Leʻo ʻo e Kau Māʻoniʻoni ʻi he Ngaahi ʻAho Kimui Ní
Ko ha Houalotu Sākalamēniti ʻa ha Kau ʻĀngelo
ʻOsi ha ngaahi ʻaho siʻi mei he ʻAho ʻo e Fakafetaʻí, kuo kamata puke ʻeku kiʻi tamasiʻi taʻu tolu ko Teluú. Naʻá ne ʻā he pongipongi kotoa pē ʻo maʻu meʻatokoni pongipongi, teuteu ki he ʻahó mo hā ngali lelei, ka ʻi he hoko atu e ʻahó, naʻe kamata ke vaivaia pea ʻikai toe kai.
Ne hokohoko peheni ʻo lau uike. Fāifai peá u fua atu ʻa Telū ʻi he ʻaho 18 ʻo Tīsemá ki he ʻōfisi ʻo e toketaá he taimi 3:00 efiafí nai. Naʻe ʻikai toe lava ʻa Telū ʻo tuʻu pe luelue pea naʻe lahelahea hono kilí.
Naʻá ku sio ki he toketaá mo pehē ange, “Ko ʻene tōʻongá ʻeni he hoʻatā mo e efiafi kotoa pē ʻi he uike ʻe tolu kuo ʻosí.” Naʻe sio pē toketaá kia Telū peá ne fakatokoto leva ia ʻi falemahaki. Naʻa nau fai ha ngaahi sivi ka naʻe ʻikai ke nau ʻilo pe ko e hā e meʻa ne fehalaaki aí.
Naʻe ʻave ʻa Telū ʻi he ʻaho hono hokó ki ha falemahaki ʻe taha. ʻI he pongipongi Sāpate ko iá, naʻá ku ongoʻi lotosiʻi. ʻOsi ha ʻaho ʻe ua ʻo ha ngaahi sivi lahi ʻi he ongo falemahaki kehekehe ko ʻení, ne ʻikai pē ʻilo ʻe ha taha ia e palopalema ʻeku tamá. ʻIkai ngata aí, ko e Sāpate ia kimuʻa ʻi he Kilisimasí. Ko e houalotu ʻoku ou saiʻia taha ai he taʻú ko e polokalama sākalamēniti Kilisimasí pea he ʻikai ke u fanongo ʻi he ngaahi hiva mo e ngaahi malanga mālie ʻi homau uōtí.
Lolotonga ʻeku lue atu mo hoku husepānití pea mo Telū ki he loki he falemahakí naʻe ʻamanaki ke fai ai ha houalotu sākalamēnití, naʻá ku taʻe fiemālie. Naʻá ku lue atu ki he tēpile naʻe ʻi ai e ngaahi polokalamá, toʻo e taha, peá u kei lue pē mo sio ki lalo, ʻou tau ʻi ha taha.
Naʻá ku sio hake mo pehē, “Fakamolemole,” ka naʻe ʻikai ke ʻi ai ha taha ia. ʻI heʻeku vakai ki he loki naʻe ʻamanaki fai ai e sākalamēnití, naʻe hangē ha fale faiʻanga fakatahá. Naʻe ʻi he funga siteisí ha ngaahi sea ki he kau malangá, ha piano, mo ha tēpile ne maau ki he sākalamēnití pea mo ha ʻū sea siʻi ʻi ai. Naʻe ngaongao ʻa e lokí ka ko e fānau puké pē mo ʻenau ngaahi mātuʻá, ko ha tokolahi naʻe tau ki he vai-silivá.
ʻI heʻeku vakai takai ʻi he lokí, naʻá ku ongoʻi ne ʻi ai e kau ʻāngeló. Ne mau tangutu pea tafe loʻimatá ʻi hoku matá ʻi heʻeku ongoʻi e ʻofa ʻa e ʻOtuá ki Heʻene fānau naʻe puke mo faingataʻaʻiá, kuo toka ʻi he falemahakí ʻi he faʻahinga mahaki kotoa pē ʻi he taimi fakafiefia taha ʻo e taʻú.
Naʻe iku hoko ia ko e houalotu sākalamēniti lelei taha ʻo ʻeku moʻuí.
Naʻe ʻikai pē ke ʻilo ʻe he kau toketaá ia pea ko e hā ne fehalaaki ʻia Teluú. Naʻe ʻoange ki ai ha faitoʻo ke faitoʻo ʻaki e ngaahi fakaʻilonga aí pea fakaʻatā mei he falemahakí ʻi he ʻaho hono hokó. Talu mei ai mo e ʻikai toe hoko, ka te u kei manatuʻi maʻu ai pē ʻa e houalotu sākalamēniti ko iá.