Aisea E Matagofie Ai Le Faaipoipoga!
E alala tusitala i Iuta, ISA.
Ma te fiafia i le faaipoipoga, ma o le mafuaaga lenei.
Ina ua mavae la ma tafaoga faamasani muamua, sa ma iloa uma ma te toe fia o i se tafaoga faamasani lona lua. Sa toe fia alu Ben i se isi tafaoga faamasani ona o Rachel o se tagata faauo ma e maua le fiafia i le talanoa i ai. Na toe fia alu Rachel i se isi tafaoga faamasani aua sa amio tamalii Ben ma sa ataata pea lava e ui lava o ana fuafuaga faataatitia uma na le taunuu. Ina ua mavae le tafaoga faamasani lona lua, ma isi tafaoga faamasani e tele ma tatalo ina ua mavae lena, na ma lagona le alofa ma filifili ai e faaipoipo i le Malumalu o Sacramento Kalefonia.
O le aso o le faaipoipoga sa matuai atoatoa, ma na ma fiafia i le faaipoipoga talu mai lena taimi. E mafai ona ese le vaai a le lalolagi i le faaipoipoga, ae ua tatou iloa “e leai se isi lava sootaga o soo se ituaiga e mafai ona aumaia le olioli, faaosofia le tele o le lelei, po o le fuaina mai ai o le tele o le faamamaina patino.”1 E matagofie le faaipoipoga, ma o le mafuaaga lenei.
Mai ia Ben: Se Soa Soka
I le taimi o la’u misiona i Pasila, sa ou amata ona fiafia i le soka. O le mea e tasi e sili ai lou fiafia i lenei taaloga o le i ai o soa taaalo ma le aoao pe faapefea ona galulue faatasi ma la’u au. O Rachel o se soa taalo maoae. E fesoasoani o ia ia te au e ausia a’u sini, e faatasi mai ia te au i le faia o faaiuga taua, ma e i ai o ia iina pe a iai sou faafitauli.
Ina ua faamauina i maua i le malumalu, sa ma folafola atu e “fesoasoani le tasi i le isi o se paaga tutusa.”2 Ma te taumafai ma Rachel e lagolago le tasi i mea uma ma te faia, ma e maoae le iloa o loo i ai pea sau soa taalo faatuatuaina.
Mai ia Rachel: Faailoaga o le Alofa
Sei o tatou tilotilo la i ai, teine (ma tama), e manaia le iloa e alofa se tasi ia te oe. Ma afai e te faaipoipo, e te maua avanoa e faasoa atu ma maua mai ai le alofa i aso uma! Ina ua ou talanoa i ou matua e uiga i le avanoa e faaipoipo ai ia Ben, na fai mai lo’u tama, “Po o ai lava e te filifili e faaipoipo i ai, ou te manao ia te ia e faaleo soo atu ma le faamaoni lona alofa mo oe e pei ona faia e Elder Richard G. Scott mo lana ava.”3 Na ou faalogo i a Tama.
Sa ou filifili e faaipoipo i a Ben, ma e taumafai pea lava o ia e faaleo mai lona alofa ia te au i ni auala laiti ma tetele. I le taimi o lo’u tausaga faaiu i le kolisi, sa ou galue mo ni masina e saunia, talosaga, ma faatalanoa mo se galuega faamasani lelei. Ma ina ua ou faalogo mulimuli ane sa ou mauaina le galuega, sa ou sau i le fale ma vaaia se meatuuteu e tumu i fugalaau mai lo’u toalua. Sa ia iloa le faigata na ou galue ai ma le taua tele o le galuega faamasani ia te au. I nisi taimi, na te natia la’u meainu e fiafia i ai faatasi ma se tamai tusi o le alofa i le pusa aisa a o lei alu atu mo le tolauapiga a le Sikauti i se faaiuga o le vaiaso. Ma o aso uma, o le a ia fufuluina ipu ma faa ata au. O Ben e maoae i le faaalia o lona alofa mo au, ma o le mea lena e aumai ai ia i maua uma le olioli tele.
Mai ia Ben: Fiafiaga Sili Atu
O le Tafao Faamasani ia Rachel o se matuai mea fiafia lava. O le mea moni, ia tatou mautinoa o loo tatou o pea i tafaoga faamasani e tusa lava po o se ulugalii faaipoipo. Ina ua uma ona ma feiloai muamua, na ma iloa ai ma te fiafia i le tele o gaoioiga e tutusa: savavali i le paka, auai i le tala faatino, matamata i taaloga, aai i meaai fou ma le eseese, faalogologo i musika, ma le tele lava o isi. Sa ou fiafia i le faia o nei mea ae ou te lei feiloai ia Rachel, ae ua sili atu nei le fiafia i ai ona ua ma faasoaina faatasi. Pe a e faaipoipo, ua e maua se tasi e ola fiafia faatasi ma—e matagofie ai le olaga.
Mai ia Rachel: Se Soa Faifeautalai Faavavau
Ae ou te lei feiloai ia Ben, sa toeitiiti atoa ou tausaga o le galuega faafaifeautalai ma na mafaufau loloto e auauna atu i se misiona talai. Ae oo mai loa Ben i lo’u olaga, ma na ou iloaina sa ese se fuafuaga a le Tama Faalelagi mo a’u.
Ina ua ma faamau ma Ben, o tagata o le aiga na iloa ou mafaufauga i le auauna atu i se misiona na fesili mai ia te au e uiga i la’u filifiliga, ma o le a ou tau atu ia i latou, “Sa ou filifili ou te fia pikiina lau lava soa faifeautalai—ma tumau ia te ia mo le faavavau.”
Pe a lua faaipoipo, o oe ma lou toalua e maua le avanoa e auai faatasi i le galuega o le faaolataga. Ua ma maua ma Ben le olioli sili i le fausiaina o se aiga e faatutotonu ai Keriso, o le suesueina ma ola faatasi i le talalelei, auauna atu i le Ekalesia, ma valaaulia isi e o mai ia Keriso. A o ma galulue faatasi e fausia le malo o le Atua, ua sili atu lo ma ola vavalalata, faalolotoina ai lo ma alofa, ma o le olaga ua sili atu ona faamanuiaina.
Talitonu Mai ia i Maua
E ui lava i mea atonu o loo fai mai ai le lalolagi, o le faaipoipoga e matagofie ma e matuai aoga lava le faia, o se mea e faamuamua. Pe a e faaipoipo, ua ia te oe se soa taalo, e te tuuina atu ma maua mai le alofa, e sili atu lou olioli atoatoa i le olaga, ma ua e maua se tasi e fausia faatasi le malo o le Atua. O mea uma na e aumai ai ia i maua le olioli tele, ma talu ai sa faamauina i maua i le malumalu, e mafai ona ma mauaina lenei olioli e faavavau! Afai tatou te tausia a tatou feagaiga, o le a tatou faatasi mo le faavavau ma maua faamanuiaga silisili o le perisitua. Ua ma “maua ai i le faaipoipoga le faataunuuina sili ona faaoaina o le olaga o le tagata.”4