2014
Veivuke na Tabana ni Veivukei ni YDE
Noveba 2014

Veivuke na Tabana ni Veivukei ni YDE

Me tekivu mai na veisiga taumada ni Veivakalesui mai, era sa dau kilai tu na lewe ni Lotu i Jisu Karisito ni Yalododonu Edaidai ena nodra dau yalodina me ra yacovi ira yani ka laveti ira cake era vakaleqai tu.

Ena veiyabaki sa oti, ena nodra dau cau ena lomasoli na lewe ni Lotu kei ira tale eso, sa vakarautaki kina na sala me vakalougatataki kina na nodra bula na lewei vuravura mai na parokaramu ni Veiqaravi Raraba ena Lotu. Ena yabaki 2013 ga, era a vukei kina e sivia na 10.5 na milioni na tamata ena 130 na matanitu mai na parokaramu ni veivuke raraba ni YDE.

Na sasaga oqo e okati kina na vakarautaki ni iyaya me logavinaka ka tokoni kina na bula ki na vakarautaki ni wai savasava; ki na nodra tuberi na vunikalou kei na vuniwai me ra vakabulai kina e udolu vakaudolu na gone sucuvou; ki na vakarautaki ni wilijea. Me kena ikuri, dau veivuke na Lotu ena qaravi ni mata kei na veituberi, veicula, ka ra vukei na veitikotiko ena kena tei na kakana bulabula.

Veivuke Vei Ira na Tiko Vakadro

Sa dau sasaga vagumatua e veigauna na Lotu me vukei ira na tiko vakadro vakakina o ira era tiko veilecalecavi kei na leqa ni kakana. Walega Oqo:

  • A solia na Lotu e udolu vakaudolu na valelaca kei na kakana taumada ki na veimatavuvale mai Chad ka tara na tobuniwai pamutaki e liga, valelailai, kei na valenisili ena nodra keba na tiko vakadro mai Burkina Faso.

  • Mai Joritani, Siria, Lepanoni, Iraki, kei na yasayasa vaka-Kurdish, a veisoliyaka kina na tabana ni Veivukei ni YDE na pakete kakana, itutuvi, iyaya ni veiqaravi vakavuniwai, kato ni tiko bulabula, iyaya ni moce, kei na isulu ni katakata. Ena yasayasa vaka-Iraki kei na Kurdish, sa vakau vei ira na vakamavoataki ena veivorati eso na wilijea kei na iyaya tale eso ni veitosoyaki.

  • Mai Gaza, a soli ki na valenibula levu na wainimate, iyaya ni veiqaravi vakavuniwai, kei na sucu pauta.

  • Mai Isireli, a soli na iyaya ni veiqaravi ena ultrasound ki na dua na valenibula.

  • Mai Ukraine kei Rusia, sa duavata kei na United Nations Development Program na Lotu ena vakarautaki ni kakana, iyaya ni moce, isulu, kei na iyaya ni tiko bulabula ni tamata yadua me baleti ira e 30,000 na tamata a vakacacani na nodra itikotiko ena tiko yavavala ena loma ni vanua.

Cakacaka na tabana ni Veivukei ni YDE me tuvakataki koya vakapolitiki ka vukei ira na tamata ena matavakabauta kecega.

Sasaga ni Veivueti

Sa dau veivukei talega na Lotu ni yaco na leqa tubukoso sega ni namaki.

  • Mai Sierra Leone kei Liberia, sa vakaitavitaki ira e 1,600 na voladia mai kea na Lotu me ra veituberi ena ivakarau ni kena levei na Ebola ka vakarautaki na kakana kei na ivakarau taumada ni tiko savasava kei na iyaya ni veiqaravi vakavuniwai.

  • Ni oti na waluvu ka vu mai na monsoon kaukauwa a ravuti Pakistan kei Idia, a vakarautaka na Lotu na kakana, kato ni tiko bulabula, kei na iyaya ni veiqaravi vakavuniwai.

  • Mai Toga a vakarusa e dua na cagilaba kaukauwa e vica na drau na vale, okati kina na nodra vale e 116 na matavuvale lewenilotu. Era na veivuke na lewenilotu ena kena taracake tale nodra vale. Era tuberi ena ivakarau me ra taracake kina na nodra vale ka ra qai kerei me ra vukea ke lailai me va tale na tamata ena nodra taracake na nodra. Sa veivakacokotaki tale ga na Lotu ena nodra itei ka veituberi me baleta na teitei e yasanivale.

  • Mai Mexico, ni vakacacana se vakarusa e dua na cagilaba e udolu vakaudolu na vale, era vakarautaka na veiliutaki ni Lotu e kea na kakana kei na wai vei ira na lewenilotu era vakaleqai, ka cakacaka vata kei na matanitu na Lotu me vakarautaka na kato kakana.

Na Cava e Rawa ni o Cakava

Na cau ki na iLavo ni Veivuke Raraba e rawa kina ki na Lotu me sotava vakatotolo na leqa tubukoso eso. Me kena ikuri, se vanua cava ga era tiko kina, e rawa ni ra vakaraitaka na lewenilotu na loloma Vakarisito, veiqaravi, ka taracake na veirokorokovi vei ira na tamata kecega. Noda raici ira na tiko vakadro kei ira na curuvanua mai ena noda veitikotiko, se o koya e sotava tiko e dua na leqa, ka vakaitokanitaki koya, kauwaitaki koya, ka vakarautaka e dua na draki ni veikidavaki vinaka vua sa ivalavala Vakarisito ka na sega sara ni talewale.

Mai na liga ni kena veiqaravi raraba, sa segata tiko na Lotu me cakacakataka na ivakasala nei Peresitedi Thomas S. Monson ni “rawa ni da veivaqaqacotaki; e tu vei keda na kaukauwa me da raici ira era sega tu ni laurai. Ni tiko na matada me raica, na daligada me rogoca, kei na yalo me kila ka vakila, sa rawa ni da dolele yani ka veivueti” (“The Call to Serve,” Liahona, Janu. 2001, 58).

Rau sota kei ira na isenivalu na Peresitedi ni Tikina na Amman Jordan kei luvena goneyalewa.

SARAH JANE WEAVER, CHURCH NEWS