2016
ʻOku Maʻu ʻa e Fiefia Fakafāmilí ʻi he Angamāʻoniʻoní
Tīsema 2016

Pōpoaki ʻa e Faiako ʻAʻahí

ʻOku Maʻu ʻa e Fiefia Fakafāmilí ʻi he Angamāʻoniʻoní

Ako ʻi he faʻa lotu ʻa e fakamatala ko ʻení pea fekumi ki ha ueʻi fakalaumālie ke ʻiloʻi ʻa e meʻa ke vahevahé. ʻE fakatupulaki fēfē ʻe he mahino ʻa e “Ko e Fāmilí: Ko ha Fanongonongo ki Māmaní” ʻa hoʻo tui ki he ʻOtuá mo faitāpuekina ʻa kinautolu ʻokú ke tokangaʻi ʻi he faiako ʻaʻahí? Ke maʻu ha fakamatala lahi ange, ʻalu ki he reliefsociety.lds.org.

family joy

Ne “fokotuʻu [ʻe he ʻOtuá] ʻa e ngaahi fāmilí ke tau maʻu ai ʻa e fiefiá, ke tokoni ke tau ʻilo ʻa e ngaahi tefitoʻi moʻoni totonú ʻi ha ʻātakai ʻo e ʻofa, mo teuteuʻi kitautolu ki he moʻui taʻengatá.”1 Fekauʻaki mo e “palani lahi ʻo e fiefia” ʻa e ʻOtuá (ʻAlamā 42:8), naʻe pehē ʻe Palesiteni Lāsolo M. Nalesoni, ko e Palesiteni ʻo e Kōlomu ʻo e Kau ʻAposetolo ʻe Toko Hongofulu Mā Uá: “ʻOku pehē ʻe Heʻene palaní ʻoku ʻi ai ʻa e tangatá mo e fefiné ʻkoeʻuhí ke nau maʻu ʻa e fiefiá’ [2 Nīfai 2:25]. ʻOku maʻu ʻa e fiefia ko iá ʻi heʻetau fili ke moʻui ʻo fakatatau mo e palani taʻengata ʻa e ʻOtuá.”2

ʻOku ʻomi ʻe he ʻapi ʻoku fakatefito ʻia Kalaisí ʻa e ngaahi faingamālie lelei taha ki he lavameʻá. ʻOku fakamatalaʻi ia ʻe ʻEletā Lisiate G. Sikoti (1928–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá ko ha feituʻu “ʻoku akoʻi ai ʻa e ongoongoleleí, tauhi ai e ngaahi fuakavá pea mahutafea ai e ʻofá,” ʻa ia ʻe lava ke nofo ai ʻa e fāmilí ʻi he “moʻui talangofua” pea hoko ʻo “fakatefito ʻi he ongoongolelei ʻo Sīsū Kalaisí.”3

Naʻe pehē ʻe Palesiteni Henelī B. ʻAealingi, ko e Tokoni ʻUluaki ʻi he Kau Palesitenisī ʻUluakí: “Te tau lava ʻo fakapapauʻi te tau fai ʻa e meʻa kotoa pē ʻoku tau lavá ke ʻohifo ʻa e ngaahi mālohi ʻo e langí ki [hotau] fāmilí.” Pea ʻoku ngali leva te tau tuʻuaki ʻa e ʻofá, tokoní, talangofuá, mo e fiefiá ʻi hotau ngaahi ʻapí ʻaki e “fakafanongo ʻetau fānaú ki he folofola ʻa e ʻOtuá pea ʻahiʻahi fakahoko ia ʻi he tui. Kapau te nau fai ia, ʻe liliu honau natulá ʻi ha founga te ne ʻomi ai ʻa e fiefia ʻoku nau kumiá.”4

Ko e Ngaahi ʻApi Fakatefito ʻia Kalaisí

ʻOku tau maʻu ʻi he folofolá ha fakatātā ʻo e ngaahi ʻapi ʻoku fakatefito ʻia Kalaisí. Naʻe ʻave ʻe Nīfai hono fāmilí mo e niʻihi kehe naʻe tui ki he ngaahi fakatokanga mo e fakahā ʻa e ʻOtuá pea mo tokanga ki he ngaahi lea ʻa Nīfaí mei he fonua ʻo e kau Leimaná, ʻi he hili e mate ʻene tamai ko Līhaí. Naʻe lava ʻa e kau Nīfaí ʻi he feituʻu foʻou ko ʻení ʻo tauhi ʻa e ngaahi tuʻutuʻuni, ngaahi fono, pea mo e ngaahi fekau ʻa e ʻEikí ʻi he meʻa kotoa, ʻo fakatatau mo e fono ʻa Mōsesé (vakai, 2 Nīfai 5:6–10). Ka naʻe ʻi ai ha niʻihi ʻi he lotolotonga ʻo e kau Nīfaí naʻa nau iku talangataʻa.

Pea neongo ʻe lava he taimi ʻe niʻihi ke ʻauhē ʻa e kau mēmipa hotau fāmilí mei he angamāʻoniʻoní ʻo hangē ko e kau Nīfaí, ka naʻe pehē ʻe ʻEletā Sikoti ko e ʻapi ʻoku fakatefito ʻia Kalaisí ʻoku kei “fakapapauʻi taha ai hono maʻu ʻo e melinó mo e maluʻangá ʻi hotau ngaahi ʻapí.” Naʻá ne pehē “ʻe kei lahi pē ngaahi faingataʻá mo e loto mamahí, ka te tau lava ʻi he uhouhonga ʻo e faingataʻá ʻo aʻusia ʻa e loto nongá pea mo ha fiefia lahi.”5

Ngaahi Potufolofola Kehe

3 Sione 1:4; 1 Nīfai 8:12; 2 Nīfai 5:27

Relief Society seal

Tuí, Fāmilí, Fakafiemālié

Maʻuʻanga Fakamatalá

  1. Tohi Tuʻutuʻuni Fika 2: Ko hono Puleʻi ʻo e Siasí (2010), 1.1.4.

  2. Russell M. Nelson, “Ko e Mali Fakasilesitialé,” Liahona, Nōvema 2008, 92.

  3. Richard G. Scott, “Ke Melino ‘a ‘Api,” Liahona, Mē 2013, 30, 31.

  4. Henry B. Eyring, “The Teachings of ‘The Family: A Proclamation to the World,’” New Era, Sept. 2015, 5, 6.

  5. Richard G. Scott, “Ke Melino ‘a ‘Api,” 31.