Leʻo ʻo e Kau Māʻoniʻoni ʻi he Ngaahi ʻAho Kimui Ní
Ko e Foaki Atu ʻo e Fiefiá
Tā fakatātaaʻi ʻe Stan Fellows
Naʻá ku hoko mo hoku husepānití ko ha ongo faifekau ʻo ngāue ʻi Tāpesi, Falanisē, ʻi he ʻOtumoʻunga Pailinī. Ko e Efiafi ʻeni Kimuʻa he Kilisimasí, pea ne ma pehē ai ke ma ō ki he koló ʻi he Palasa Vētaní ʻo tufa ha ngaahi Tohi ʻa Molomona. Naʻe ngaongao ʻa e halá, peá ma kamata fehuʻi ai kiate kimaua pe ko e hā te ma fai mo e ngaahi tohi lahi fau ko ʻení. Fakafokifā pē kuó ma fakatokangaʻi ha talavou naʻe hangē naʻe ʻikai ke ne ʻilo ʻa e feituʻu ke ʻalu ki aí.
Naʻá ma fakalea atu ki ai mo foaki ange ha Tohi ʻa Molomona. Naʻe kamata ke fiefia ʻi heʻene fanongo ki heʻema talanoa fekauʻaki mo e ongoongoleleí. Naʻá ne pehē ʻoku tokotaha pē ʻi he pō Kilisimasi ko iá pea te ne lau e Tohi ʻa Molomoná ʻo ʻikai taʻelata ai.
Hili ʻene ʻalú, naʻá ma toe vakai takai ʻi he halá ʻo fakatokangaʻi ha fefine ʻoku lue māmālie mai kiate kimaua ʻi he pō momoko ko ʻení. Naʻe hā ha fofonga fiefia meiate ia ʻi heʻema foaki ange ki ai ha Tohi ʻa Molomoná. Naʻá ne talamai kuo hoko ko ha uitou kimuí ni pea naʻe fiefia ʻi heʻema tokanga ange kiate iá. Naʻá ne pehē naʻe mātuʻaki houngaʻia ʻiate kimaua. ʻI heʻene mavahé, naʻá ma fakatokangaʻi ʻokú ne puke ʻa e tohí ki hono fatafatá.
Naʻá ma tufa e kotoa ʻo e ngaahi Tohi ʻa Molomona naʻá ma omi mo ia ʻi he pō ko iá. Ko e tokolahi taha ʻo e kakai naʻá ma tufa ki aí naʻa nau tokotaha pē, liʻekina, mo fie maʻu moʻoni ha ʻofa. Naʻá ma foki ki ʻapi he pō ko iá mo ha ongo kuó ma maʻu ʻa e meʻaʻofa Kilisimasi maʻongoʻonga tahá tuʻunga ʻi he fiefia naʻá ma lava ʻo foaki ki he niʻihi kehé.