lena afi faaniutu o le a le mafai lava ona vave lana alu; pe a tatou vaavaai solo ma vaai atu tau lava o le fanua a se faifaatoaga, atonu foi e mafai ona tatou lotovaivai i le tulaga, e pei o Lamana ma Lemuelu, tatou te faatoilaloina lo tatou faatuatua ma tuuaia lo tatou le fiafia i le Atua.
Na aoao mai Elder Neal A. Maxwell (1926–2004) o le Korama a Aposetolo e Toasefululua: “pe afai ua tele naua lo tatou le onosai i taimi o le Atua, ua tatou fai atu tatou te iloa le mea sili. E uiga ese—o i tatou o loo tuu uati i o tatou tapulima, ua tatou saili e faatonu le tagata e pulea uati ma kalena a le lalolagi atoa.”4
O le mea moni e le faigofie i taimi uma le olaga, ma ou te le iloa pe i ai se tasi—e aofia ai au—o le a faapea mai o le olaga e tutusa lelei ma le mea na vaai faalemafaufau i ai. Ae ou te iloa foi le toatele o tagata o le a fai mai e ui lava i mea uma, o loo fiafia i latou i lo latou olaga i le taimi nei—e tusa lava pe latou te le’i tutupu a’e e avea o ni fuimu i le masina!
O le vaaiga lelei lena e oo mai pe a tatou mulimuli ma le faamaoni i le Alii ma le fiafia i lo tatou lava vaomatua. A o tatou faia, o le a tatou iloa i se aso o la tatou aafiaga i le vao e lei matua leaga lava e pei ona tatou manatu ai. Atonu e oo lava ina tatou tautino atu faapea sa matuai aoga lava. Ia i tatou taitoatasi na fetalai mai ai le Alii:
“Faaauau pea i le onosai seia faaatoatoaina outou.
“Aua le tuua o outou mafaufau e fuli i tua; ma a outou agavaa, o le a outou vaai ma iloa i lau lava taimi e tatau ai” (MF&F 67:13–14).