Elder Hugo Montoya

Pŭpŭ matamua no te Hitu Ahuru

Ua maere roa o Elder Hugo Montoya i te pii-raa-hia oia i roto i te pŭpŭ matamua no te Hitu Ahuru. Ua ite oia i te mahanahana i roto i te mau parau mărû a te peresideni Thomas S. Monson i roto i te hoê apooraa haapiipiiraa na te mau hui mana faatere rahi : « Tei ô nei outou no te mea ua here outou i te Faaora ». Ua putapû te aau o Elder Montoya ma te ite ua tuu to’na piiraa apî ia’na i te pae o te Fatu.

« Ua here au i te Faaora, e e haere au i te vahi e titauhia mai ia’u ia haere », ta’na ïa parau. « E rave au i te mea e titauhia mai ia’u ia rave. E parau vau i te mea e titauhia mai ia’u ia parau ». Ua paturuhia o Elder Montoya i roto i te tuhaa pureraa no te avatea mahana maa o te 185raa o te amuiraa rahi matahiti a te Ekalesia.

Ua ite-atoa-hia ia Elder Montoya te puai i roto i te faufaa tumu o te faaroo utuafare. Ua riro to’na metua tupuna o Rafael Monroy ei taata faufaa i roto i te aamu o te Ekalesia i Mexico. I te matahiti 1915 ua haruhia te taea‘e Monroy e te hoê hoa melo, o Vicente Morales, na te hoê pŭpŭ taata orure hau i roto i te orureraa hau no te fenua Mexico. Ua parauhia ia raua e, e tuuhia raua mai te mea e, taa ê noa’tu te tahi atu mau aniraa, e haapae raua i ta raua faaroo.

Ua pato‘i raua e ua pupuhi-pohe-hia raua na te pŭpŭ taata pupuhi.

Ua parau o Elder Montoya e, ua vai noa te hi‘oraa o to’na metua tupuna ei faaururaa puai i roto i to’na oraraa. « Ua haapii au e, e nehenehe te reira mau mana‘o ri‘ari‘a e haavîhia na te mau mana‘o o te faaroo e te iteraa papû, ia ite ana‘e outou e, te rave ra outou i te mau ohipa ti‘a ».

Ua fanauhia Elder Montoya i te 2 no eperera 1960, i Fresno, Kalifonia, na Abel Montoya e o Maclovia Monroy. Ua ora oia i te pae rahi o to’na oraraa i Mexico.

Ua faaipoipo oia ia Maria del Carmen Balvastro i Hermosillo; ua taatihia raua i roto i te hiero no Mesa Arizona i te 6 no eperera 1983. E pae tamarii ta raua.

I muri a‘e i to’na haaraa ei misionare rave tamau i roto i te misioni no Mexico City North, mai te 1979 e tae atu i te 1981, ua tavini oia ei peresideni no te feia apî tamaroa o te paroisa, ei melo apooraa teitei, e ei episekopo, ei peresideni tĭtĭ, ei taata hi‘opo‘a faufaa no te area, e ei Hitu Ahuru area.

Ua haafeti‘ahia oia i te fare haapiiraa teitei no te tuhaa no Sonora i te matahiti 1986 i te parau tu‘ite no te pae faaapu, e ua rave i te ohipa i roto i te mau ti‘araa faatere e rave rahi e ei orometua haapii no te haapiiraa evanelia.