Te imiraa i te Fatu
Na Elder José A. Teixeira
No te Hitu Ahuru
Ia faahohonu anaʻe tatou i to tatou haroʻaroʻa i te Faaora, e puai mai to tatou hinaaro ia ora ma te oaoa, e e roaa mai te tia’turiraa papû e, e nehenehe ia oaoa.
E to’u mau taeaʻe e mau tuahine here, te tiʻa nei au i mua ia outou ma te oaoa rahi a amui paatoa ai tatou i roto i teie amuiraa rahi. Ua riro te faarooraa i te mau parau paari, te mau faaitoitoraa, te mau tamahanahanaraa e te mau faararaa tei horoʻahia i roto i te mau amuiraa rahi e rave rahi matahiti i teie nei, ei haamaitairaa faito ore no te tuahine Teixeira, to maua utuafare e no’u iho nei.
I teie tau taa ê o te matahiti, oia hoʻi i teie sabati Pasa, te haamanaʻo maitai nei au i te auraa o te mau haapiiraa o te Faaora e To’na hiʻoraa marû e te here i roto i to’u oraraa.
E horoʻa mai te hoê haroʻaroʻa hohonu no Iesu Mesia i te hoê tiaʻiraa rahi aʻe i te ananahi, e noa’tu â to tatou mau hapehape, i te tiʻaturiraa rahi aʻe no te rave hope roa i ta tatou mau opuaraa tano. E horoʻa atoa mai te reira i te hinaaro rahi aʻe ia tavini i to tatou taata tupu.
Ua parau te Fatu e, « A imi mai ia’u nei i to mau manaʻo atoa nei, eiaha e feaa, eiaha e mataʻu ».1 Te imiraa i te Fatu e te iteraa i To’na varua, e ohipa ïa no te mahana tataʻitahi, e e tautooraa hoona.
Te mau taeaʻe e mau tuahine, i teie mahana hau atu i te tahi atu taime, te vai nei i mua ia tatou te mau raveʻa taa ê e te mau mauhaa no te faahohonu i to tatou haroʻaroʻa i te mau haapiiraa a Iesu Mesia e i To’na Taraehara. Na te faaʻohipa-tano-raa i teie mau raveʻa e tauturu mai ia tatou ia ora i te oraraa auhune tei î te oaoa.
I roto i te parabole a te Faaora no niʻa i te vine e te mau amaa, ua parau oia : « A ati mai ia’u, e na’u e ati atu ia outou : mai te amaa eita e hotu noa oia anaʻe ra, ia ore ia ati mai i te vine ra ; e ore atoa outou ia ore ia ati mai ia’u ra ».2
A rahi noa’tu to tatou haroʻaroʻa i te ohipa faahihia a te Mesia i roto i to tatou oraraa, a papû noa’toa’tu te tumu tatou i roto i te tahuti nei, oia hoʻi ïa, ia noaa mai te oaoa. Eita râ teie oaoa e faaatea ia tatou i te mau ati e te mau fifi, e te vai ra e mea rahi mau e te fifi mau, e e riro roa paha tatou i te manaʻo e, eita te oaoa e noaa i te reira mau taime.
Ua ite au na roto i to’u iho oraraa e, e nehenehe te oaoa no te oraraa parau tiʻa e no te auraroraa i te Mesia e tupu noa mai noa’tu teie mau ati, tapaʻo rahi hoʻi no te tahuti nei. I te hopea, pinepine teie mau ati i te faaapî, i te haamaitai e i te arataʻi tiʻa ia tatou i te hoê haroʻaroʻa rahi aʻe i te opuaraa o to tatou oraraa i te tahuti nei e i te Tarahaere o Iesu Mesia. Oia mau, e mea na roto noa ia Iesu Mesia te îraa o te oaoa e roaa mai ai.3
Ua parau Oia e, « O vau te vine, o outou te amaa. O te ati mai ia’u ra, e o te ati atu vau ia’na ra, oia te hotu rahi ; i taa ê atu outou ia’u ra, aore roa ïa e mea e tia ia outou.4
Te tiʻaturi nei au e, ia faahohonu anaʻe tatou i to tatou haroʻaroʻa i te Faaora, e puai mai to tatou hinaaro ia ora ma te oaoa, e e roaa mai te tia’turiraa papû e, e nehenehe ia oaoa. Ei faahopearaa, e noaa mai ia tatou te aravihi rahi aʻe no te ora i te mahana tataʻitahi ma te anaanatae i te ora e te te haapaʻoraa i te mau faaueraaa a te Atua, noa’tu te mau taime fifi.
