Ko e Fakamoʻoni ʻa Miá
ʻOku nofo ʻa e tokotaha naʻá ne faʻú ʻi Misuli, USA.
“ʻOku fanafana ʻa e Laumālie Māʻoniʻoní ʻi ha kihiʻi leʻo siʻi. ʻOkú ne fakamoʻoniʻi ʻa e ʻOtuá mo Kalaisi pea ʻokú ne ʻai hotau lotó ke fiefia” (Children‘s Songbook, 105).
Naʻe ʻosi taimi ke mohe ʻa Mia, ka naʻe ʻikai mohe ia. Naʻe tangutu ʻi he faliki ʻo hono lokí, ʻo fakakaukau ki ha meʻa naʻe lau ʻe Sisitā Tuvalu ʻi he Palaimelí: “ʻE hokosia ʻa e taimi he ʻikai lava ha tangata pe fefine ʻo moʻui ʻi ha maama naʻe kole.”1
Naʻe fakamatalaʻi ʻe Sisitā Tuvalu, “ʻOku tatau ha fakamoʻoni mo ha maama ʻi loto ʻiate kitautolu.” “Pea ʻoku tau fie maʻu haʻatau takitaha fakamoʻoni. Pea te tau toki lava leva ʻo toʻa ʻi he taimi ʻoku faingataʻa ai ʻa e moʻuí mo ʻahiʻahiʻi kitautolu ʻe Sētané.”
Naʻe falala atu e ʻulu ʻo Miá ki hono mohengá. Pea fakakaukau, “ʻOku ou fie maʻu ha fakamoʻoni pe ʻoku moʻoni ʻa e ongoongoleleí.” Ka naʻá ke maʻu fēfē ha fakamoʻoní? Naʻá ne ʻiloʻi ko e lotú ko hano konga ia.
Naʻá ne fakakaukau leva, “Teu lotu.” Te ne lotu pea he ʻikai tuku kae ʻoua kuo hoko ha faʻahinga meʻa ke ne ʻilo ai naʻe moʻoni ʻa e Siasí. Naʻá ne mateuteu ke lotu he poó kakato kapau naʻe pau ke ne fai ia!
Naʻá ne tūʻulutui leva. Naʻá ne fanafana pē, “Tamai Hēvani ʻOfeina, ʻoku ou fie ʻilo pe ʻoku moʻoni ʻa e Siasí. ʻOku ou fie ongoʻi ia ʻi hoku lotó mo ʻiloʻi.”
Naʻe tatali ʻa Mia. Naʻe ʻikai pē ke ne ongoʻi ha faʻahinga meʻa tukukehe pē ʻa e ongoʻi fiemālie naʻá ne faʻa ongoʻi ʻi he taimi naʻe lotu aí. Ko e hā e fehalaaki naʻá ne faí? Ko e fēʻia ʻene fakamoʻoní?
Naʻá ne tūʻulutui ʻi ha taimi naʻe ngali lōloa ʻaupito, feʻunga mo hano kiʻi fakaava mai ʻa e matapā ki hono lokí pea kiʻi fakasiosio mai ʻene tangataʻeikí.
Naʻá ne pehē, “Naʻá ku sio ki he maama ʻi he lalo matapaá.” “ʻOkú ke kei ʻā pē ʻo lautohi?” Peá ne toki fakatokangaʻi e loʻimata ʻi he kouʻahe ʻo Miá. Naʻe tūʻulutui hifo leva ʻo puke mai ʻa Mia. “Ko e hā e meʻa ʻoku hokó?”
Naʻe kiʻi fakalongolongo taimi siʻi. Peá ne ʻeke ange leva,“Tangataʻeiki, ʻokú ke maʻu fēfē ha fakamoʻoni?”
Naʻe kuku maʻu ia ʻe he Tangataʻeikí. “Ko ha fehuʻi lelei ia. Ko e fie maʻu ha fakamoʻoní ko e taha ia ʻo e ngaahi ʻuluaki sitepú.”
Naʻe ongoʻi ʻe Mia kuo kamata ke mole atu ʻa e fie tangí.
“Ko e maʻu ʻo ha fakamoʻoní ʻoku ʻikai ke faʻa hoko ia ʻi ha lotu pē ʻe taha. Pea naʻa mo e taimi ʻokú ke maʻu ai ha fakamoʻoní, ʻokú ke fie maʻu ke ke kei ngāueʻi pē ia.”
“Ka ʻoku maʻu e fakamoʻoní mei fē?” Ko e ʻeke ange ia ʻe Miá.
Talaange ʻe he Tangataʻeikí, “ʻOku maʻu ʻa e fakamoʻoní mei he Laumālie Māʻoniʻoní.” “Kuo ʻi ai ha taimi naʻá ke ongoʻi māfana mo fiefia ai he lolotonga ʻo e efiafi fakafāmili ʻi ʻapí pe ʻi he lotú?”
Naʻe kiʻi fakakaukau ʻa Mia ki ai. “Naʻá ku ongoʻi lelei ʻi he taimi naʻá ke tāpuakiʻi ai au kimuʻa pea toki kamata ʻa e akó.” Naʻe toe kiʻi fakakaukau lahi ange. “Pea ʻoku ou ongoʻi loto māfana maʻu pē ʻi he taimi ʻoku ou fanongo ai ki he malanga ʻa Palesiteni Monisoni ʻi he konifelenisi lahí. Pea ko e taimi ʻoku ou angalelei ai ki hoku ngaahi kaungāmeʻá pe ʻi he taimi ʻoku ou lau ai ʻeku folofolá, ʻoku ou toe ongoʻi lelei foki ai.”
Malimali ʻa e Tangataʻeikí. “Ko e ngaahi ongo ko iá ko e folofola atu ia ʻa e Laumālie Māʻoniʻoní kiate koé. ʻOkú Ne ʻoatu ʻa e ngaahi ongo ko iá ʻi he taimi ʻokú ke fai ai ha meʻa ʻoku totonu pe ʻi he taimi ʻokú ke fanongo ai ki ha meʻa ʻoku moʻoni.”
Pehē ʻe Mia, “ʻOku ou ongoʻi māfana mo fiefia he taimí ni.” “Ko e Laumālie Māʻoniʻoní ia?”
Naʻe toe fāʻofua ki ai ʻa e Tangataʻeikí. “ʻIo. ʻOkú ne talaatu ʻoku moʻoni ʻa e ngaahi meʻa ʻokú ta talanoa ki aí. Pea ko e founga ia ʻokú ke maʻu ai ha fakamoʻoní.”
Ko e taimi naʻe ʻalu ai ʻa Mia kimui ange ke mohé, naʻe ʻikai fakakaukau kuó ne maʻu ha fakamoʻoni kakato, ka naʻá ne kei maʻu pē ʻa e ongoʻi lelei, mo māfana naʻe moʻoni ʻa e meʻa naʻe talaange ʻe he Tangataʻeikí. Naʻá ne ʻiloʻi ko e ongó ni ko e kamataʻangá pē ia.
Naʻe hū atu ʻa Mia ki hono sipi kafu māfaná pea kuikui hono matá. Pea kimuʻa pea toki vale hono matá ʻo mohé, naʻe fanafana, “Fakafetaʻi Atu, Tamai Hēvani, ʻi Hoʻo tokoni ke u maʻu ha fakamoʻoní. Pea fakamālō atu koeʻuhí ko ʻeku tangataʻeikí.”
Tā fakatātaaʻi ʻe Brad Teare