Nonga ʻi he Fakatangá
Beka F,. Monitana, USA
Ngaahi tā fakatātā ʻa Ben Simonsen
Naʻá ku tangutu fakalelei hake ʻi heʻeku fanongo ki he tefito ʻa e taha lea hono hokó: ko e hā ʻoku hala ai ʻa e Siasi Māmongá mo e ʻuhinga ʻoku hoko ai ʻa e Kau Māmongá ko e kau tāufehiʻa mālualoí. Naʻá ku ongoʻi ʻi he lolotonga ʻo e leá ʻoku kula hoku kouʻahé, mo ʻohovale pea mo loto mamahi. Naʻe lava fēfē ʻe hoku ngaahi kaungāmeʻa totonú, lolotonga ʻenau ʻilo ko e taha au ʻo e Kau Māʻoniʻoni ʻi he Ngaahi ʻAho Kimui Ní, ʻo fili ke fai ha ngaahi lau ʻoku loi ʻi muʻa heʻemau kalasi lea faka-Pilitāniá kotoa?
Hili e tā ʻa e fafangú, naʻe haʻu e taha leá mo ha niʻihi ʻo hoku ngaahi kaungāmeʻa kehé. Naʻá ku talaange ʻi he māfana ʻa e Laumālié ʻiate aú ko e meʻa naʻe lea ʻakí naʻe hala pea ʻoku ʻikai fehiʻa ʻa e Siasí ia ʻi he kakai ʻoku ʻikai ke nau moʻui ʻaki ʻemau tui fakalotú. Ko e meʻa naʻa nau faí, ko ʻenau ʻohofi ʻaki au ha ngaahi fakamatala loi mo ha ngaahi tukuakiʻi. Naʻá ku ongoʻi tuenoa. Naʻá ku fakakaukau, “ʻOku tonu fēfē ʻa ʻeku moʻui ʻaki e meʻa ʻoku ou ʻiloʻi ʻoku moʻoní, kae fakatangaʻi au?”
ʻI heʻeku aʻu ki ʻapi mei he akó ʻi he ʻaho ko iá, naʻá ku fakatokangaʻi ha ʻīmeili mei heʻeku kui fefiné. Naʻá ne talamai ai kiate au ke u kumi ʻa e Mātiu 5:11–14. Naʻá ku lau mo fakatēloʻimata: “ʻOku monūʻia ʻakimoutolu ʻoku manukia mo fakatangaʻi, mo lohiekina ʻakimoutolu ʻi he meʻa kotoa pē koeʻuhí ko aú. Mou fiemālie, ʻo fiefia lahi ʻaupito: he ʻoku lahi hoʻomou totongi ʻi he langí: he naʻe pehē ʻenau fakatangaʻi ʻa e kau palōfita naʻe muʻa ʻiate kimoutolú. Ko e maama ʻo māmaní ʻa kimoutolu. Ko e kolo ʻoku tuʻu ʻi ha moʻunga, ʻoku ʻikai faʻa fakapuli ia.
Naʻe fakafonu ʻe he Laumālie Māʻoniʻoní hoku lotó ʻi heʻeku lau ʻa e ngaahi lea ko iá. ʻOku ou ʻilo ʻe fakamālohia ʻetau fakamoʻoní ʻe he fakatangá, pea ʻoku ou ʻilo ko e ngaahi tāpuaki ʻi he langí ʻe taau pea mo feʻunga mo e mamahi ʻoku tau foua ʻi heni ʻi māmaní. Naʻe ʻai ʻe he Fakamoʻuí ke tau lava ʻo maʻu e nongá ʻi he taimi ʻoku fakatangaʻi ai kitautolu ʻi heʻetau moʻui ʻaki ʻEne ongoongoleleí, pea ʻoku ou houngaʻia moʻoni ai.