Ngaahi Fakakaukau ki he Efiafi Fakafāmili ʻi ʻApí

ʻOku ʻi he makasini ko ʻení ha ngaahi fakamatala mo e ngaahi ʻekitivitī ʻe lava ke fakaʻaongaʻi ʻi he efiafi fakafāmili ʻi ʻapí. Ko ha sīpinga ʻeni ʻe ua.

“Ko hono Teuteu ha Potu moʻó e ʻEikí,” peesi 10: ʻOku fakamanatu mai ʻe Pīsope Kōsei kiate kitautolu hotau fatongia ke teuteu ki he hāʻele mai ʻa e Fakamoʻuí. Ko ha founga ʻe taha ke teuteu ai ha potu moʻó e ʻEikí ko hono tokoniʻi e kakai ʻoku nau fie maʻu ha ʻapí. Fakakaukau ke ngāue taʻe-totongi ʻi ha fale ʻo e kau liʻekiná, tānaki ha ngaahi meʻa maʻá e kau kumi hūfangá, kumi paʻanga ke foaki ki he paʻanga tokoni ʻofa fakaetangata ʻa e Siasí, pe kau ʻi he ngaahi ngāue tokoni ʻi homou koló. Te mou lava foki ʻo aleaʻi ha ngaahi founga taimi lōloa ke mou lava ai ʻo tokoniʻi ʻa e kau hopoaté, hangē ko hano tanumaki ha feohi fakakaungāmeʻa.

“Ko e hā ha founga te u lava ʻo ongoʻi ofi ange ai ki he Fakamoʻuí?” peesi 70: Ko Sīsū Kalaisi moʻoni ʻa e ʻuhinga ki he faʻahitaʻú, ka te mou ala fakakaukauʻi ha ngaahi founga te mou lava ai ʻo manatuʻi e faʻifaʻitakiʻanga ʻa e Fakamoʻuí ʻi he taʻú kakato. Te mou lava ʻo fakakaukauʻi ha ngaahi founga ke faʻu ai ha ʻapi ʻoku fakatefito ʻia Kalaisí, hangē ko hano fokotuʻu ha fakatātā ʻo e Fakamoʻuí ʻi homou falé, ako maʻuloto fakauike ha ngaahi potufolofola fekauʻaki mo e Fakamoʻuí, pe tokanga makehe ke teuteu ki he ʻaho Sāpaté. Fokotuʻu ha ngaahi palani ke fakahoko ai hoʻo ngaahi fakakaukaú mo lekooti ʻi hoʻo tohinoá ʻa e founga kuo tokoniʻi ai koe ʻe hoʻo ngaahi ngāué ke ke ʻunu ʻo ofi ange kia Kalaisi.