Faariro i te amuiraa ei tuhaa no to tatou oraraa

A feruri ia faaohipa i te tahi o teie mau ohiparaa e mau uiraa ei reni haamataraa no te hoê tau‘araa parau utuafare e aore râ no te tuatapaparaa a te taata iho.

Na te mau tamarii

Ua faaite o Elder David A. Bednar no te Pŭpŭ no te Tino Ahuru Ma Piti Aposetolo i te hoê aamu o tei faari‘ari‘a ia’na i muri a‘e i te parari-hape-raa ia’na te hoê hi‘o o te hoê fare toa tapiri i o’na (api 46) I muri iho ua haapii mai oia e ia hi‘o ana‘e tatou ia Iesu Mesia e ia pee atu Ia’na, e nehenehe tatou e farii i te hau eiaha ra te ri‘ari‘a. Eaha ta outou e nehenehe e rave i te mau mahana atoa no te tauturu i ta outou mau tamarii ia hi‘o i te Faaora ? Nahea outou ia haapii ia ratou ia haere i mua na roto i te Mesia noa’tu e mau tau fifi roa ?
Ua faati‘a te tuahine Linda K. Burton, peresideni rahi no te Sotaiete Tauturu, no ni‘a i te hoê utufare o tei haere i roto i te hoê fare apî e aita i hamanihia te aua (api 29). Ua tapa‘o te metua tane i te mau oti‘a i te hoê taura e ua parau i ta’na mau tamarii e e paruruhia ratou mai te peu e faaea noa ratou i roto mai i te reni. Ua haapa‘o te mau tamarii, noa’tu e ua pee atu te popo i te tahi pae o te taura. Nahea te mau metua e nehenehe e tauturu i te mau tamarii ia vai paruruhia ? Eaha te mau haamaitairaa o te tae mai na roto i te faarooraa i to outou mau metua ? Eaha te mau oti‘a ta te Metua i te Ao ra i horo‘a mai ia tatou ?
Ua faati‘a te episekopo Gérald Caussé, tauturu hoê i roto i te Episekoporaa Faatere Rahi, te hoê aamu no ni‘a e toru taata no Afirita o tei taahi e piti hepetoma na ni‘a i te mau purumu varivari no te haere i te hoê amuiraa mataeinaa (api 98) ! Ua faaea’tu ratou hoê hepetoma ia nehenehe ratou ia rave i te oro‘a mo‘a a ho‘i atu ai io ratou. I muri iho ua amo ratou i te mau afata tei î i te mau buka a Moromona i ni‘a i to ratou upoo no te opere i te mau taata i roto i to ratou oire. Te mana‘o anei outou e te evanelia ei hoê ohipa faahiahia ? Eaha te mau tusia ta outou i ineine i te rave no te ora i te evanelia ?

Na te feia apî

E rave rahi mau a‘oraa i teie amuiraa tei faatumuhia i ni‘a i te faufaa rahi o te utuafare e te fare [nohoraa]. Ei hi‘oraa, ua ani te tuahine Bonnie L. Oscarson, peresideni rahi no te Feia Apî tamahine, i te mau melo o te Ekalesia ia « paruru i te fare ei vahi piti no te mo‘araa i muri noa mai i te hiero » Eaha te ti‘a ia outou ia rave no te paruru i te fare [nohoraa] ? Nahea outou ia tauturu no te faariro i to outou fare ei vahi mo‘a ?
Ua haapii mai o Elder Russell M. Nelson no te Pŭpŭ no te Tino Ahuru Ma Piti Aposetolo e to tatou huru e ta tatou raveraa i te mahana sabati ua riro ei hoê tapa‘o i rotopu i te Metua i te Ao ra e tatou (api 129). A tai‘o ai outou i te a‘oraa a Elder Nelson, a feruri i ni‘a i teie sabati e haere mai nei e a ui ia outou iho, « eaha te tapa‘o ta’u e hinaaro e horo‘a i te Atua ?
Ua parau o Elder Ulisses Soares ni te Hitu Ahuru, no ni‘a i te hoê diakono o tei pee i te hi‘oraa o te tapene Moroni (api 70). I to te tamaiti apî iteraa i te tahi mau hoa piha haapiiraa i te mata‘ita‘iraa i te mau hoho‘a faufau i ni‘a i ta ratou niuniu afa‘ifa‘i, ua parau oia ia ratou e te raveraa ratou i te ino e e mea ti‘a ia ratou ia faaea. Ua faaea te hoê hoa. Nahea tatou ia farii i te puai no te ma‘iti i te maitai ? » Nahea tatou ia ite e e mea papû no tatou no te oaoa ?
E nehenehe te mau mauhaa roro uira e riro ei ohipa faahiahia no te mea e horo‘a mai te reira i te faaiteraa oti‘a ore no te mau haamaramaramaraa e te mau rave‘a haaparareraa. Teie ra ua faaea anei outou e ua ui ia outou iho e mai te peu e na te reira e faatere ra ia outou ? Ua parau o Elder José A. Teixeira no te Hitu Ahuru e, « e mea pua‘ia‘i ia tuu outou i te hiti ta tatou mau materia afa‘ifa‘i i te tahi taime » (api 96) A tamata. A ma‘iti i te hoê taime fatata i te hoê mahana ia haere ma te materia afa‘ifa‘i ore. E au ra mai te hoê ohipa hopea ta outou i hinaaro i te rave, teie ra e maere outou ia ite e hia taime to outou paraparauraa e te raveraa i te mau haamana‘oraa e to outou mau hoa e utuafare.
Ua riro te haapaeraa maa ei hoê rave‘a maitai a‘e no te farii mau i te mana pae varua. Ua faahaamana‘o mai te peresideni Henry B. Eyring, tauturu hoê i roto i te Peresideniraa Matamua ia tatou e ua haapuai te haapaeraa maa e te pure ia Iesu i mua i te mau faahemaraa a satane a vai ai te Faaora i roto i te medebara (api 22) I te sabati haapaeraa maa i mua, a tamata i te pee i te hi‘oraa o Iesu e a haapae i te maa ma te hoê opuaraa. E farii outou i te tauturu hanahana e te parururaa atoa.