Eiaha e vaiiho no ananahi te mau ohipa o ta tatou e nehenehe e rave i teie mahana. A haere i teie nei ihoa taime i te Mesia inaha « mai te mea e faaroo to tatou Ia’na, e rave ïa tatou i te ohipa oi parauhiʻai e o teie nei â mahana ».5
I te mahana tataʻitahi, e mea tiʻa ia tatou ia feruri i te rave-pinepine-raa i te ohipa ia au i te mau haapiiraa a te Mesia. E riro te mau ohipa haʻihaʻi e te ohie e ravehia nei i te mahana tataʻitahi i te :
-
Faahohonu i to tatou haroʻaroʻa i te auraa no tatou te Fatu i roto i to tatou oraraa, e
-
Tauturu ia tatou i te faaʻiteraa i te reira haroʻaroʻa i te mau uʻi e tiʻa mai nei, e o te riro i te farii ma te papû i te here o te Metua i te Ao ra e o Ta’na Tamaiti, Iesu Mesia, a ite noa ai ratou i to tatou hiʻoraa no te oraraa i te evanelia ma te parau tiʻa.
No reira, e aha te tahi o te mau raveraa ohie o teie anotau o te riro mai ei raau no to tatou mau varua i roto i te haapuairaa i to tatou iteraa papu no te Mesia e no Ta’na misioni ?
I te matahiti 2014, ua farii te tataʻuraa hohoʻa a te National Geographic e 9 200 hohoʻa na roto mai i te mau taata pata hohoʻa e te mau avatau no roto i na fenua 150. Te faaʻite nei te hohoʻa rê i te hoê vahine i te ropu o te hoê pereoo auahi tei î i te mau horopatete. Te mori no roto mai i ta’na niuniu afaʻifaʻi te turama ra i to’na hohoʻa mata. Te horoʻa nei oia i te hoê tapaʻo faaʻite papû maitai i te tahi atu mau horopatete e : noa’tu te reira to’na tino, mai te huru ra e, aita oia i reira.6
Na roto i te mau haaputuraa ite afaʻifaʻi (données mobiles), te mau niuniu afaʻifaʻi smartphone, e te mau raveʻa natirara sotiare (réseaux sociaux), ua taui rahi roa to tatou huru i roto i te ao nei e te huru tatou e faaʻite nei i to tatou mau manaʻo i te tahi e te tahi.
I roto i teie puʻe tau no te roro uira, e nehenehe ta tatou e haere vitiviti i te mau vahi e te mau ohipa o te faaatea ia tatou i te mau mea faufaa no te hoê oraraa î i te oaoa vai maoro.
E nehenehe teie oraraa natirara, mai te peu eita te reira e haapaʻohia, ia horoʻa i te faufaa rahi i te mau auraa e te mau taata mataro-ore-hia e o te ore â tatou i farerei atura, i te mau taata e ora ra e o tatou―to tatou iho utuafare !
I te tahi atu pae, ua ite paatoa tatou e, ua haamaitaihia tatou i te mau materia i niʻa i te reni itenati hau atu i te maitai, mai tera ta te Ekalesia i hamani, mai te mau raveʻa taiʻo e faarooroo o te mau papaʻiraa moʻa e te mau amuiraa rahi, te mau hohoʻa i hamanihia no niʻa i te oraraa e te mau haapiiraa a Iesu Mesia, te mau faanahoraa no te haruharu i to tatou aamu utuafare, e te mau raveʻa no te faaroo i te pehe faaûru maitai.
