Ko ha Fehuʻi ʻInitaviu Taʻe-ʻamanekina

Alvin A., ʻOtu Filipainí

Naʻá ku fiu feinga ke maʻu ha ngāue ʻi he ʻosi ʻeku ngāue fakafaifekaú. Naʻe faifai peá u kau ki ha ʻinitaviu. ʻE hoko ʻa e foʻi ngāué ko ha faingamālie lelei, ka naʻá ku tailiili he naʻe ʻikai feʻunga ʻeku pōtoʻi ngāué. Naʻe hoko mai e taimi ke ʻinitaviu ai aú, pea naʻá ku tangutu tailiili ʻi he ʻao ʻo e pulé. Naʻá ku fakatokangaʻi ʻi heʻeku hila atu ki heʻene tēpilé, ha laʻipepa mo ha ngaahi fehuʻi naʻá ne fai ki he kau talangāué. Naʻe tā vave hoku mafú. Naʻe fakalea mamafa ʻa e ngaahi fehuʻí.

Naʻe maʻu ʻe he pulé ʻeku tohi lekooti ako mo ngāué pea kamata ke ne ʻeke ʻeku tuʻunga taukei fakangāué. Ko e taimi naʻá ne lau ai “faifekau taimi kakató,” naʻá ne ʻeke mai pe te u lava ʻo talaange ʻa e meʻa naʻá ku akoʻi ʻi heʻeku ngāue fakafaifekaú.

Naʻá ku talanoa mo ia kau ki he kau palōfitá, palani ʻo e fakamoʻuí, pea mo e fāmili taʻengatá. Naʻe malimali pea pehē mai, ʻʻOku ou loto ke ke ʻalu ange ʻo feʻiloaki mo hoku fāmilí.”

Naʻá ne toe toʻo ʻa e laʻipepa naʻe ʻi ai ʻa e ngaahi fehuʻi ki he ʻinitaviú. Naʻe toe foki mai ʻeku ongoʻi tailiilí. Peá ne ʻeke mai, “ʻOku ʻi ai ha feituʻu ke ke nofo ai ʻi heni ʻi Manila?” Naʻe ʻikai toe tatali ia ki heʻeku talí kae pehē mai, “Sai, ʻoku fie maʻu ke ke kumi ha feituʻu. Te ke kamata ʻapongipongi.”

Ko ha mana ia. He ʻikai toe ngalo ʻiate au hono tokoniʻi au ʻe he ngāue fakafaifekaú ʻi hoku ʻinitaviu ki ha ngāué.