ຂ່າວສານຈາກຝ່າຍປະທານສູງສຸດ, ເດືອນເມສາ 2017
ຄົນທີ່ທ່ຽງທຳຈະດຳລົງຊີວິດດ້ວຍສັດທາ
ທ່ານອາຈານ ແລະ ຄົນເຮັດສະບູ
ມີນິທານເລື່ອງໜຶ່ງຂອງຊາວຢິວ ກ່ຽວກັບຄົນເຮັດສະບູ ຜູ້ບໍ່ເຊື່ອໃນພຣະເຈົ້າ. ມື້ໜຶ່ງ ໃນຂະນະທີ່ລາວກຳລັງຍ່າງໄປກັບທ່ານອາຈານຄົນໜຶ່ງ, ລາວໄດ້ເວົ້າວ່າ, “ມີສິ່ງໜຶ່ງທີ່ຂ້ານ້ອຍບໍ່ເຂົ້າໃຈ. ພວກເຮົາມີສາດສະໜາ ມາເປັນເວລາຫລາຍພັນປີແລ້ວ. ແຕ່ເມື່ອເຮົາຫລຽວເບິ່ງຮອບໆ ເຮົາເຫັນຄວາມຊົ່ວຮ້າຍ, ຄວາມບໍ່ຊື່ສັດ, ຄວາມເສື່ອມເສຍ, ຄວາມອະທຳ, ຄວາມເຈັບປວດ, ຄວາມຫິວໂຫຍ, ແລະ ຄວາມຮຸນແຮງ. ປະກົດວ່າ ສາດສະໜາບໍ່ໄດ້ຊ່ວຍໃຫ້ໂລກນີ້ດີຂຶ້ນເລີຍ. ສະນັ້ນ ຂ້ານ້ອຍຈຶ່ງຖາມທ່ານວ່າ, ສາດສະໜາມີດີແນວໃດ?”
ທ່ານອາຈານໄດ້ມິດຢູ່ ແຕ່ໄດ້ຍ່າງຕໍ່ໄປກັບຄົນເຮັດສະບູ. ໃນທີ່ສຸດ ເຂົາເຈົ້າໄດ້ໄປເຖິງສະໜາມບ່ອນທີ່ເດັກນ້ອຍ ທີ່ເປື້ອນຝຸ່ນ ກຳລັງຫລິ້ນຂີ້ດິນຢູ່.
“ມີສິ່ງໜຶ່ງທີ່ຂ້ອຍບໍ່ເຂົ້າໃຈ,” ທ່ານອາຈານໄດ້ເວົ້າ. “ເບິ່ງພວກເດັກນ້ອຍເຫລົ່ານັ້ນແມ. ພວກເຮົາມີສະບູເປັນເວລາຫລາຍພັນປີແລ້ວ, ແຕ່ພວກເດັກນ້ອຍເຫລົ່ານັ້ນ ກໍຍັງສົກກະປົກຢູ່. ສະບູມີດີແນວໃດ?”
ຄົນເຮັດສະບູ ໄດ້ຕອບວ່າ, “ແຕ່ທ່ານອາຈານເອີຍ, ທ່ານຊິເວົ້າຕຳນິສະບູກໍບໍ່ຖືກ ສຳລັບເດັກນ້ອຍທີ່ເປື້ອນເປິເຫລົ່ານັ້ນ. ສະບູຕ້ອງຖືກໃຊ້ ກ່ອນມັນຈະເປັນຜົນ.”
ທ່ານອາຈານກໍຍິ້ມ ແລະ ໄດ້ເວົ້າວ່າ, “ແມ່ນແລ້ວ.”
ເຮົາຈະດຳລົງຊີວິດໃນວິທີໃດ?
ອັກຄະສາວົກໂປໂລ, ເມື່ອອ້າງເຖິງຖ້ອຍຄຳຂອງສາດສະດາໃນສະໄໝພຣະຄຳພີເດີມ, ໄດ້ສະຫລຸບຄວາມໝາຍຂອງການເປັນຜູ້ທີ່ເຊື່ອ ເມື່ອເພິ່ນໄດ້ຂຽນວ່າ, “ຄົນທີ່ທ່ຽງທຳຈະດຳລົງຊີວິດດ້ວຍສັດທາ” (ໂຣມ 1:17).
ບາງທີໃນຂໍ້ຄວາມທີ່ລຽບງ່າຍນີ້ ເຮົາເຂົ້າໃຈຄວາມແຕກຕ່າງລະຫວ່າງສາດສະໜາທີ່ອ່ອນແອ ແລະ ບໍ່ມີປະໂຫຍດກັບສາດສະໜາທີ່ມີພະລັງ ທີ່ຈະປ່ຽນແປງຊີວິດໄດ້.
ແຕ່ໃນການທີ່ຈະເຂົ້າໃຈວ່າ ການດຳລົງຊີວິດດ້ວຍສັດທາ ນັ້ນໝາຍຄວາມວ່າແນວໃດ, ເຮົາຕ້ອງເຂົ້າໃຈວ່າ ສັດທາຄືຫຍັງ.