Te mau maʻitiraa e te mau ohipa matamua o ta tatou e rave i to tatou mau taime i niʻa i te mau reni itenati, e mea faufaa rahi ïa. E nehenehe i te reira ia faaoti i to tatou haereraa i mua i te pae varua e to tatou paari i roto i te evanelia e to tatou hinaaro ia faatupu i te hoê ao maitai e ia ora i te hoê oraraa hou atu i te hotu maitai.
No te reira mau manaʻo, te hinaaro nei au e faahiti e toru peu ohie o te faatupu i te ohiparaa maitai i niʻa i te reni itenati. E riro te reira mau peu i te faatupu i te uiuiraa i roto ia tatou iho, i te mahana tataʻitahi, o te mea titauhia hoʻi no tatou no te haafaatata atu i te mau haapiiraa a to tatou Metua i te Ao ra, e ta’na Tamaiti, Iesu Mesia.
Peu numera 1: A hiʻo haere i te tahua itenati a te Ekalesia no te mau materia
E tauturu te hiʻo-pinepine-raa i teie mau materia i roto i te hepetoma ia vai ara ohie noa i te mau haapiiraa a te evanelia e ia faaitoito i to tatou utuafare e mau hoa ia feruri hohonu i niʻa i te mau ohipa faufaa mau.
Peu numera 2: A tapaʻo i to outou iʻoa i niʻa i te mau raveʻa natirara sotiare a te Ekalesia
Na te reira faaotiraa e afaʻi mai i mua i ta oe matini roro uira te mau parau tumu faufaa no te faahohonu i ta outou maʻimiraa e to outou imiraa i te Fatu e Ta’na mau haapiiraa, e e riro te reira i te haapuai i to outou hinaaro ia haroʻaroʻa i te evanelia. Hau atu, e tauturu te reira ia outou ia haamanaʻo e aha ta te Mesia e tiaʻi nei ia tatou tataʻitahi.
Mai te mea ra e, « aita e repo maitai aita te hoê taata faapu maitai »,7 aita atoa ïa e ôotiraa maitai i niʻa i te mau reni itenati aita anaʻe tatou e apapa maitai, i te haamataraa ihoa, i te mau mea e raʻehia i to tatou mau manimani rima e mau feruriraa.
Peu numera 3: A rave i te taime no te tuu i te hiti i ta outou mau matini afaʻifaʻi.
E mea puaʻiaʻi ia tuu i te hiti ta tatou mau materia afaʻifaʻi i te tahi taime, e, no te mono ia huri i te mau api o te mau papaʻiraa moʻa aore râ ia rave i te taime no te aparau i te utuafare e te mau hoa. I te mahana ihoa râ o te Fatu, a ite i te hau no te amuiraa i te hoê pureraa oroʻa ma te ore e hinaaro tamau noa ia hiʻo mai te mea ua tae mai te tahi poroʻi e aore râ te tahi piaraa.
E riro te peu no te tuuraa i te hiti i ta outou matini afaʻifaʻi i te tahi taime, i te haafaufaa e i te haaaano i to tatou hiʻoraa i te oraraa, no te mea te oraraa, e ere ïa i mua anaʻe i te hoê paruai maha initi (10 tenetimetera).
Ua parau te Fatu o Iesu Mesia, « Mai te Metua i here mai ia’u nei ra, ua here atoa’tu hoi au ia outou : ia vai herehia’tu â outou e au ».8 Ua hinaaro te Atua ia oaoa tatou e ia ite i To’na here. Na te Mesia e faatupu i te reira oaoa no tatou tataʻitahi. Ua faarii tatou i te mau raveʻa ia ite maitai atu Ia’na e ia ora i Ta’na evanelia.
Te faaʻite nei au i to’u iteraa papû no te oaoa o te itehia ia haapaʻo tatou i te mau faaueraa, e te hau e te fifi ore te fariihia ia auraro tatou i te here o te Metua i te Ao ra e o Ta’na Tamaiti, to tatou Faaora. I te iʻoa o Iesu Mesia, amene.