Sa tu na Veivuke me baleti Ira e Tarai ira tu na Revurevu ni Nona Vakatotogani tu e Dua na Nodra Daulomani

O ira na watidra kei na nodra matavuvale e tarai ira tu na revurevu ni nona vakatotogani tu e dua na nodra daulomani e rawa ni ra goleva e dua na idusidusi vou ena initaneti me ra kunea kina na veivuke, inuinui, kei na veivakabulai.

Na Spouse and Family Support Guide, ka na kunei ena AddictionRecovery.lds.org, e kena inaki me ra vukei kina na watidra kei na lewe ni matavuvale me ra vakabulai mai na veibolebole era sotava tu ena vuku ni itovo era vakatotogani tu kina nodra daulomani ena waigaga, alakaolo, iyaloyalo vakasisila, kei na veika se itovo dau veivakalolomataki tale eso. Me ikuri ni Vakavalagi, ena dua na gauna walega oqo sa na tu talega ena vosa vaka: Sipeni, Potukali, Varanise, Itali, Jamani, Rusia, Jaina, Japani, kei Korea.

E wasei vaka 12 na idusidusi ka vakanamata ki na veivakabulai, vakalevutaki ni inuinui, kei na kunei ni kaukauwa mai vei Jisu Karisito.

Sa vakarautaki tu e vuqa na vakatutu me cakacakataki, me vaka na kena vakotori na iyalayala kei na lawa, na ivakarau me veitalanoataki kina kei na noda daulomani na veivakatotogani kei na noda lako tani mai kina, kei na ivakarau me da sotava kina vakadodonu na lesutale ki na itovo ni vakatotogani.

Na idusidusi oqo e dau vakayagataki ena veivosaki ni soqoni taqomaki nei watina kei na ilawalawa veitokoni ni matavuvale ka ratou dau vakarautaka na tabana ni Veiqaravi ni Matavuvale ni YDE. E rawa talega ni vakayagataki ena kena vulici yadua se ra vakayagataka na iliuliu ni Lotu ena nodra veivakatarogi ka veivakasalataki.