ສັດທາແມ່ນເກີນກວ່າການມີຄວາມເຊື່ອ. ມັນເປັນການໄວ້ວາງໃຈໃນພຣະເຈົ້າແທ້ໆ ດ້ວຍການກະທຳ.
ມັນເກີນກວ່າ ການພຽງແຕ່ປາດຖະໜາເທົ່ານັ້ນ.
ມັນເກີນກວ່າ ການພຽງແຕ່ນັ່ງເບິ່ງຢູ່ຊື່ໆ, ງຶກຫົວ, ແລະ ເວົ້າວ່າ ເຮົາເຫັນດ້ວຍ. ເມື່ອເຮົາເວົ້າວ່າ “ຄົນທ່ຽງທຳຈະດຳລົງ ຊີວິດດ້ວຍສັດທາ,” ເຮົາໝາຍຄວາມວ່າ ເຮົາໄດ້ຮັບການນຳພາ ແລະ ຖືກຊີ້ນຳໂດຍສັດທາຂອງເຮົາ. ເຮົາ ກະທຳ ໃນຮູບແບບທີ່ສອດຄ່ອງກັບສັດທາຂອງເຮົາ—ບໍ່ແມ່ນດ້ວຍຄວາມຮູ້ສຶກທີ່ເຊື່ອຟັງແບບບໍ່ຄິດ, ແຕ່ແມ່ນດ້ວຍຄວາມຮັກທີ່ໝັ້ນໃຈ ແລະ ຈິງໃຈ ທີ່ມີໃຫ້ພຣະເຈົ້າຂອງເຮົາ ແລະ ສຳລັບປັນຍາອັນປະເສີດລ້ຳ ທີ່ພຣະອົງໄດ້ເປີດເຜີຍແກ່ລູກໆຂອງພຣະອົງ.
ສັດທາຈະຕ້ອງຄຽງຄູ່ໄປກັບການກະທຳ, ຖ້າບໍ່ດັ່ງນັ້ນ ມັນກໍບໍ່ມີປະໂຫຍດອັນໃດ (ເບິ່ງ ຢາໂກໂບ 2:17). ມັນຈະບໍ່ແມ່ນສັດທາຈັກໜ້ອຍເລີຍ. ມັນບໍ່ມີພະລັງທີ່ຈະປ່ຽນແມ່ນແຕ່ຄົນດຽວ, ແລ້ວຈະປ່ຽນໂລກໄດ້ແນວໃດ.
ຊາຍ ແລະ ຍິງ ທີ່ມີສັດທາ ຈະໄວ້ວາງໃຈໃນພຣະບິດາເທິງສະຫວັນຜູ້ຊົງເມດຕາຂອງເຂົາເຈົ້າ—ແມ່ນແຕ່ໃນເວລາທີ່ບໍ່ມີຄວາມແນ່ນອນ, ແມ່ນແຕ່ໃນເວລາທີ່ມີຄວາມສົງໄສ ແລະ ຄວາມຍາກລຳບາກ ຕອນທີ່ເຂົາເຈົ້າບໍ່ເຫັນຄັກ ຫລື ເຂົ້າໃຈຢ່າງແຈ່ມແຈ້ງ.
ຊາຍ ແລະ ຍິງທີ່ມີສັດທາ ຈະດຳເນີນໄປຢ່າງພາກພຽນ ໃນເສັ້ນທາງແຫ່ງການເປັນສານຸສິດ ແລະ ພະຍາຍາມທີ່ຈະເຮັດຕາມຕົວຢ່າງຂອງພຣະຜູ້ຊ່ວຍໃຫ້ລອດ, ພຣະເຢຊູຄຣິດ, ທີ່ຊົງຮັກຂອງເຂົາເຈົ້າ. ແນ່ນອນ, ສັດທາຈະສົ່ງເສີມ ແລະ ດົນໃຈເຮົາ ໃຫ້ໂນ່ມອຽງໃຈຂອງເຮົາຂຶ້ນຫາສະຫວັນ ແລະ ເອື້ອມອອກໄປສະເໝີ, ໃຫ້ຄວາມຊ່ວຍເຫລືອ, ແລະ ເປັນພອນໃຫ້ແກ່ເພື່ອນມະນຸດດ້ວຍກັນຂອງເຮົາ.
ສາດສະໜາທີ່ປາດສະຈາກການກະທຳ ກໍເປັນເໝືອນດັ່ງສະບູທີ່ຍັງຢູ່ໃນກ່ອງ. ມັນອາດມີສັກກະຍະພາບທີ່ດີເລີດ, ແຕ່ໃນຄວາມເປັນຈິງແລ້ວ ມັນມີພະລັງພຽງໜ້ອຍດຽວທີ່ຈະສ້າງຄວາມແຕກຕ່າງ ຈົນກວ່າມັນຖືກນຳໃຊ້ຕາມທີ່ປະສົງໃຫ້ໃຊ້. ພຣະກິດຕິຄຸນຂອງພຣະເຢຊູຄຣິດທີ່ຖືກຟື້ນຟູ ເປັນພຣະກິດຕິຄຸນແຫ່ງການກະທຳ. ສາດສະໜາຈັກຂອງພຣະເຢຊູຄຣິດ ສອນສາດສະໜາທີ່ເປັນຄວາມຈິງ ຊຶ່ງເປັນຂ່າວສານແຫ່ງຄວາມຫວັງ, ສັດທາ, ແລະ ຄວາມໃຈບຸນ, ຮ່ວມທັງການຊ່ວຍເຫລືອຄົນອື່ນ ໃນທາງວິນຍານ ແລະ ທາງໂລກ.
