P&T uban sa Kinatibuk-ang Kapangulohan sa Relief Society
Gikan sa artikulo nga nagsaulog sa ika-175 nga anibersaryo sa Relief Society.
Unsa kaha kon motrabaho uban sa mga propeta?
Linda K. Burton, Kinatibuk-ang Presidente sa Relief Society: “Sa samang paagi nga si Jesukristo mao ang tsampyon alang sa mga babaye sa Iyang panahon, mao usab ang Iyang mga Apostoles sa atong panahon. Ang atong mga propeta detalyado kaayo sa ilang mga diskusyon, kanunayng nagtinguha og mga ideya ug panglantaw sa mga sister sa Simbahan. Nanghinaut ko nga ang matag sister sa Simbahan makakita ug makadungog ug mobati sa unsay among nasinati sa among pagpakig-uban kanunay sa mga propeta, mga manalagna, ug mga tigpadayag.”
Sa unsa nga paagi nga ang Relief Society makahiusa sa mga babaye sa tibuok kalibutan?
Carole M. Stephens, Unang Magtatambag: “Ang atong hugot nga pagtuo sa gahum sa maulaong sakripisyo sa Manluluwas mao ang kusganong maghiusa kanato. Ang atong gugma alang sa atong Langitnong Amahan ug kahibalo sa Iyang mahinungdanong plano sa kalipay mohiusa kanato samtang magtinguha kita sa kinabuhing dayon. Ang atong mga sister nga dalaga, minyo nga adunay mga anak, o minyo nga walay mga anak. Adunay mga biyuda ug kadtong diborsyada. Among gilauman nga kitang tanan maghiusa sa pagtrabaho ug magkahiusa samtang atong masabtan ang atong pagkatawo, atong buhat, ug atong katuyoan.”
Unsay matanyag sa Relief Society ngadto sa batan-ong mga babaye?
Linda S. Reeves, Ikaduhang Magtatambag: “Kitang tanan ‘mga anak nga babaye sa atong Langitnong Amahan, kinsa nahigugma kanato, ug kita nahigugma Kaniya.’ Sa Relief Society, inyong makaplagan nga mas magkaparehas kita kay sa managlahi. … Ang kalibutan ang nagdeterminar sa bili sa mga babaye. Ang pagkumpara sa atong kaugalingon sa unsay atong nakita ug nadungog sa kalibutan makahimo kanato nga mobati nga angay kitang mahimo nga sama niini. Karon labaw sa tanan, kinahanglan hinumduman natong tanan nga ang atong bili nagagikan sa pagkahimong anak nga babaye sa Dios—dili gikan sa unsay gihulagway sa kalibutan nga kita angayng mahimo. Ang atong kalig-on naggikan sa atong relasyon sa atong Amahan sa Langit, sa atong Manluluwas, ug sa usag usa isip mga sister sa ebanghelyo.”
[video]