M. Joseph Brough

Tauturu piti i roto i te peresideniraa rahi o te Feia Apî Tamaroa

I roto i na matahiti e toru a tavini ai o M. Joseph Brough ei peresideni no te misioni no Guatemala Guatemala City Central (mai te 2011 e tae ati o te 2014), ua pohe to’na metua tane e to’na metua tane hoovai.

Noa’tu e ua ti‘a i ta’na vahine ia ho‘i i te fenua Marite no te hunaraa, ua faaoti raua e, e faaea noa oia i Guatemala e e tamau noa i te rave i ta raua ohipa misionare. « Ua ite maua e mea maitai no maua ia faaea noa e ia rave noa mai te ti‘a ia maua ia rave », te parau ïa a te taea‘e Brough, tei piihia i te 4 no eperera 2015, ei tauturu piti i roto i te peresideniraa rahi o te Feia Apî Tamaroa. « Tera mau ta to’na metua tane e ta to’u metua tane e hinaaro ia maua ».

Ua fanauhia te taea‘e Brough i Roto Miti, Utah, i te 11 no titema 1963, na Monte J. raua o Ada B. Brough. Ua paari oia i Farmington, Utah e i Rohertson, Wyoming. Ua faanuu te utuafare i Minesota i te taime a piihia ai te metua tane o Joseph, ei peresideni misioni, e ua tavini ei melo no te Hitu ahuru i muri a‘e. E taure‘are‘a o Joseph i roto i te fare haapiiraa tuarua i te taime a faaoti ai to’na metua tane i ta’na taviniraa ei peresideni misioni. Aita o Joseph i ho‘i i te fare haapiiraa tuarua, ua rave râ oia i te hoê hi‘opo‘araa aifaito e ua haere ti‘a roa no roto mai i te fare haapiiraa tuatoru no Weber State i Ogden, Utah.

Tera râ, ua onoono to’na na metua ia roaa ta’na parau tu‘ite no te haapiiraa evanelia e maha matahiti. Tei roto oia i te haapiiraa evanelia i te fare haapiiraa tuarua no Davis i farerei ai oia i ta’na vahine no amuri a‘e, o Emily Jane Thompson. Ua faaipoipohia raua i te 25 no eperera 1985 i roto i te hiero no Roto Miti; e na metua raua no na tamarii e maha.

Hou a faaipoipohia ai raua, ua tavini te taea‘e Brough ei misionare i roto i te misioni no Guatemala Quetzaltenango. Ua riro mai to’na peresideni misioni, Jorge H. Perez, « ei taata mana roa i roto i to’u oraraa », te na reira ra oia.

Ei taata tei haamau e tei fatu i te ‘Rotational Molding of Utah’, ua roaa ia’na te parau tu‘ite Licence no te pae matuturaa moni e te parau tu‘ite Maîtrise no te faatereraa puturaa faufaa no roto mai i te fare haapiiraa tuatoru no Utah. I roto i te Ekalesia ua tavini oia ei episekopo, ei peresideni Feia Apî Tamaroa no te paroisa e ei melo apooraa teitei.