Taimi ki he Folofolá

Ko e Tauhisipi Leleí

Fai ʻe Erin Sanderson

ʻOku nofo ʻa e tokotaha naʻá ne faʻú ʻi ʻIutā, USA.

Ako fakataha ki he Fuakava Foʻoú ʻi he taʻú ni!

Naʻe fai ʻe Sīsū ha talanoa (pe talafakatātā) ʻi ha ʻaho ʻe taha fekauʻaki mo ha tauhisipi naʻe ʻofa lahi ʻi heʻene fanga sipí mo fie foaki ʻene moʻuí ke maluʻi kinautolu. ʻOku tau hangē ko e fanga sipi ʻi he talanoa ko iá. Pea ʻoku hangē ʻa e tauhisipí ko hotau Fakamoʻui ko Sīsū Kalaisí. ʻOku ui ia ʻi he taimi ʻe niʻihi ko e Tauhisipi Leleí.

Naʻe fakahaaʻi ʻe Sīsū ʻEne ʻofá ʻi he taimi naʻe ʻomi ai ʻe ha ngaahi mātuʻa ʻenau fānaú ke mamata kiate Iá. Naʻa Ne folofola ange, “Tuku pē ʻa e tamaiki īkí ke haʻu kiate au, pea ʻoua naʻa taʻofi ʻa kinautolu: he ʻoku ʻo e kakai peheé ʻa e puleʻanga ʻo e ʻOtuá” (Luke 18:16). Peá ne toki fua kinautolu ʻi hono umá mo tāpuakiʻi kinautolu.

Kuikui peá ke fakakaukau ʻoku fua koe ʻe he Fakamoʻuí mo foaki atu hao tāpuaki. Te ke lava ʻo ongoʻi ʻEne ʻofá ʻi he taimi ʻokú ke ako ai pe fakakaukau kiate Iá. ʻOku tokoniʻi koe ʻe he Laumālie Māʻoniʻoní ke ke ongoʻi e ʻofa ʻa e Tauhisipi Lelei ko Sīsū Kalaisí.

Ako Lahi Ange

tuku—tukuange pe fakangofua

ʻoua ʻe taʻofi kinautolu—ʻoua naʻa taʻofi kinautolu

Talanoa Fakafāmilí

Lau ʻa e Sione 10:1–5, 11–16. Hili ia pea hiki ha lisi ʻo ha ngaahi founga ʻoku hangē ai ʻa Sīsū ko ha tauhisipí mo fakamatala ki ha taimi naʻá ke ongoʻi ai e ʻofa ʻa e Fakamoʻuí.

Hiva: “ʻOku ou Fakakaukau ʻi Heʻeku Lau ʻa e Talanoa Mālie ko Iá” (Tohi Hiva ʻa e Fānaú, 35)

Ngaahi Folofolá: Luke 18:15–17; Sione 10:1–5, 11–16

Ngaahi Vitiō: “Suffer the Little Children to Come Unto Me” mo e “Jesus Teaches that We Must Become as Little Children” (Biblevideos.org)

Ko Hotau Tauhisipi Leleí

Toʻo ʻa e fakatātā ko ʻení. Pelu ia ke hangē ha ií ʻo fakatatau mo e ngaahi laine hinehiná. Hili iá pea fakaava ʻo ke vakaiʻi mei he toʻomataʻú pea mei he toʻohemá. ʻOkú ke ongoʻi fēfē ʻa e ʻofa ʻa hotau Tauhisipi Leleí?

Tokoni Fakafolofolá

Kumi ʻa e “Ngaahi Kosipelí” ʻi he Fakahinohino ki he Ngaahi Folofolá ki ha saati ʻokú ne tala pe ko e tohi fē ʻoku fakamatala fekauʻaki mo e meʻa takitaha naʻe hokó pe akonakí. Ko e tohi pē ʻa Sioné ʻoku fakamatala ki he Tauhisipi Leleí. ʻOku ʻi ai e tohi ʻe tolu—Mātiu, Maʻake mo Luke—ʻoku fakamatala kau ki he tāpuakiʻi ʻe Sīsū ʻa e fānaú.

Tā fakatātaaʻi ʻe Phyllis Luch (toʻohemá) mo Paul Mann (toʻomataʻú)