Na te feia paari

E rave rahi mau taata a‘o i te amuiraa tei paraparau mai no ni‘a i te faufaa rahi o te faaipoiporaa e te utuafare i roto i te sotaiete e i roto i te faanahoraa no te faaoraraa. E nehenehe outou e pahono i na e pae uiraa ta te tuahine Burton i ui i te api 31 e ia feruri ma te pure nahea outou ia turu maitai e ia here i te feia fatata ia outou ? Ei hoê utuafare, a aparau nahea outou ia faatutonu maitai i to outou fare [nohoraa] i ni‘a ia Iesu Mesia e nahea outou ia turu maitai i te tahi e te tahi.
Ua faahaamana‘o mai te peresideni Thomas S. Monson ia tatou no te mau haamaitairaa o te tae mai na roto i te haamoriraa i te hiero, oia’toa i te pae varua, te hau, e te puai no te faaoroma‘i i te mau tamataraa e te mau faahemaraa (api 91). « A haere ai tatou i te hiero », ua parau oia, « e nehenehe e tae mai i roto ia tatou te hoê faito varua taa ê e te hoê manaʻo hau tei rahi atu i te tahi noa’tu huru manaʻo e tupu mai i roto i te aau o te taata ». Eaha ta outou e nehenehe e rave no te faariro i to outou haereraa i te hiero ei ohipa maitai atu â ?
Te faaroo ia Iesu Mesia o te hoê ïa parau tumu no te ohipa. « Eita tatou e ti‘aturi ta‘ue noa mai i te Faaora e i Ta’na evanelia, e eita roa’toa tatou e pure ta‘ue noa e e aufau ta‘ue noa mai i te tuhaa ahuru », ua parau o Elder L. Whitney Clayton no te peresideniraa o te Hitu Ahuru. « E ma‘iti papû tatou ia ti‘aturi » (api 36). A tai‘o ai outou i ta’na a‘oraa e te mau a‘oraa a Elder Dallin H. Oaks no te Pŭpŭ no te Tino Ahuru Ma Piti Aposetolo (api 32) ; Rosemary M. Wixom, peresideni rahi o te Paraimere (api 93) ; Episekopo Gérald Caussé (api 98) ; e ta Elder Kevin W. Pearson no te Hitu Ahuru (api 114) a feruri i te hamani i te hoê tapura no te mau rave‘a o te haapuai i to outou faaroo ia Iesu Mesia e i Ta’na evanelia. I muri iho a hamani i te hoê tapura no te mau haamaitairaa i fafauhia o te tae mai na roto i te maraaraa te faaroo.
Ua haapii mai o Elder Jeffrey R. Holland no te Pŭpŭ no te Tino Ahuru Ma Piti Aposetolo e e faatia te Taraehara a te Faaora e te Ti‘a-faahou-raa i « te faaʻiteraa puai roaʻe ïa no te here hanahana i roto i te tuaaai o te ao nei » (api 104) Nahea to outou mau mana‘o, ta outou mau parau, e ta outou mau ohipa e nehenehe e faaûru maitai i to outou faahiahia no te ohipa ta te Faaora i rave ?
Ua faataa mai te peresideni Dieter F. Uchtdorf, tauturu piti i roto i te Peresideniraa Matamua te mau horo‘araa semeio o te aroha e te faufaa rahi no te haapa‘o e te tatarahapa. « Ia tamata tatou i te haroaroa i te horoʻa o te aroha mau o te Atua ma to tatou aau atoa e to tatou varua atoa, na te reira e horoʻa mai ia tatou paatoa i te mau tumu hau atu no te here e no te faaroo i to tatou Metua i te Ao ra ma te haehaa e te aau mehara », ua parau oia (api 107) A feruri a tamau noa ai i ta outou tuatapaparaa no te aroha ma te tai‘o Roma 3:23; 6:1–4; 2 Nephi 25:23, 26; Mosia 2:21; 5:2; 27:25; Alama 34:10, 15; Etera 12:27; e Moroni 10:32.