Ayaw Pagtugot nga Kini nga mga Istorya Makapugong Ninyo nga Magminyo
Ang kaminyoon nahimong ubos nga prayoridad ngadto sa pipila ka mga tawo ug sa kaedad nga mga grupo. Ang pipila ka mga young adult motuyo sa paglangay sa kaminyoon tungod kay sila nakakita niini isip personal nga pagpili sa kinabuhi kay sa usa ka bahin sa plano sa Dios sa kalipay.
Ania ang tulo ka “mga kasungian sa pagpangandam sa kaminyoon” nga gisulti ni Jason S. Carroll, PhD ug professor sa School of Family Life sa Brigham Young University, nga gidawat sa kadaghanan sa kalibutan.
1. Ang Kasungian sa Pagpuyo-puyo
Daghang kabatan-onan nakakita nga ang pagpuyo-puyo sa dili pa ang kaminyoon usa ka “testing” nga makapakunhod sa risgo sa diborsyo. Wala kini mohaum sa sumbanan sa Ginoo sa kaminyoon, ug ang research nagpakita nga ang pagpuyo-puyo sa dili pa ang kaminyoon may kalabutan sa dakong kahigayunan sa diborsyo.
2. Ang Kasungian sa “Sekswal nga Relasyon”
Ang uban adunay pagtuo nga kinahanglan sila nga “mopagawas sa mga butang sa ilang sistema” sa sekswal nga paagi sa dili pa sila andam nga magminyo. Ang mga pagtuon nagpakita nga kini nga kinaiya mosangpot usab ngadto sa diborsyo. Ang pagpugong sa sekswal nga mga relasyon sulod sa hingpit nga pasalig sa kaminyoon makahimo og mas taas nga kalidad sa mga kaminyoon.
3. Ang Kasungian nga “Mas Tigulang Mas Maayo”
Sa katilingban, ang edad nga magminyo mitaas, ug ang mga batan-on mitan-aw sa kaminyoon nga usa ka alkanse kay sa ganansya. Ilang nakita nga ang katuigan sa ilang pagkabatan-on isip usa ka panahon nga mag-focus sa ilang kaugalingon. Hinoon, daghang mga pagtuon nakadokumento sa emosyonal, pisikal, ekonomikanhon, ug sekswal nga mga benepisyo nga ikahatag sa malungtarong kaminyoon ngadto sa mga indibidwal ug sa katilingban.
Mas labing maayo nga motan-aw sa sumbanan sa Ginoo sa pagpangandam sa usa ka matarung nga kaminyoon ug pagpalig-on sa pamilya isip sukaranan nga yunit sa katilingban. Ang pagtudlo ug pagpadayon sa kultura sa tinuod nga pagkahingkod ug pagkaandam sa kaminyoon mao ang yawe nga mga elemento sa malampuson nga mga kaminyoon.