Faifeautalai Falaoa Fa’i
Mo nei alii talavou, o le faasoaina atu o se tipiga falaoa ua faamanuiaina le tele o olaga, e aofia ai o latou lava olaga.
Ata na pueina o le uarota ma le faaaloaloga a Nolfo Zambrano
Afai e ofoina atu e se tasi ia te oe se fasi falaoa fai suamalie, o le a lau mea e fai? Mo alii talavou i se uarota i Ekuatoa, o se tasi lena o auala latou te amata ai talanoaga e uiga i le talalelei.
I masina tai lua uma latou te faia ai se aso faafaifeautalai o fale tatala i eria eseese o le latou uarota. Latou te vaevae i ni nai vaega, o vaega taitasi o loo i ai se alii talavou, se faifeautalai faamisiona po o se faifeautalai faatoa foi mai, ma se toeaina po o se faitaulaga sili. O nisi o vaega e galulue i se faleie, o nisi e o e faafesootai tagata i le paka, ma o nisi e o mai lea fale i lea fale.
Afai latou te feiloai i se tasi, e ofoina atu i le tagata se fasi falaoa fa’i. Afai e talia e le tagata, e tau atu ia te ia faapea e ui lava o le falaoa e suamalie ma lelei mo le tino, o faifeautalai o loo i ai se savali o le a fafagaina le agaga o le tagata. Ona valaaulia lea e alii talavou ma a latou soa le tagata e feiloai ma faifeautalai. I lenei ala, latou te mafai ona maua le 40 i le 50 tagata mo faifeautalai i le lua itula.
E faaaumea foi e alii talavou tagata o a latou lava korama. I aso Toonai latou te feiloai mo se gaoioiga a Alii Talavou ma galulue i le Tiute i le Atua. Ona latou asiasi atu lea i tagata ua le toaaga mai o le latou korama. Latou te fautuaina i latou e o mai i le lotu ona valaaulia lea o i latou e toe foi mai e taaalo i ni taaloga po o le auai i se isi gaoioiga.
I lenei auala e toatele isi, ua mafai e nei alii talavou ona saunia e avea ma ni faifeautalai mo le olaga atoa. O le toalua o i latou (i le taumatau) ua faasoa mai le ala la te lagona ua faamalosia ma musuia ai i laua e o la aafiaga.
Na Suia e le Talalelei
Ua lima tausaga talu ona avea au ma se tagata o le Ekalesia. O o’u matua e le oni tagata o le ekalesia, ae o le uso o lo’u tama o Jorge o le peresitene o Alii Talavou, ma sa avea ma se fesoasoani tele. Ou te faafetai foi i lo’u epikopo mo lana lagolago faifai pea ma le faamalosiauga.
Sa ou filifili e faalatalata atili i le Ekalesia ina ua mavae se tasi o aso faafaifeautalai sa latou faia i le uarota. O se tasi lea o o’u aafiaga muamua na musuia ai au e auai i le Ekalesia. I le avea ai ma se tiakono, aoao, ma le taimi nei o se ositaulaga, e lagolagoina ma faamalosiau mai lava i taimi uma o’u taitai ia te au e auai i gaoioiga uma lava o le galuega faafaifeautalai. Ou te fiafia i fale tatala, lea ou te maua ai le avanoa e faasoa atu ai i isi le faamanuiaga o le avea ai ma tagata o le Ekalesia a Keriso. O le mea e sili ona musuia ai au o gaoioiga auauna atu, lea ou te maua ai le avanoa e auauna atu ai i lo’u tuaoi e pei ona aoao mai Iesu tatou te faia.
I le tausaga talu ai, na auai mai ai ou uso laiti, o Luis, 15 tausaga, ma Israel, e 12 tausaga, i le Ekalesia. Sa matou galulue faatasi i galuega faatino i le Tiute i le Atua, ma talu mai lo la papatisoga ua matou fefaasoaaiina ni aafiaga matagofie o le galulue faatasi. O alii talavou uma lava i le uarota e matua vavalalata lava, ma matou te lagolagoina e le tasi le isi.
Ou te iloa o le papatisoga o le faitotoa e ulu atu ai i le malo o le lagi. Pe a tatou auauna atu i o tatou uso a tagata, ua tatou auauna atu i le Atua (tagai Mosaea 2:17). O le galuega faafaifeautalai e faamanuiaina ai aiga, ma ua ou iloa ua suia lou olaga ona o le talalelei.
Alvaro T., 17 tausaga
Aoaoina Ou Tiutetauave
I le avea ai ma se tiakono sa ou aoaoina o’u tiutetauave e faafetai ai i le lagolago a o’u matua ma taitai ma le galue ai i sini i le tamaitusi Tiute i le Atua. I le avea ai ma se aoao sa tele atu mea na ou aoaoina i le alu e fai asiasiga a faiaoga o aiga, auai i fale tatala i aso faafaifeautalai, faasoaina atu o le falaoafa’i, auai i le Mutuale, ma le auai i gaoioiga a le uarota ma le siteki.
O lenei ua avea o se ositaulaga ua ou taulai atili atu i le galuega faafaifeautalai. O le galulue faatasi ma le peresitene o Alii Talavou ma se fesoasoani i le epikopo, ua ou aoaoina mea e sili atu e uiga i o’u tiutetauave o se tasi e umia le perisitua.
E masani ona valaaulia i matou e o matou taitai matou te o faatasi ma i latou ma faifeautalai faamisiona ina ia mafai ona matou faamasani i le galuega faafaifeautalai. Latou te apoapoai mai foi ia i matou e faitau i tusitusiga paia, aemaise lava le Tusi a Mamona. O nei aafiaga uma e uunaia ma saunia ai au e maua le perisitua maualuga atu, ma auauna atu faamisiona.
Isaac G., 17 tausaga