ສອງສາມເດືອນຜ່ານມານີ້, ແຮຣີແອດ, ພັນລະຍາຂອງຂ້າພະເຈົ້າ ກັບຂ້າພະເຈົ້າ ໄດ້ໄປທ່ຽວກັບລູກບາງຄົນຂອງພວກເຮົາ ຢູ່ໃນເຂດເມດີແຕຣາເນ. ພວກເຮົາໄດ້ໄປຢ້ຽມຢາມສູນອົບພະຍົບ ແລະ ໄດ້ພົບກັບຫລາຍຄອບຄົວ ຈາກປະເທດທີ່ເກີດເສິກສົງຄາມ. ເຂົາເຈົ້າເຫລົ່ານັ້ນບໍ່ໄດ້ນັບຖືສາດສະໜາດຽວກັນກັບເຮົາ, ແຕ່ເຂົາເຈົ້າເປັນອ້າຍເອື້ອຍນ້ອງຂອງເຮົາ ແລະ ເຂົາເຈົ້າຕ້ອງການຄວາມຊ່ວຍເຫລືອຢ່າງຮີບດ່ວນ. ຫົວໃຈຂອງພວກເຮົາໄດ້ຖືກສຳພັດຢ່າງເລິກຊຶ້ງ ເມື່ອພວກເຮົາໄດ້ເຫັນດ້ວຍຕົວເອງ ເຖິງສັດທາທີ່ເຂັ້ມແຂງຂອງສະມາຊິກຂອງສາດສະໜາຈັກ ໄດ້ໃຫ້ຄວາມຊ່ວຍເຫລືອ, ການສົງເຄາະ, ແລະ ຄວາມຫວັງ ແກ່ເພື່ອນມະນຸດ ທີ່ຂັດສົນຂອງເຮົາ, ໂດຍບໍ່ຄຳນຶງເຖິງສາດສະໜາ, ສັນຊາດ, ຫລື ການສຶກສາຂອງເຂົາເຈົ້າ.
ສັດທາທີ່ປະກອບດ້ວຍການກະທຳຢ່າງສະໝ່ຳສະເໝີ ຈະເຮັດໃຫ້ຫົວໃຈເຕັມໄປດ້ວຍຄວາມເມດຕາ, ເຮັດໃຫ້ຈິດໃຈເຕັມໄປດ້ວຍຄວາມສະຫລຽວສະຫລາດ ແລະ ຄວາມເຂົ້າໃຈ, ແລະ ເຮັດໃຫ້ຈິດວິນຍານເຕັມໄປດ້ວຍຄວາມສະຫງົບສຸກ ແລະ ຄວາມຮັກ.
ສັດທາຂອງເຮົາສາມາດເປັນພອນ ແລະ ເປັນອິດທິພົນທີ່ຊອບທຳ ໃຫ້ແກ່ຄົນທີ່ຢູ່ອ້ອມຮອບເຮົາ ແລະ ຕົວເຮົາດ້ວຍ.
ສັດທາຂອງເຮົາສາມາດເຮັດໃຫ້ໂລກນີ້ເຕັມໄປດ້ວຍຄວາມດີງາມ ແລະ ຄວາມສະຫງົບສຸກໄດ້.
ສັດທາຂອງເຮົາສາມາດປ່ຽນຄວາມກຽດຊັງ ໃຫ້ກາຍເປັນຄວາມຮັກ ແລະ ປ່ຽນສັດຕູໃຫ້ກາຍເປັນໝູ່ເພື່ອນໄດ້.
ແລ້ວຄົນທີ່ຊອບທຳ ທີ່ດຳລົງຊີວິດດ້ວຍການກະທຳໃນສັດທາ, ຈະດຳລົງຊີວິດດ້ວຍການໄວ້ວາງໃຈໃນພຣະເຈົ້າ ແລະ ດ້ວຍການເດີນໄປໃນທາງຂອງພຣະອົງ.
ນັ້ນຄືສັດທາອັນທີ່ສາມາດປ່ຽນບຸກຄົນ, ຄອບຄົວ, ປະຊາຊາດ, ແລະ ໂລກໄດ້.
© 2017 ໂດຍ Intellectual Reserve, Inc. ສະຫງວນລິຂະສິດທຸກປະການ. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/16. ການແປໄດ້ຮັບອະນຸຍາດ: 6/16. ແປຈາກ First Presidency Message, April 2017. Laotian. 97924 331